[1] عیسی مُقادِّس روحدان دُلوپ، اُردُن آرناسیندان ایزینا دُلاندی. مُقادِّس روح اُنی بیابانا آلیپ گیتدی.
[2] اُل یِرده عیسی قیرق گونلَپ شِیطان طارافیندان ایمتِحانا سالیندی. شُل گونلِرینگ دُوامیندا اُل هیچ زات اییمِدی، قیرق گوندِن سُنگ بُلسا آجیقدی.
[3] شِیطان اُنگا: «اِگِر سِن خودایینگ اُغلی بُلیان بُلسانگ، بو داشینگ چُرِگه اُورولمِگینی بویور» دییدی.
[4] عیسی: «”اینسان یِکه چُرِک بیلِن یاشامایار“ دییّپ یازیلاندیر» دییّپ جُغاپ بِردی.
[5] سُنگرا شِیطان عیسانی بیر یُقاری یِره چیقاریپ، اُنگا دونیَه‌نینگ هِمّه شاهلیقلارینی گُرکِزدی.
[6] شِیطان عیسی: «مِن بولارینگ هِمّه‌سینینگ حُکومدارلیغینی و بِییکلیگینی سانگا بِرِیین. بولار مانگا بِریلدی، مِن هِم اُنی ایسلَنیمه بِریپ بیلیَرین.
[7] شُنونگ اوچین سِن مانگا سِجده اِتسِنگ، بولارینگ هِمّه‌سی سِنینگکی بُلار» دییدی.
[8] عیسی اُنگا: «”تانگرینگیز خودایا سِجده اِدینگ، یِکه اُنگا خیدمات اِدینگ“ دییّپ هِم یازیلاندیر» دییّپ جُغاپ بِردی.
[9] سُنگرا شِیطان عیسانی اورشلیمه گِتیریپ، اُنی عیباداتخانانینگ دِپه‌سینه چیقاردی. اُنگا: «اِگِر سِن خودایینگ اُغلی بُلسانگ، اُزونگی شو یِردِن آشاق اُقلا.
[10] چونکی شِیله یازیلاندیر: ”اُل سِنی قُریماق اوچین پِریشده‌لِرینه دِستور بِرِر. آیاغینگ داشا بودریمِز یالی، اُلار سِنی اِل‍لِرینده گُتِرِر“» دییدی.
[12] عیسی اُنگا: «”تانگرینگیز خودایی ایمتِحان اِتمَنگ“ دییّپ هِم یازیلاندیر» دییّپ جُغاپ بِردی.
[13] شِیطان عیسانی ایمتِحانلارینگ هِمّه‌سیندِن گِچیریپ قوتاراندان سُنگ، گِرِکلی واقت گِلیَنچَه، اُنونگ یانیندان گیتدی.
[14] عیسی مُقادِّس روحونگ گویجی بیلِن جلیلَه دُلانیپ گِلدی. اُل حاقدَکی گورّونگلِر اِطرافینگ دُرت طارافینا یایرادی.
[15] اُل کِنیسه‌لِرده خالقا اُورِتمَگه باشلادی، هِمّه‌لِر اُنی اُویَردیلِر.
[16] بیر گون عیسی اُز اُنوپ-اُسِن یِری بُلان ناصِره گیتدی. اُل سَبَّت گونی هِمیشه‌کی یالی کِنیسه باریپ، مُقادِّس یازغیلاردان اُقیماق اوچین یِریندِن توردی.
[17] اُنگا اِشعیا پیغامبارینگ کیتابینی بِردیلِر. اُل هِم کیتابی آچیپ، شو سُزلِرینگ یازیلان یِرینی تاپدی:
[18] «خودایینگ روحی اوستومدِدیر. قاریپلارا خوش خاباری بیلدیرمِگیم اوچین، اُل مِنی سِچیپ سایلادی؛ زیندانیلارا آزادلیغی، کُرلِره گُزونینگ آچیلجاقدیغینی خابار بِرمَگه اُل مِنی ایبِردی. ظولوم آشاغیندَکیلِری آزادلیغا چیقارماغا،
[19] خودایینگ مِرحِمِت ییلینی اِعلان اِتمَگه مِنی ایبِردی.»
[20] سُنگرا کیتابی یاپیپ، اُنی ایزینا خیدماتکَره بِردی-ده اُتوردی. کِنیسه‌دَکیلِرینگ بارینینگ گُزی اُنگا تیکیلدی.
[21] عیسی اُلارا: «سیزینگ اِشیدِن بو مُقادِّس یازغینگیز شو گون بِرجای بُلدی» دییّپ، گورّونگلِرینه باشلادی.
[22] هِمّه‌لِری عیسانی اُووپ، اُنونگ آغزیندان چیقان عجاییپ سُزلِره حایران قالیپ: «بو یوسفینگ اُغلی دَلمی؟» دییّپ سُرادیلار.
[23] عیسی اُلارا: «سیزینگ مانگا: ”اِی طِبیب، اَوَّل اُزونگه شِفا بِر!“ دییِن ناقیلی آیتجاقدیغینگیزی بیلیپ دورون. سیز: ”کَفَرناحوم‌دا اِدِن ایشلِرینگی اِشیتدیک. اُلاری شو یِرده، اُز یوردونگدا-دا بِرجای اِت-دَه“ دییِرسینگیز» دییدی.
[24] اُل یِنه شِیله دییدی: «سیزه دُغروسینی آیدیارین، هیچ بیر نِبی اُز یوردوندا قابول اِدیلمِیَر.
[25] سیزه حاقیقاتی آیدیارین: اِلیاس‌ینگ زاماندا اوچ ییل آلتی آیلاپ آسماندان یِکِجه دامجا-دا یاغین دامّان، هِمّه یوردا قاتی آچلیق دوشِنده، اسرائیل‌دا کَن دول آیال‍لار باردی.
[26] اِمّا اِلیاس اُلارینگ هیچ بیرینینگ یانینا ایبِریلمَن، یِکه صیدونداقی صَرَفَه شَهرینده بُلان بیر بیگانه دول آیالینگ یانینا ایبِریلدی.
[27] شِیله هِم، اِلیشع پیغامبارینگ زامانیندا اسرائیل‌دا جُزامی کَن آداملار باردی. اِمّا اِلیشع یِکه سوریه‌لی بیگانه نَعمانینگ یانینا ایبِریلدی و اُندان باشغا هیچ کیم پَک بُلمادی.»
[28] بو سُزلِری اِشیدِنلِرینده، کِنیسه‌دَکیلِرینگ هِمّه‌سی قاهار-غاضابا میندی.
[29] اُلار آیاغا قالیپ، عیسانی شَهردِن کُودولار. ناصِره شَهری دِپه‌ده یِرلِشیَردی. اُلار اُنی شُل دِپَه‌نینگ باشینا چیقاریپ، آشاق زینگجاق بُلدولار.
[30] اِمّا عیسی اُلارینگ آراسیندان گِچیپ، اُل یِردِن چیقیپ گیتدی.
[31] سُنگرا عیسی جلیل‌ینگ کَفَرناحوم شَهرینه گِلیپ، سَبَّت گونی خالقا اُورِتمَگه باشلادی.
[32] خالق اُنونگ تَعلیماتینا حایران قالدی، سِبَبی اُل قودرات و ایختییارلیلیق بیلِن کِپلِیَردی.
[33] کِنیسه‌ده آرخو-جینلی بیر آدام باردی. اُل قاتی سِس بیلِن قیغیریپ:
[34] «اِی ناصِره‌لی عیسی! بیزینگ بیلِن نَمه ایشینگ بار؟ بیزی هِلَک اِتمَگه گِلدینگمی؟ مِن سِنینگ کیمدیگینگی بیلیَرین، سِن خودایینگ مُقادِّسیسینگ» دییدی.
[35] عیسی اُنگا کَییپ: «سِسّیز بُل! بو آدامدان چیق!» دییدی. آرخو-جین اُل آدامی هِمّه‌لِرینگ اُوونده یِره ییقدی-دا، هیچ زییان یِتیرمَن، اُندان چیقدی.
[36] هِمّه‌لِر حایران قالیپ، بیری-بیرلِرینه: «بو نَهیلی سُز؟ اُل ایختییار هِم قودرات بیلِن آرخو-جینلارا دِستور بِریَر. اُلار هِم چیقیارلار» دییّشدیلِر.
[37] عیسی حاقینداقی خابار بو اِطرافینگ دُرت طارافینا یایرادی.
[38] عیسی کِنیسه‌دِن چیقیپ، شمعونینگ اُیونه باردی. شمعونینگ قایین اِنه‌سینی قیزدیرما توتوپ یاتیردی. مونگا عیسادان کُمِک ایسلِدیلِر.
[39] عیسی اُنونگ باشوجوندا دوروپ، قیزدیرما کَیِدی و اُنونگ قیزدیرماسی آیریلدی. اُل آیال دِرِّو یِریندِن توردی-دا، اُلارا خیدمات اِتمَگه باشلادی.
[40] گون باتاندا، آداملار هِر هیلی مِریضلِری عیسانینگ یانینا گِتیردیلِر. عیسی هِم اُلارینگ هِر بیرینینگ اوستونه اِلینی قُیوپ شِفا بِردی.
[41] کَنسیندِن جینلار: «سِن خودایینگ اُغلوسینگ!» دییّپ قیغیریشیپ چیقیاردی. اِمّا عیسی اُلارا کَییپ، کِپلِمِکلِرینه یُل بِرمِیَردی، سِبَبی اُلار اُنونگ مسیحدیگینی بیلیَردیلِر.
[42] اِرتِسی گون دانگ آتاندا، عیسی اُیدِن چیقیپ، بیر بُش یِره گیتدی. خالق هِم اُنی گُزلِمَگَه چیقدی. اُلار عیسانی تاپانلاریندا، اُنی اُز یانلاریندا آلیپ قالماغا ایسلِدیلِر.
[43] عیسی اُلارا: «مِن خودایینگ پادیشاهلیغینینگ خوش خابارینی بِیلِکی شَهرلِرده-ده واغیظ اِتمِلی، اِدیل شُنونگ اوچین هِم ایبِریلدیم» دییدی.
[44] شِیدیپ، اُل جلیل کِنیسه‌لِرینده واغیظ اِتمِگینی دُوام اِدیَردی.