[1] Wa be l-leel, fi sariiri, ana fattacht al-galbi biriidah, ana fattachtah wa ma ligiitah.
[2] Ana gammeet wa hawwagt al-madiina fi l-chawaariʼ wa fi ayyi bakaan. Ana fattacht al-galbi biriidah, ana fattachtah wa ma ligiitah.
[3] Wa l-hurraas al-buruukhu al-hille be l-leel ligooni wa ana gult : «Ma chiftu al-galbi biriidah ?»
[4] Wa min futt minhum, ana ligiit al-galbi biriidah. Hadantah wa ma khalleetah lahaddi waddeetah fi hooch ammi wa dakhkhaltah fi beet hana l-wildatni lahaddi fi l-khurfa.
[5] Ya banaat Madiinat al-Khudus, nihallifkan be jamaal al-khuzlaan wa araayil al-kadaade kadar ma tigawwiman wa la tiwaʼʼan al-hubb gabul waktah.
[6] Yaatu al-jaayi min al-sahara wa ajaajah misil dukhkhaan al-taaliʼ ? Yaatu al-muʼattar be sandal wa lubaan wa be kulla dukhkhaan al-tujjaar ?
[7] Aywa, da Suleymaan al-raakib fi baasuur utfitah. Muhawwigiinah 60 rujaal furraas min ahsan furraas Bani Israaʼiil.
[8] Kulluhum chaayliin suyuuf wa humman naas muhaaribiin. Ayyi waahid seefah fi sulbah jaahiz le ayyi khatar al-yaji be l-leel.
[9] Al-malik Suleymaan indah utfa al-sawwooha be hatab Lubnaan.
[10] Wa amadha mujammaliin be fudda wa baasuurha be dahab. Wa furaachha loonah garadi wa banaat Madiinat al-Khudus addalan daakhilha wa jammalannah be mahabba.
[11] Amurgan, ya banaat Sahyuun ! Taʼaalan chiifan al-malik Suleymaan ! Indah taaj al-ammah khattatah leyah // fi yoom ariisah wa da yoom al-farah mala galbah.