[1] Wa baʼad Ihuud maat, Bani Israaʼiil gammo battaan sawwo al-fasaala giddaam Allah.
[2] Wa Allah sallamaahum le Yaabiin malik Kanʼaan al-haakim fi madiinat Haasuur. Wa khaayid deechah usmah Siisra wa Siisra da saakin fi Haruuchat Guuyim.
[3] Wa Bani Israaʼiil sarakho le Allah achaan Siisra indah 900 araba hint hadiid wa hu zalamhum le Bani Israaʼiil zulum chadiid le muddit 20 sana.
[4] Wa fi l-wakit daak, Dabuura al-nabiiye gaaʼide tahkim fi Bani Israaʼiil. Wa raajilha usmah Lafiiduut.
[5] Wa hi sakanat tihit nakhal al-binaaduuh Dabuura ambeen hillit al-Raama wa hillit Beet Iil fi jibaal Afraayim. Wa Bani Israaʼiil yamchu leeha wa hi tisawwi leehum chariiʼa ambeenaathum.
[6] Wa yoom waahid, hi rassalat naadat Baaraakh wileed Abinuuʼam min Khadach turaab Naftaali wa gaalat leyah : «Allah Ilaah Bani Israaʼiil amarak be l-kalaam da : ‹Yalla gumm amchi le jabal Taabuur wa chiil maʼaak 10 000 raajil min gabaayil Naftaali wa Zabuluun.
[7] Wa ana nilizz Siisra khaayid deech Yaabiin le yihaaribku hu wa kulla askarah wa arabaatah hana l-harib wa nijiibhum fi waadi Khiichuun. Wa nisallimhum leek fi iideenak.›»
[8] Wa Baaraakh gaal le Dabuura : «Kan tamchi maʼaayi, namchi. Wa laakin kan ma tamchi maʼaayi, ana ma namchi.»
[9] Wa hi gaalat leyah : «Khalaas ana namchi maʼaak. Wa laakin fi l-tariig al-tamchi foogah, al-charaf ma yukuun leek inta achaan Allah yisallim Siisra fi iideen hana mara bas.» Wa khalaas, Dabuura gammat machat le Baaraakh fi Khadach.
[10] Wa fi Khadach, Baaraakh naada rujaal gabaayil Zabuluun wa Naftaali wa humman macho maʼaayah wa adadhum 10 000 raajil. Wa Dabuura kula machat maʼaahum.
[11] Wa fi l-wakit da, Haabar al-Khiini anfarag min al-Khiiniyiin al-aakhariin al-min iyaal Hubaab nasiib Muusa. Wa bana kheemtah jamb al-chadara al-kabiire hana Saʼnaniim gariib le Khadach.
[12] Wa jo khabbarooh le Siisra kadar Baaraakh wileed Abinuuʼam wa deechah talaʼo fi jabal Taabuur.
[13] Wa khalaas Siisra lamma kulla arabaatah hana l-hadiid al-adadhum 900 wa kulla deechah. Wa gamma min Haruuchat Guuyim wa macha le waadi Khiichuun.
[14] Wa Dabuura gaalat le Baaraakh : «Yalla gumm ! Al-yoom bas Allah yisallim leek Siisra fi iideenak. Aywa, Allah macha giddaamak.» Wa khalaas, Baaraakh nazal min jabal Taabuur wa maʼaayah 10 000 raajil.
[15] Wa Allah hazam Siisra be arabaatah wa askarah giddaam Baaraakh wa deechah. Wa Siisra addalla min arabatah wa arrad be rijileenah.
[16] Wa Baaraakh taabaʼ al-arabaat wa l-askar lahaddi Haruuchat Guuyim. Wa kulla askar Siisra kataloohum be l-seef wa waahid kula minhum ma faddal.
[17] Wa laakin Siisra arrad be rijileenah lahaddi kheemat Yaaʼil marit Haabar al-Khiini achaan fi salaam ambeen Yaabiin malik Haasuur wa aayilat Haabar al-Khiini.
[18] Wa Yaaʼil maragat laagat Siisra wa gaalat leyah : «Taʼaal adkhul hini fi bakaani, ya sayyidi. Wa ma takhaaf.» Wa hu dakhal fi kheemitha wa hi khattatah be khattaay wa labbadatah.
[19] Wa hu gaal leeha : «Ana atchaan. Min fadulki, antiini almi chiyya nachrab.» Wa Yaaʼil chaalat bukhsa malaane laban wa antatah chirib minha. Wa baʼad da, khattatah battaan be l-khattaay.
[20] Wa hu gaal leeha : «Agoodi fi madkhal al-kheema. Akuun naadum yasʼalki wa yuguul : ‹Fi naadum hini walla ?› Khalaas, guuli leyah : ‹La ! Ma fiih.›»
[21] Wa laakin wakit Siisra naayim min al-aya, Yaaʼil marit Haabar chaalat witid min wutaad al-kheema wa mitraga wa dakhalat bicheech jambah. Wa hi taʼanatah be l-witid fi raasah lahaddi al-witid andafan fi l-turaab. Wa be da, Siisra maat.
[22] Wa wakit Baaraakh chaayil derib Siisra ja, Yaaʼil maragat leyah laagatah wa gaalat : «Taʼaal, niwassifak al-raajil al-inta gaaʼid tifattichah.» Wa wakit dakhal fi beetha, hu ligi Siisra waagiʼ mayyit wa l-witid fi raasah.
[23] Wa fi l-yoom da, al-Rabb hazam Yaabiin malik Kanʼaan giddaam Bani Israaʼiil.
[24] Wa gudrat Bani Israaʼiil gaaʼide tiziid didd Yaabiin malik Kanʼaan lahaddi katalooh.