[1] Wa dool al-umam al-khallaahum Allah yagoodu wa beehum yijarrib kulla naas Bani Israaʼiil al-ma hidro wakit haarabo le yichiilu balad Kanʼaan.
[2] Wa hu sawwa misil ke le yiʼallim al-harib le l-zurriiyit al-jadiide hana Bani Israaʼiil achaan awwal humman ma haarabo.
[3] Daahu al-umam al-Allah khallaahum fi l-balad. Humman khamsa kubaaraat hana l-Filistiyiin wa kulla l-Kanʼaaniyiin wa l-Seeduuniyiin wa l-Hiwwiyiin al-saakniin fi jibaal Lubnaan min jabal Baʼal Harmuun lahaddi Labu Hamaat.
[4] Wa be l-umam dool, Allah yijarrib Bani Israaʼiil le yaʼarif kan humman yasmaʼo wasiiyaatah al-amar beehum juduudhum be waasitat Muusa.
[5] Wa Bani Israaʼiil sakano fi ust al-Kanʼaaniyiin wa l-Hittiyiin wa l-Amuuriyiin wa l-Firizziyiin wa l-Hiwwiyiin wa l-Yabuusiyiin.
[6] Bani Israaʼiil akhado banaat al-umam dool wa anto banaathum al-halaalhum le awlaadhum. Wa abado ilaahaathum kula.
[7] Wa Bani Israaʼiil sawwo al-fasaala giddaam Allah. Humman niso Allah ilaahhum wa abado asnaam Baʼal wa Achiira.
[8] Wa Allah khidib khadab chadiid didd Bani Israaʼiil wa sallamaahum le Kuuchan Richaʼtaayim malik Araam been al-Nahreen. Wa Bani Israaʼiil khadamo abiid le Kuuchan Richaʼtaayim le muddit tamaane sana.
[9] Wa Bani Israaʼiil koorako le Allah wa dawwaro al-fazaʼ wa Allah rassal leehum munajji. Wa hu Utniyiil wileed Khinaaz tariidah le Kaalib.
[10] Wa Ruuh Allah nazal fi Utniyiil wa hu hakam fi Bani Israaʼiil. Wa hu macha haarab Kuuchan Richaʼtaayim malik balad Araam wa Allah nasarah.
[11] Wa l-balad gaaʼide fi raaha le muddit 40 sana wa baʼad da, Utniyiil wileed Khinaaz maat.
[12] Wa Bani Israaʼiil gammo battaan sawwo al-fasaala giddaam Allah. Wa fi chaan da, Allah anta gudra le Agluun malik Muwaab le yugumm didduhum.
[13] Wa Agluun lamma maʼa Bani Ammuun wa l-Amaalikh wa haarab Bani Israaʼiil. Wa annasar fooghum wa chaal minhum Ariiha madiinat al-Nakhal.
[14] Wa Bani Israaʼiil khadamo abiid le Agluun malik Muwaab le muddit 18 sana.
[15] Wa Bani Israaʼiil koorako le Allah wa Allah rassal leehum munajji. Wa hu Ihuud al-israay, wileed Giira min gabiilat Banyaamiin. Wa Bani Israaʼiil rassalo Ihuud yiwaddi hadaaya le Agluun malik Muwaab.
[16] Wa Ihuud sawwa le nafsah seef tuulah duraaʼ wa tarragah jaay wa jaay wa rabatah fi daarijtah al-zeene be daakhal le khalagah.
[17] Wa wadda al-hadaaya dool le Agluun malik Muwaab. Wa Agluun hu samiin marra waahid.
[18] Wa wakit anta al-hadaaya khalaas, Ihuud faat maʼa naasah al-jaabo al-hadaaya.
[19] Wa wakit wassalo bakaan al-asnaam gariib le hillit Gilgaal, Ihuud gabbal le l-malik wa gaal : «Ya l-malik, indi leek kalaam sirr.» Wa l-malik amar kulla khaddaamiinah yamchu wa humman marago min giddaamah.
[20] Wa fi l-wakit da, al-malik gaaʼid fi khurfitah al-baarde al-jahhazooha leyah foog. Wa Ihuud macha gariib leyah wa gaal : «Indi kalaam min al-Rabb nidoor nuguulah leek.» Wa khalaas, al-malik gamma min kursiih.
[21] Wa tawwaali be iidah al-isra, Ihuud salla al-seef min daarijtah al-zeene wa taʼanah le l-malik fi batnah.
[22] Salaʼat al-seef kula dakhalat fi batnah wa khalaas al-chaham sadda foogah achaan Ihuud ma salla al-seef min batun al-malik. Wa khalaas, Ihuud marag min wara.
[23] Wa gubbaal ma yufuut, hu sadda biibaan al-khurfa wa gaffalaahum.
[24] Wa baʼad hu marag, khaddaamiin al-malik jo wa ligo biibaan al-khurfa al-foog mugaffaliin wa gaalo : «Akiid al-malik gaaʼid yagdi haajtah fi l-khurfa al-baarde.»
[25] Wa humman arrajjooh wakit tawiil wa laakin hu ma fatah leehum biibaan khurfitah. Wa baʼad da, humman chaalo al-muftaah wa fataho al-baab wa ligo siidhum waagiʼ fi l-turaab wa mayyit.
[26] Wa wakit humman gaaʼidiin yarjo da, Ihuud anbalas wa faat khaadi le bakaan al-asnaam wa arrad ale Saʼiira.
[27] Wa wakit wisil hinaak, darab al-buug fi jibaal Afraayim. Wa kulla Bani Israaʼiil nazalo maʼaayah min al-jibaal wa hu maachi giddaamhum.
[28] Wa gaal leehum : «Taabuʼuuni achaan Allah sallam leeku udwaanku al-Muwaabiyiin fi iideeku.» Wa humman nazalo waraayah wa chaalo al-maʼada hana bahar al-Urdun min al-Muwaabiyiin wa ma khallo naadum waahid kula yuchugg al-bahar da.
[29] Wa fi l-wakit da, katalo min al-Muwaabiyiin gariib 10 000 raajil, kulluhum induhum gudra wa fahaliin. Wa naadum waahid kula minhum ma niji.
[30] Wa min al-yoom da, al-Muwaabiyiin gaʼado tihit hukum Bani Israaʼiil wa l-balad gaaʼide fi raaha le muddit 80 sana.
[31] Wa baʼad Ihuud, hakam Chamgar wileed Anaat. Wa Chamgar da katal 600 raajil min al-Filistiyiin be kookaab hana garin toor wa hu kula najja Bani Israaʼiil.