[1] Wa baʼad kammalna al-khidme, al-kubaaraat jo wa gaalo leyi : «Chaʼab Bani Israaʼiil wa rujaal al-diin wa l-Laawiyiin ma anfarago min chuʼuub al-buldaan dool. Wa ma khallo muharramaat al-Kanʼaaniyiin wa l-Hittiyiin wa l-Firizziyiin wa l-Yabuusiyiin wa Bani Ammuun wa l-Muwaabiyiin wa l-Masriyiin wa l-Amuuriyiin.
[2] Achaan Bani Israaʼiil akhado min banaat al-chuʼuub dool wa jawwazo awlaadhum kula. Wa misil da, khalbato al-zurriiye al-mukhassasa di maʼa chuʼuub al-buldaan dool. Wa l-bado al-khiyaana di, humman al-kubaaraat wa l-masaaʼiil zaathum.»
[3] Wa wakit ana simiʼt al-kalaam da, charratt jawwaaniiyti wa jallaabiiyti wa mallatt suuf raasi wa digni wa gaʼadt tihit mutahayyir.
[4] Wa l-naas al-bakhaafo min Allah Ilaah Bani Israaʼiil lammo maʼaayi achaan al-khiyaana al-sawwooha al-naas al-gabbalo min al-khurba. Wa ana gaaʼid tihit mutahayyir lahaddi achiiye fi l-wakit al-yigaddumu foogah hadiiye hana dagiig.
[5] Wa wakit gaddimiin al-hadiiye hana l-dagiig be achiiye, ana gammeet min hiirti di be khulgaani al-mucharratiin wa barakt wa rafaʼt iideeni le Allah Ilaahi
[6] wa gult : «Ya Ilaahi, ana khajlaan wa aayib wa ma nagdar narfaʼ raasi aleek inta achaan zunuubna kitro faato raasna wa khataayaana bigo katiiriin lahaddi lihgo al-sama.
[7] Wa min wakit juduudna lahaddi l-yoom, khataayaana bigo ziyaada. Wa fi chaan zunuubna, aniina wa muluukna wa rujaal diinna, sallamoona fi iideen muluuk hana chuʼuub aakhariin. Wa humman kataloona be l-seef wa karaboona wa bigiina khaniime wa ayyaboona misil al-yoom.
[8] Wa laakin hassaʼ, ya Allah Ilaahna, inta hanneet foogna le wakit gisayyir wa khalleet waahidiin minnina nijo wa gabbalo jo almakkano fi l-bakaanak al-mukhaddas. Wa misil da, ya Ilaahna, inta fataht uyuunna wa anteetna raaha chiyya min al-ubuudiiye.
[9] Aniina kan abiid kula, Ilaahna ma khallaana fi ubuudiiyitna. Sawwa leena al-kheer wa antaana haya jadiide. Wa anta amur le muluuk balad Faaris achaan yikhalluuna niʼaddulu beet Ilaahna wa niʼaddulu daraadir Madiinat al-Khudus fi balad Yahuuza.
[10] «Ya Rabbina ! Hassaʼ da, nuguulu chunu ? Abeena ma nasmaʼo wasiiyaatak
[11] al-amartina beehum be abiidak al-anbiya wa gult leena : ‹Al-balad al-intu maachiin leeha wa tichiiluuha wa tabga leeku warasa di, hi nijse wa l-gabaayil al-gaaʼidiin foogha najjasooha wa malooha be haraamhum wa be najaasithum.
[12] Wa achaan da, ma tizawwuju banaatku le awlaadhum wa la awlaadku le banaathum. Wa ma tilmanno leehum al-salaam wa la l-kheer ila l-abad. Wa misil da, tabgo gawiyiin wa taakulu min kheer al-balad di. Wa l-balad di tabga warasa le iyaalku ila l-abad.›
[13] «Wa kulla l-cheyy al-bigi foogna, da ja be sabab zunuubna wa fiʼilna al-cheen. Wa be da kula, inta Ilaahna ma aakhabtina hasab zunuubna al-waajib nilʼaakhabo be sababhum. Wa laakin inta khalleet al-faddalo minnina aaychiin.
[14] Wa hal battaan nigabbulu nikhaalufu wasiiyaatak wa nilʼaakhado maʼa l-gabaayil al-bisawwu al-haraam giddaamak walla ? Kan nisawwu misil da, inta ma tazʼal foogna ziyaada wa tidammirna marra waahid lahaddi waahid kula ma yifaddil walla ?
[15] Ya Allah Ilaah Bani Israaʼiil, inta saadikh wa khalleet al-faddalo minnina aaychiin lahaddi l-yoom. Wa daahu aniina jiina giddaamak muznibiin. Wa fi chaan al-charr al-sawweenaah da, ma waajib nagiifu giddaamak.»