[1] Wa udwaan gabaayil Yahuuza wa Banyaamiin simʼo kadar al-naas al-gabbalo min al-khurba gaaʼidiin yabnu beet le Allah Ilaah Bani Israaʼiil.
[2] Wa l-udwaan dool macho le Zarubaabil wa kubaaraat aayilaat Bani Israaʼiil wa gaabaloohum wa gaalo : «Khalluuna nabnu maʼaaku achaan aniina kula misilku gaaʼidiin naʼabudu Ilaahku wa nigaddumu leyah dahaaya. Wa da min wakit Isar Hadduun malik balad Achuur jaabaana hini.»
[3] Wa laakin Zarubaabil wa Yachuuʼ wa kubaaraat aakhariin hana aayilaat Bani Israaʼiil raddo leehum wa gaalo : «Abadan ma tichaaruku maʼaana fi buna beet Ilaahna. Aniina wiheedna bas nabnu beet le Allah Ilaah Bani Israaʼiil misil Kuurach malik balad Faaris amaraana.»
[4] Wa misil da, naas al-balad gaaʼidiin yikassuluuhum le chaʼab Bani Yahuuza wa yikhawwufuuhum le yadharoohum min al-buna.
[5] Wa battaan ajjaro mustachaariin didduhum achaan yifachchulu barnaamijhum hana l-buna. Wa da min wakit hukum Kuurach malik balad Faaris lahaddi wakit hukum Daariyuus malik balad Faaris.
[6] Wa fi bidaayit hukum al-malik Achawiruuch, udwaan al-Yahuud katabo leyah jawaab chakwa didd naas balad Yahuuza wa sukkaan Madiinat al-Khudus.
[7] Wa battaan fi ayyaam Artahachta malik balad Faaris, Bichlaam wa Mitradaat wa Tabiil wa rufgaanhum al-aakhariin kula katabo le l-malik jawaab be l-lukhkha al-araamiiye wa tarjamooh leyah.
[8] Wa battaan kula, Rahuum al-waali wa Chimchaay kaatib al-waali katabo jawaab le l-malik Artahachta didd sukkaan Madiinat al-Khudus wa gaalo :
[9] Daahu jawaab hana Rahuum al-waali wa Chimchaay kaatib al-waali wa rufgaanhum al-aakhariin al-humman kubaaraat madiinat Diin wa madiinat Afarsitka wa madiinat Tarfil wa madiinat Afarsa wa madiinat Arak wa madiinat Baabil wa madiinat Chuucha wa madiinat Diiha wa madiinat Ilaam
[10] wa chuʼuub aakhariin al-waddaahum al-malik Asnaffar al-machhuur wa aziim fi hillaal balad Saamira wa fi l-mantaga al-kharib le bahar al-Furaat.
[11] Wa daahu al-kalaam al-nuguulu le l-malik Artahachta. Aniina abiidak al-gaaʼidiin fi l-mantaga al-kharib le bahar al-Furaat nikhabburuuk be l-kalaam da.
[12] Al-Yahuud al-gabbalo minnak wa jo leena fi Madiinat al-Khudus dool gaaʼidiin yabnu battaan madiinithum al-awwal maʼruufa be sukkaanha al-muʼaaridiin wa fasliin. Humman gaaʼidiin yiʼaddulu asaas al-durdur al-muhawwig al-madiina wa yikammuluuh. Al-khabar da, khalli al-malik yasmaʼah.
[13] Khalli al-malik yukhutt fi aglah kadar al-madiina di kan anbanat wa durdurha kammalooh, sukkaan al-madiina di battaan ma yikaffu miiri wa la zaka wa la ayyi cheyy al-waajib yikaffuuh le l-malik. Wa da yijiib darar fi sanduug al-malik.
[14] Min akalna wa chiribna maʼa l-malik, aniina ma nardo leyah darar wa be da, ma nikhassudu cheyy fasil yaji le l-malik. Wa fi chaan da bas, aniina nantuuk al-khabar da
[15] achaan tifattich kutub al-muluuk al-gubbaalak. Wa fi l-kutub dool, talga wa taʼarif kadar al-madiina di muʼaaride wa indaha darar le l-malik wa le manaatigah wa min zamaan kula sukkaanha muʼaaridiin bas. Wa achaan da bas, madiinithum alhaddamat.
[16] Ya l-malik, aniina nikhabburuuk ! Kan al-Yahuud bano madiinithum di wa durdurha kula kammalooh, inta battaan ma indak hagg fi l-mantaga al-kharib le bahar al-Furaat.
[17] Wa be misil da, al-malik radda fi jawaabhum wa gaal : Le Rahuum al-waali wa le Chimchaay kaatib al-waali wa le rufgaanhum al-aakhariin al-saakniin fi balad Saamira wa fi l-mantaga al-kharib le bahar al-Furaat.
[18] Al-jawaab al-rassaltuuh leena da garooh wa tarjamooh leyi.
[19] Amarna naas le yifattuchu fi kutub al-muluuk wa humman ligo kadar sahiih ke, al-madiina di min zamaan kula muʼaaride didd al-muluuk wa sukkaanha muʼaaridiin.
[20] Wa l-madiina di zamaan indaha muluuk gawiyiin al-hakamo kulla l-mantaga al-kharib le bahar al-Furaat wa l-naas kaffo leehum al-miiri wa l-zaka wa ayyi cheyy al-waajib yikaffuuh le l-malik.
[21] Wa misil da, ooruuhum le l-naas al-gaaʼidiin yabnu achaan yikhallu al-buna wa l-madiina di ma tinbani illa be izni.
[22] Angarʼu ! Ma talʼabo be amri da wa la tikhallu al-fasaala di tiziid wa tisabbib darar fi sanduug al-malik.
[23] Wa min garo leehum kalaam al-jawaab hana l-malik Artahachta, Rahuum wa Chimchaay al-kaatib wa rufgaanhum macho ajala ke le l-Yahuud fi Madiinat al-Khudus wa be gu, waggafoohum min al-buna.
[24] Wa misil da, khidmit buna beet Allah fi Madiinat al-Khudus wagafat wa gaaʼide waagfe lahaddi fi l-sana al-taaniye hana Daariyuus malik balad Faaris.