[1] Daahu al-cheyy al-Allah al-Rabb wassafah leyi ana Amuus fi l-ruʼya. Ana chift guffa malaane be fawaakih najiidiin.
[2] Wa Allah gaal : «Chift chunu, ya Amuus ?» Wa ana gult : «Chift guffa malaane fawaakih najiidiin.» Wa Allah gaal leyi : «Misil al-fawaakih al-nijdo, chaʼabi Bani Israaʼiil kula wakithum tamma le l-ikhaab wa ana battaan ma nakhfir leehum.
[3] Wa fi l-yoom da, khine fi gasir al-malik yikhayyir // yabga nuwaah. Wa fi ayyi bakaan, janaazaat mudaffigiin bala haraka.» Wa da kalaam Allah al-Rabb.
[4] Asmaʼo, ya intu al-tazulmu al-masaakiin wa min al-balad, taturdu al-taʼbaaniin.
[5] Intu tuguulu fi nufuusku : «Le mata yikammil al-iid hana awwal yoom fi l-chahar achaan nibiiʼu gamehna ? Wa mata yikammil yoom al-sabt achaan nufukku dabangaatna wa nibiiʼu khumaamna ? Nikiilu be mikyaal sakhayyar wa niziidu tamanah wa nukhuchchu be miizaan al-ma adiil.
[6] Wa nachru al-miskiin be sileeyaat wa l-fagraan be niʼeelaat wa nibiiʼu kanfuut al-gameh.»
[7] Wa Allah halaf be l-balad al-farhaaniin beeha zurriiyit Yaakhuub wa gaal : «Ana abadan ma nansa amalku al-cheen al-gaaʼidiin tisawwuuh.
[8] Wa be sabab da, al-balad ma tarjif walla ? Wa kulla sukkaanha ma yabgo haznaaniin walla ? Al-balad tatlaʼ kullaha misil bahar hana Masir wa tatmi wa tanzil misil seel al-Niil.»
[9] Wa da kalaam Allah al-Rabb : «Fi l-yoom da be duhur, al-wata tabga dalma wa be nahaar bas, al-wata tabga leel fi kulla l-balad.
[10] Wa ayyi iid al-tiʼayyuduuh, nibaddilah be hizin wa kulla khineeku yabga nuwaah. Wa kulluku talbaso khulgaan al-hizin wa tizayyunu ruuseeku. Da yabga misil hizin hana moot al-wileed al-wahiid wa fi l-akhiir, yabga yoom hana hizin chadiid.»
[11] Wa daahu kalaam Allah al-Rabb : «Yaji yoom waahid al-foogah nijiib al-juuʼ fi kulla l-balad. Wa da ma juuʼ hana akil wa la atach le l-almi laakin da juuʼ wa atach le kalaami ana Allah.
[12] Wa intu tiʼiiru min bahar le aakhar wa min munchaakh le sabaah wa tifattuchu kalaam Allah wa laakin be da kula, ma talgooh.
[13] Fi l-yoom da, al-banaat wa l-subyaan yumuutu min al-atach.
[14] Naas waahidiin yahalfu be sanam madiinat al-Saamira // wa yuguulu : ‹Yiʼiich ilaahki, ya hillit Daan ! Wa yiʼiich ilaahki, ya hillit Biir Sabʼa !› Wa l-naas dool yahlako marra waahid wa battaan ma yugummu.»