[1] Daahu al-kalaam al-bukhuss Bani Israaʼiil al-ja le Amuus fi ruʼya. Wa Amuus da waahid min ruʼyaan al-khanam hana hillit Takhuuʼa. Wa l-ruʼya di bigat fi ayyaam hukum Uzziiya malik mamlakat Yahuuza wa fi ayyaam hukum Yarubaʼaam wileed Yahuʼaach malik mamlakat Israaʼiil. Wa da be santeen gabul al-zilzaal.
[2] Wa Amuus gaal : «Min Sahyuun, Allah khidib ziyaada. Wa min Madiinat al-Khudus, hissah ansamaʼ misil gargaraan al-duud. Wa kulla marʼa al-ruʼyaan jaffa wa raas jabal al-Karmal yibis.»
[3] Wa daahu Allah gaal : «Be sabab naas madiinat Dimachkh iso talaata wa arbaʼa marraat, ana abadan ma nikhalli al-kharaar al-chiltah didduhum. Achaan sawwo sukkaan Gilʼaad // misil ganaadiil al-daggoohum be mudgaaga // hana hadiid.
[4] Wa fi chaan da, ana ninazzil naar fi gasir al-malik Hazayiil al-taakul kulla gusuur al-malik Banhadaad.
[5] Wa nikassir haadir baab madiinat Dimachkh wa nuguchch al-haakim // min waadi Awan wa l-kaarib asaat al-muluk // min Beet Adin. Wa chaʼab balad Araam yiwadduuhum fi l-khurba fi Khiir.» Wa da, Allah bas gaalah.
[6] Wa daahu Allah gaal : «Be sabab naas madiinat Khazza iso talaata wa arbaʼa marraat, ana abadan ma nikhalli al-kharaar al-chiltah didduhum. Achaan waddo kulla l-chaʼab fi l-khurba wa sallamoohum le naas balad Adoom.
[7] Wa fi chaan da, ana ninazzil naar fi daraadir Khazza al-taakul kulla gusuurha.
[8] Wa nuguchch al-haakim // min madiinat Achduud wa l-kaarib asaat al-muluk // min Achgaluun. Wa nadrub madiinat Akhruun wa nidammir al-faddalo // min al-Filistiyiin.» Wa da, Allah al-Rabb bas gaalah.
[9] Wa daahu Allah gaal : «Be sabab naas madiinat Suur iso talaata wa arbaʼa marraat, ana abadan ma nikhalli al-kharaar al-chiltah didduhum. Achaan sallamo kulla l-chaʼab misil abiid le naas balad Adoom wa ma fakkaro fi l-alaakha al-akhawiiye al-ambeenaathum.
[10] Wa fi chaan da, ana ninazzil naar fi daraadir Suur al-taakul kulla gusuurha.»
[11] Wa daahu Allah gaal : «Be sabab naas balad Adoom iso talaata wa arbaʼa marraat, ana abadan ma nikhalli al-kharaar al-chiltah didduhum. Achaan macho be zaʼal // wara akhwaanhum wa kataloohum be l-seef // bala mahanna. Wa achaan zaʼalhum didd akhwaanhum ma wagaf wa karabo leehum al-adaawa fi galibhum le mudda tawiile.
[12] Wa fi chaan da, ana ninazzil naar fi mantagat Teemaan al-taakul kulla gusuur hillit Busra.»
[13] Wa daahu Allah gaal : «Be sabab naas Bani Ammuun iso talaata wa arbaʼa marraat, ana abadan ma nikhalli al-kharaar al-chiltah didduhum. Achaan fi Gilʼaad chaggo butuun al-awiin al-khalbaanaat le yiwassuʼu arduhum.
[14] Wa fi chaan da, ana ninazzil naar fi daraadir madiinat Rabba al-taakul kulla gusuurha be korooraak fi yoom al-harib wa be amzoobaʼaane fi yoom hana riih chadiide.
[15] Wa malikha wa kubaaraatah yakurbuuhum wa kulluhum yiwadduuhum // fi l-khurba.» Wa da, Allah bas gaalah.