[1] لَاكِنْ إِنْتَ عَلِّمْ الْأَخْوَانْ الْحَالْ الْمُوَافِقَةْ مَعَ التَّعْلِيمْ الْعَدِيلْ.
[2] وَصِّي الشُّيَابْ أَشَانْ يَبْقَوْا عَاقْلِينْ وَ مُحْتَرَمِينْ وَ خَلِّي بَالْهُمْ يَبْقَى وَسِيعْ. وَ خَلِّي يَبْقَوْا ثَابْتِينْ فِي الْإِيمَانْ وَ الْمَحَبَّةْ وَ الصَّبُرْ.
[3] وَ وَصِّي الْعَجَايِزْ كُلَ أَشَانْ حَالْهِنْ تَبْقَى تَقِيَّةْ وَ مَا يَبْقَنْ قَوَّالِيَاتْ وَ لَا سَكَّارِيَّاتْ. خَلِّي يِعَلِّمَنْ أَخْوَاتْهِنْ كِكَّيْف يِسَوَّنْ الْخَيْر.
[4] وَ بِمِثِلْ دَا، يِشَجِّعَنْ الشَّابَّاتْ أَشَانْ يِرِيدَنْ رُجَالْهِنْ وَ عِيَالْهِنْ
[5] وَ يِعِيشَنْ بِحَالْ عَاقْلَةْ وَ طَاهْرَةْ وَ يُخُطَّنْ بَالْهِنْ فِي بُيُوتْهِنْ وَ قُلُوبْهِنْ يَبْقَوْا بُيُضْ وَ يَسْمَعَنْ كَلَامْ رُجَالْهِنْ. وَ بِمِثِلْ دَا، يِسِدَّنْ الدَّرِبْ لِلنَّادُمْ الْيِدَوْر يُقُولْ كَلَامْ فَسِلْ فَوْق كَلَامْ اللّٰهْ.
[6] وَ وَصِّي الصُّبْيَانْ أَشَانْ يِثَبُّتُوا نُفُوسْهُمْ.
[7] أَبْقَى لَيْهُمْ مَثَلْ فِي كُلَّ شَيْء. وَصِّفْ لَيْهُمْ بِحَالَكْ كِكَّيْف يِسَوُّوا الْخَيْر. وَ خَلِّيهُمْ يِشِيفُوا كَدَرْ إِنْتَ نَادُمْ مُخْلِصْ فِي تَعْلِيمَكْ وَ مُنْكَرِبْ فَوْقَهْ.
[8] وَ خَلِّي كَلَامَكْ يَبْقَى سَالِمْ بِلْحَيْن حَتَّى نَادُمْ مَا يَلْقَى فَوْقَهْ سَبَبْ لِيِهَرْجَكْ. وَ بِمِثِلْ دَا، أَيِّ نَادُمْ الْيِدَوْر يِخَالِفَكْ، يَخْجَلْ و مَا يَقْدَرْ يُقُولْ فَوْقنَا شَيْء فَسِلْ.
[9] وَ وَصِّي الْعَبِيدْ أَشَانْ يَسْمَعَوْا كَلَامْ سِيَادْهُمْ لَحَدِّي سِيَادْهُمْ يَرْضَوْا بَيْهُمْ فِي كُلَّ شَيْء. وَ خَلِّي الْعَبِيدْ مَا يِخَالُفُوهُمْ
[10] وَ لَا يَسُرْقُوا مِنْهُمْ شَيْء. وَ لَاكِنْ وَاجِبْ يَبْقَوْا لَيْهُمْ صَادِقِينْ مَرَّةْ وَاحِدْ أَشَانْ يِوَصُّفُوا فِي كُلَّ شَيْء كَدَرْ تَعْلِيمْ هَنَا اللّٰهْ الْيِنَجِّينَا، هُو سَمَحْ بِلْحَيْن.
[11] أَكِيدْ، نِعْمَةْ اللّٰهْ بَانَتْ فِي الْمَسِيحْ أَشَانْ تِنَجِّي كُلَّ النَّاسْ.
[12] وَ هِي تِدَرِّبْنَا أَشَانْ نِخَلُّوا مِنِّنَا الْكُفُرْ وَ شَهْوَاتْ الدُّنْيَا وَ نِعِيشُوا فِي الدُّنْيَا بِحَالْ عَاقْلَةْ وَ صَالِحَةْ وَ تَقِيَّةْ.
[13] وَ نَرْجَوْا بِعَشَمْ الْيَوْم الْمُبَارَكْ الْيِبِينْ فَوْقَهْ مَجْد هَنَا إِلـٰهْنَا وَ مُنَجِّينَا الْعَظِيمْ، عِيسَى الْمَسِيحْ.
[14] هُو أَنْطَى نَفْسَهْ ضَحِيَّةْ لِيَفْدَانَا مِنْ كُلَّ فَسَالَةْ وَ يِطَهِّرْ قُلُوبْنَا أَشَانْ نَبْقَوْا لَيَّهْ شَعَبَهْ حَلَالَهْ مُنْكَرِبِينْ فِي عَمَلْ الْخَيْر.
[15] وَ خَلَاصْ كُلَّ الْكَلَامْ دَا، أَوْرِيهُمْ بَيَّهْ بِكَلَامْ وَاضِحْ. عِنْدَكْ فَوْقهُمْ قُدْرَةْ أَشَانْ تِشَجِّعْهُمْ وَ تَهْرِجْهُمْ حَسَبْ حَالْهُمْ. مَا تِخَلِّي نَادُمْ يَحْقِرَكْ.