[1] وَ نَنْطِيكْ وَصِيَّةْ بِأُسُمْ اللّٰهْ وَ بِأُسُمْ الْمَسِيحْ عِيسَى الْيِحَاسِبْ الْحَيِّينْ وَ الْمَيْتِينْ وَ بِالْيَوْم هُو يِبِينْ فَوْقَهْ بِمَمْلَكَتَهْ.
[2] بَلِّغْ كَلَامْ اللّٰهْ. أَنْكَرِبْ فَوْقَهْ كَانْ تَلْقَى مِنْ النَّاسْ مُرّ وَلَّا حِلُو كُلَ. جِيبْ النَّاسْ فِي الدَّرِبْ. الْوَاحِدِينْ أَهْرِجْهُمْ وَ الْوَاحِدِينْ شَجِّعْهُمْ. عَلِّمْهُمْ كُلُّهُمْ بِصَبُرْ شَدِيدْ.
[3] فِيَهْ وَكِتْ جَايِ النَّاسْ يَابَوْا مَا يَحْمَلَوْا التَّعْلِيمْ الْعَدِيلْ. يِتَابُعُوا الْكَلَامْ الْحَلُو لَيْهُمْ وَ يِشِيلُوا مُعَلِّمِينْ كَتِيرِينْ الْيُقُولُوا الْكَلَامْ الْيَعَجِبْ النَّاسْ بَسْ.
[4] وَ مَا يِدَوْرُوا يَسْمَعَوْا أَبَداً كَلَامْ الْحَقّ. فِي بَدَلَهْ يِدَوْرُوا يَسْمَعَوْا قِصَصْ النَّاسْ الْيِوَدُّرُوهُمْ.
[5] لَاكِنْ إِنْتَ، أَقْعُدْ دَايْماً ثَابِتْ وَ أَحْمَلْ التَّعَبْ وَ بَشِّرْ النَّاسْ بِالْبِشَارَةْ وَ أَخْدِمْ عَدِيلْ الْخِدْمَةْ الْاللّٰهْ أَنْطَاهَا لَيْك.
[6] لَاكِنْ أَنَا بِقِيتْ مِثِلْ ضَحِيَّةْ وَ قَرِيبْ دَمِّي يِدَفِّقْ. وَ أَنَا مَوْتِي قَرَّبْ خَلَاصْ.
[7] أَنَا جَاهَدْت جِهَادْ عَدِيلْ فِي الْحَقّ. وَ السَّبَقْ الطَّوِيلْ كَمَّلْتَهْ وَ الْإِيمَانْ كَرَبْتَهْ قَوِي لَحَدِّي النِّهَايَةْ.
[8] وَ هَسَّعْ الْجَائِزَةْ الْيَنْطُوهَا لِلْغَالِبْ تَرْجَانِي. وَ هِي التَّاجْ الرَّبِّنَا يُخُطَّهْ فِي رَاسْ النَّادُمْ الصَّالِحْ. وَ رَبِّنَا الْحَاكِمْ الْعَادِلْ يَنْطِينِي الطَّاقِيَةْ دِي فِي الْيَوْم الْأَخِيرْ. وَ مَا يَنْطِيهَا لَيِّ أَنَا وِحَيْدِي لَاكِنْ يَنْطِيهَا لِكُلَّ النَّاسْ الْقَرْمَانِينْ لِيَوْم جَيِّتَهْ.
[9] جَاهِدْ لِتَجِينِيِ عَجَلَةْ
[10] أَشَانْ أَخُونَا دِيمَاسْ يِحِبّ الدُّنْيَا وَ فَاتْ خَلَّانِي مَشَى فِي حِلَّةْ تَسَلُونِيكِي. وَ الْآخَرِينْ مَا فِيهُمْ. أَخُونَا كِرِيسْكِي مَشَى فِي بَلَدْ غَلَاطِيَةْ وَ أَخُونَا تِيطُسْ مَشَى فِي بَلَدْ دَلْمَاطِيَةْ.
[11] وَ مِثِلْ دَا، إِلَّا أَخُونَا لُوقَا وِحَيْدَهْ قَاعِدْ مَعَايِ. أَمْشِي لِأَخُونَا مَرْقُسْ وَ جِيبَهْ مَعَاكْ. هُو يِسَاعِدْنِي بِلْحَيْن فِي خِدْمَةْ الرَّبّ.
[12] وَ أَنَا رَسَّلْت أَخُونَا تِشِيكُسْ فِي حِلَّةْ أَفَسُسْ.
[13] وَ وَكِتْ تَجِي، جِيبْ مَعَاكْ خَلَقِي هَنَا الْبَرِدْ الْخَلَيْتَهْ مَعَ أَخُونَا كَارْبُسْ فِي حِلَّةْ تُرُوَاسْ. وَ جِيبْ الْكُتُبْ كُلَ. وَ فَكِّرْ فِي الْكُتُبْ الْمَكْتُوبِينْ فِي فَرْوَةْ وَ مَا تَنْسَاهُمْ.
[14] وَ إِسْكَنْدَرْ دَقَّاقْ النَّحَاسْ هُو سَوَّى لَيِّ فَسِلْ بِلْحَيْن. رَبِّنَا بَسْ يِجَازِيهْ فَوْق الشَّيْء السَّوَّاهْ لَيِّ.
[15] أَنْقَرِعْ مِنَّهْ أَشَانْ هُو خَالَفْ كَلَامْنَا مُخَالَفَةْ شَدِيدَةْ.
[16] فِي الْمَرَّةْ الْأَوَّلَانِيَّةْ الْجَابَوْنِي فِي الْمَحْكَمَةْ وَ دَافَعْت لِنَفْسِي، مَا فِي نَادُمْ وَاحِدْ الْوِقِفْ مَعَايِ. كُلُّهُمْ خَلَّوْنِي مَرَّةْ وَاحِدْ. نَسْأَلْ رَبِّنَا مَا يَحَاسِبْهُمْ.
[17] لَاكِنْ رَبِّنَا وِقِفْ مَعَايِ وَ أَنْطَانِي قُدْرَةْ وَ بَيْهَا بَلَّغْت الْبِشَارَةْ كُلُّهَا كَيْ وَ نَاسْ مِنْ كُلَّ الْأُمَمْ سِمْعَوْهَا. وَ فِي الْيَوْم دَا، أَنَا مِثِلْ نَادُمْ الدُّودْ يِدَوْر يَاكُلَهْ. لَاكِنْ الرَّبّ نَجَّانِي مِنْ الْمَوْت.
[18] وَ هُو يِنَجِّينِي مِنْ كُلَّ شَيْء فَسِلْ وَ يِوَدِّينِي عَافَيْ فِي مَمْلَكَتَهْ السَّمَاوِيَّةْ. الْحَمْدُ لِلّٰهْ دَايْماً وَ إِلَى الْأَبَدْ. آمِينْ.
[19] سَلِّمْ فِرِسْكَةْ وَ أَكِيلَا وَ نَاسْ بَيْت وَانِي سِفِرُسْ.
[20] أَخُونَا رَسْطُسْ قَعَدْ فِي كُرُنْتُسْ. وَ تُرُوفِيمُسْ بِقِي مَرْضَانْ وَ أَنَا خَلَّيْتَهْ فِي حِلَّةْ مِلِيتُسْ. جَاهِدْ أَشَانْ تَجِي لَيِّ قُبَّالْ الشِّتَاءْ مَا يَبْدَا.
[21] يُوبُلُسْ وَ بُودِسْ وَ لِينُسْ وَ كُلُودِيَةْ وَ كُلَّ الْأَخْوَانْ يِسَلُّمُوكْ.
[22] الرَّبّ مَعَاكْ. عَلَيْكُمْ النِّعْمَةْ.