[1] يَا أَخْوَانَّا، أَسْمَعَوْا كَلَامِي بَتَّانْ. أَوَّلْ عَلَّمْتُوا مِنِّنَا الْحَالْ الْوَاجْبَةْ أَشَانْ اللّٰهْ يَرْضَى بَيْكُو. وَ خَلَاصْ إِنْتُو مَاشِينْ عَدِيلْ. وَ أَشَانْ دَا، نَشْحَدَوْكُو وَ نِوَصُّوكُو بِأُسُمْ الرَّبّ عِيسَى أَشَانْ تَمْشُوا عَدِيلْ بِزِيَادَةْ.
[2] تَعَرْفُوا الْوَصَايَا الْأَنْطَيْنَاكُو بِأُسُمْ رَبِّنَا عِيسَى.
[3] الشَّيْء الْاللّٰهْ يِدَوْرَهْ لَيْكُو هُو الْحَالْ الصَّالْحَةْ. مَا تِقَرُّبُوا لِلزِّنَى.
[4] هُو يِدَوْر أَيِّ نَادُمْ يَعَرِفْ كِكَّيْف يَمْلُكْ جِسْمَهْ بِالْحَالْ الصَّالْحَةْ وَ شَرِيفَةْ.
[5] مَا تِخَلُّوا شَهْوَاتْكُو يَمْلُكُوا فَوْقكُو. مَا تَبْقَوْا مِثِلْ النَّاسْ الْمَا عِنْدُهُمْ دِينْ وَ مَا بَعَرْفُوا اللّٰهْ.
[6] فِي الْكَلَامْ دَا، خَلِّي نَادُمْ مَا يَخْطَأْ فَوْق أَخُوهْ وَ لَا يَظُلْمَهْ أَشَانْ أَوْرَيْنَاكُو مِنْ أَوَّلْ بِكَلَامْ وَاضِحْ، اللّٰهْ يِعَاقِبْ النَّاسْ الْيِسَوُّوا كُلَّ الذُّنُوبْ الْمِثِلْ دَوْل.
[7] اللّٰهْ مَا نَادَانَا لِلْفَسَادْ. اللّٰهْ نَادَانَا لِنَبْقَوْا صَالِحِينْ.
[8] وَ أَشَانْ دَا، أَيِّ نَادُمْ الْيَابَى الْكَلَامْ دَا، مَا يَابَى كَلَامْ إِنْسَانِي بَسْ. هُو يَابَى كَلَامْ اللّٰهْ النَّزَّلْ فَوْقكُو الرُّوحْ الْقُدُّوسْ.
[9] وَ أَكِيدْ، اللّٰهْ ذَاتَهْ عَلَّمَاكُو كَدَرْ وَاجِبْ تِرَّايَدَوْا أَمْبَيْنَاتْكُو. وَ أَشَانْ دَا، إِنْتُو مَا حَاوْجَانِينْ أَنِحْنَ نَكْتُبُوا لَيْكُو شَيْء فِي الْمَحَبَّةْ الْأَخَوِيَّةْ.
[10] وَ دَا بَسْ الشَّيْء الْقَاعِدِينْ تِسَوُّوهْ أَشَانْ تِحِبُّوا كُلَّ الْأَخْوَانْ الْفِي بَلَدْ مَقِدُونِيَةْ. لَاكِنْ يَا أَخْوَانَّا، نِوَصُّوكُو أَشَانْ تِرَّايَدَوْا بِزِيَادَةْ بَتَّانْ.
[11] شِيلُوا نِيَّةْ أَشَانْ تِعِيشُوا بِحَالْ هَادِيَةْ. وَ مَا تَدْخُلُوا فِي شُؤُونْ النَّاسْ. أَخْدُمُوا بِدُرَاعْكُو مِثِلْ أَنِحْنَ وَصَّيْنَاكُو بَيَّهْ.
[12] كَانْ إِنْتُو قَاعِدِينْ تِسَوُّوا مِثِلْ دَا، النَّاسْ الْمَا مُؤْمِنِينْ يِكَرُّمُوكُو وَ مَا تِحْتَاجُوا لِشَيْء مِنْ أَيِّ نَادُمْ.
[13] يَا أَخْوَانَّا، نِدَوْرُوا نِأَوْرُوكُو بِحَالَةْ الْمُؤْمِنِينْ الْأَتْوَفَّوْا أَشَانْ مَا تَحْزَنَوْا مِثِلْ النَّاسْ الْمَا عِنْدُهُمْ عَشَمْ فِي رَبِّنَا.
[14] آمَنَّا كَدَرْ عِيسَى مَاتْ وَ بَعَثْ. وَ أَشَانْ دَا، نِآمُنُوا كُلَ كَدَرْ يَوْم عِيسَى يَجِي، اللّٰهْ يَبْعَثْ الْمُؤْمِنِينْ بِعِيسَى الْأَتْوَفَّوْا وَ يِجِيبْهُمْ مَعَايَهْ.
[15] نِأَوْرُوكُو بِالْكَلَامْ الرَّبِّنَا ذَاتَهْ أَوْرَانَا بَيَّهْ وَ دَا هُو. أَنِحْنَ الْحَيِّينْ فِي يَوْم جَيَّةْ الرَّبّ وَ لِسَّاعْ مَا مُتْنَا، أَبَداً مَا نِقَدُّمُوا قُبَّالْ أَخْوَانَّا الْمَاتَوْا خَلَاصْ.
[16] أَشَانْ الرَّبّ عِيسَى ذَاتَهْ يَنْزِلْ مِنْ السَّمَاءْ وَ يِنَادِي بِحِسّ شَدِيدْ. وَ صَوْت هَنَا كَبِيرْ الْمَلَائِكَةْ يِنْسَمِعْ وَ مَعَايَهْ حِسّ هَنَا بُرُونْجِي اللّٰهْ. وَ أَوَّلْ شَيْء، الْمُؤْمِنِينْ بِالْمَسِيحْ الْمَيْتِينْ يَبْعَثَوْا.
[17] وَ بَعَدْ دَا، أَنِحْنَ الْحَيِّينْ اللِّسَّاعْنَا مَا مُتْنَا، اللّٰهْ يَرْفَعْنَا مَعَاهُمْ سَوَا فِي السَّحَابْ وَ نُلُمُّوا مَعَ الرَّبّ فَوْق فِي الْهَوَاءْ. وَ خَلَاصْ، مِنْ دَا نَقْعُدُوا دَايْماً مَعَ الرَّبّ.
[18] وَ أَشَّاجَعَوْا أَمْبَيْنَاتْكُو بِالْكَلَامْ دَا.