[1] جَوَابْ مِنِّي أَنَا بُولُسْ وَ أَخْوَانِي سِيلَا وَ تِمُوتَاوُسْ لِأُمَّةْ الْمَسِيحْ الْفِي حِلَّةْ تَسَلُونِيكِي، شَعَبْ هَنَا اللّٰهْ أَبُونَا وَ رَبِّنَا عِيسَى الْمَسِيحْ. عَلَيْكُمْ السَّلَامْ وَ الرَّحْمَةْ.
[2] أَنِحْنَ نَشْكُرُوا اللّٰهْ دَايْماً فِي شَانْكُو كُلُّكُو وَ نَسْأَلَوْا لَيْكُو اللّٰهْ فِي كُلَّ صَلَاوَاتْنَا.
[3] وَ أَيِّ وَكِتْ النَّسْأَلَوْا لَيْكُو أَبُونَا اللّٰهْ نِفَكُّرُوا فِي الْعَمَلْ السَّوَّيْتُوهْ بِالْإِيمَانْ وَ الْخِدْمَةْ السَّوَّيْتُوهَا بِالْمَحَبَّةْ وَ عَشَمْكُو الْقَوِي فَوْق رَبِّنَا عِيسَى الْمَسِيحْ.
[4] يَا أَخْوَانَّا الْاللّٰهْ يِحِبُّكُو، نَعَرْفُوا هُو إِخْتَارَاكُو
[5] أَشَانْ الْبِشَارَةْ الْبَلَّغْنَاهَا لَيْكُو مَا جَاتْ لَيْكُو بِكَلَامْ بَسْ لَاكِنْ بِقُدْرَةْ و بِخِدْمَةْ الرُّوحْ الْقُدُّوسْ وَ بِعَشَمْ مُأَكَّدْ. وَ إِنْتُو شُفْتُوا حَالْنَا مَعَاكُو وَ خِدْمِتْنَا فِي شَانْكُو.
[6] وَ إِنْتُو شِلْتُوا مَثَلْنَا وَ حَالْكُو بِقَتْ مِثِلْ حَالْنَا وَ مِثِلْ حَالْ هَنَا رَبِّنَا عِيسَى. وَكِتْ النَّاسْ قَاعِدِينْ يِتَعُّبُوكُو بِلْحَيْن كُلَ، إِنْتُو قِبِلتُوا الْكَلَامْ بِالْفَرَحْ الْجَايِ مِنْ الرُّوحْ الْقُدُّوسْ.
[7] وَ بَيْدَا، إِنْتُو بِقِيتُوا مَثَلْ عَدِيلْ لِكُلَّ الْمُؤْمِنِينْ الْفِي بُلْدَانْ مَقِدُونِيَةْ وَ الْيُونَانْ.
[8] مِنْكُو إِنْتُو، بِشَارَةْ الرَّبّ شَتَّتْ مَشَتْ بَعِيدْ، مَا فِي مَقِدُونِيَةْ وَ الْيُونَانْ بَسْ وَ لَاكِنْ لِحْقَتْ كُلَّ بَكَانْ. كَانْ مَا نُقُولُوا شَيْء فِيكُو كُلَ، إِيمَانْكُو بِاللّٰهْ مَعْرُوفْ.
[9] فِي أَيِّ بَكَانْ النَّاسْ قَاعِدِينْ يِحَجُّوا بَيْكُو وَ يُقُولُوا كَدَرْ إِنْتُو كَرَبْتُونَا عَدِيلْ وَ تُبْتُوا لِلّٰهْ. وَ يُقُولُوا إِنْتُو خَلَّيْتُوا مِنْكُو الْأَصْنَامْ أَشَانْ تَعَبُدُوا اللّٰهْ الْوَاحِدْ الْحَيّ
[10] وَ تَرْجَوْا إِبْنَهْ الْيِقَبِّلْ مِنْ السَّمَاوَاتْ وَ هُو عِيسَى الْاللّٰهْ بَعَثَهْ مِنْ أُسْط الْمَيْتِينْ وَ يِنَجِّينَا مِنْ الْغَضَبْ الْجَايِ.