[1] Kuyay wawqi Gayo: Noqa mayor wawqi karmi qamta rasunpaypa kuyar kay cartata cartakamü.
[2] Kuyay wawqi, Tayta Diostami manakuykä ali kawashqaykiman tupu lapanchöpis alila kanaykipaq y mana qeshyaypa kawanaykipaq.
[3] Jesucristo yachasishqannöla kawaykashqaykita wawqikuna chämur wilayämaptinmi selläma kushikushkä.
[4] Tayta Dios munashqanno wamräkuna kawaykäyashqanta musyarmi selläma kushikü.
[5] Kuyay wawqi Gayo, jukläpita shamuq wawqikunata yanapar alitami ruraykanki.
[6] Paykuna chämurmi kuyapäkuq kashqaykita shuntakäyashqächo wilayämash. Yapay kutimuptin juk markaman aywayänanpaqpis yanapaykulanki. Sayno ruraptiki Tayta Diospis kushikunqami.
[7] Jesucristupa ali wilakuyninta wilakur purirmi Tayta Diosta mana cäsukuq runakunata imatapis manakuyansu.
[8] Saymi Tayta Diospa wilakuqninkunataqa noqansi yanapänansi. Saynöpami paykunawan wilakuykaqno kashun.
[9] Wilakuqkunata yanapänansipaq tantiyasirmi juk cartata qamkunaman cartakamushkä. Sayno kaptinpis Diótrefes manashi yäsishqäkunata cäsukunsu. Payqa mandaq kayninman atiënikuykurshi munashqanta rurakun.
[10] Sayshi noqakunapa washätapis rimar puriykan. Karupita shamuq wawqikunatapis manashi chaskikunsu. Posädasiqkunatapis mana posädasiyänanpaqshi michan. Michaykaptinpis posädasiyaptinqa shuntakäyashqaykipitashi qarqun. Sayno rurashqanpita chämurnami olqutupäshaq.
[11] Kuyay wawqi Gayo, ama Diótrefesno kaysu, saypa trukanqa alilata ruray. Alita ruraq kaqqa Diospa wamranmi. Mana alita ruraq kaqmi isanqa Diosta reqinsu.
[12] Demetriupaqmi isanqa Tayta Diospa wilakuynin nishqanno kawashqanta lapan runakunapis parlayan. Noqakunapis rikayashkämi sayno kawashqanta. Musyankimi rasun kaqta niyashqäta.
[13] Yäsinäpaq maspis kaykanraqmi. Isanqa cartalacho manami qelqamushaqsu.
[14] Kikï shamurnami mastaqa yäsishayki.
[15] Tayta Dios yanapaykuläshunki makincho ali kawanaykipaq. Kaycho reqinakuyashqaykikunapis lapanmi salüdunta apasikayämun. Saycho reqinakushqäkunata cada ünunta salüdüta qoykulanki.