[1] Tayta Dios akrashqan warmi y wawankuna: Mayor wawqi karmi kay cartata apaykäsimü. Qamkunata lapan shonqüwanmi kuyä. Manami noqalasu kuyä, saypa trukanqa Tayta Diospa wilakuyninta wakin chaskikuqkunapis kuyayäshunkimi.
[2] Qamkunata kuyayä Tayta Diospa wilakuyninta noqakunano chaskikush kayaptikimi. Paypa wilakuynintaqa manami imaypis qonqäshunsu.
[3] Tayta Dios y Surin Jesucristo kuyapäyäshushpayki ali kawayänaykipaq yanapaykuyäläshunki. Saynöpis ali wilakuynin nishqanno kawar kuyanakuyänaykipaq yanapaykuyäläshunki.
[4] Wakin wamraykikuna Tayta Diospa mandamientun nishqanno kawaykäyashqanta rikarmi fiyupa kushikushkä.
[5] Saymi kanan qamta ruwakü jukniki juknikipis kuyanakuyänaykipaq. Kay mandamientu manami mushuqsu kaykan, sinöqa nawpapitanami musyashkansi.
[6] Rasunpaypa kuyakuq karqa Tayta Diospa mandamientunkunata cäsukushun. Paypa mandamientunqa kuyanakunansipaqmi nimansi. Kuyanakunansipaq kashqanta nawpapita pasanami musyashkansi.
[7] Kay pasacho askaqmi lutan yachasikuqkuna puriykäyan. Paykuna niyan: “Jesucristuqa manami rasunpaypa runasu”. Runakunata sayno criyisirmi anticristo kaykäyan.
[8] Cuidä say runakuna qamkunatapis criyisiyäshunkiman. Criyisiyäshuptikiqa Jesucristupa wilakuyninta chaskikuyashqaykipis manakaqpaqmi kanqa. Paykunata mana chaskiparmi isanqa gloriacho premiuta chaskiyanki.
[9] Pipis Jesucristupa wilakuyninta kacharir lutan yachasikuyta chaskikurqa manami rasunpaypasu Tayta Diosta chaskikush. Jesucristupa wilakuyninta mana kachariqkunami isanqa Jesucristuta y Tayta Diostapis rasunpaypa chaskikuyash.
[10] Sayno kaykaptinqa lutan yachasikuqkuna chäyämuptin ama chaskipäyaysu ni wayikimanpis posädasiyaysu.
[11] Lutan yachasikuqkunata chaskipaq kaqqa paykunanömi lutanta ruraykäyan.
[12] Yäsinäpaq maspis kaykanraqmi. Isanqa cartalacho manami qelqamushaqsu. Kikï shamurnami mastaqa yäsishayki. Saychömi shumaq kushikushun.
[13] Tayta Dios akrashqan nanaykipa wawankunapis salüdunkunata apasikayämunmi. [Amén.]