[1] ท่อง ท มุ้คู พู เย่ แฌ้ ล แฌ้ อูง ทาง ควี้ นอ จ แด แบ แซย ล โพลง พี่ โอ ลู่ง มุ้คู ล้างเทะ ลู่ง ฌางคู คู เย้า. แซย ล โพลง นอ นี่ แบ กเจ่ ควิ้ พี่ ม อุ้พ้ะ ทาง ท โยะคิ้ พ้า.
[2] ท่อง อ เว๊ อุ้พ้ะ ทาง ท โยะคิ้ พ้า นอ ท คูง ทาง ลู่ง ท พ้า นอ บี่ ซุ้ ดี๊ มี เค้ พ้ะดู คูง ทาง. มื่ง ดี๊ ท พุ้พ๊าง ไค้ะ ซ๊า ไฆวะ เป๊งนี่ ท คูง พี่ อ โอ ท พ้า เฌ๊ ทาง นอ.
[3] ทวี่ โอ ลู่ง ท คูง แกล้ นอ ยู้ง ทาง เฌ๊ ช่อง ล้าง ลู่ง ฌางคู โคล๊ง คู. ทวี่ ล แพ นอ นี่ แบ อ ดู้ง อ ยาง แม้ แช๊ โพล้ง บี่ ซุ้ ดี๊ ทุ้คลุ้.
[4] ทวี่ ล แพ นอ ท อางแม้เลา เอะ-อ้ะ ล เกม๊า อ แม้ เฌ๊ฌ้อง นาง ลู่ง ฌางคู โคล๊ง คู ดี๊ ท ดุ้ ท แล ดี๊ เซง แว แบ แบ เด้าะ เกม๊า อ แม้ น้ะ โพล้ง พี่ กแช่ แยว้ อ ท แม้ไน ล โอ ลู่ง อ เมะเทิ่งคู แบ ล แพ นอ ล้อ.
[5] ท ล เกม๊า อ แม้ ซี๊ง โพล้ง ล แพ นอ แบ แบ เด้าะ เกม๊า อ แม้ ปได้-อ้ะ นี่ แล้ เย่ เบง. ท แม้ ปได้ อ อี้ง นอ แช๊ บี่ ซุ้ ดี๊ ทุ้คลุ้ ไอ เท่อ นอ ล้อ.
[6] ลู่ง แล้ เย่ เบง พ้า อี้ง นอ โพล้ง ล แพ นอ ม แบ อ ซ้ะ ซี๊ง แบ เด้าะ ซี๊ง ซี เอะ. อ ซื๊ง เว๊ ซีง ม ซู๊ ซี๊ง ซ้ะ แบ เด้าะ ท ซี๊ง ม ไจ แด-อ้ะ.
[7] ทวี่ ล แพ นอ ล้างโฌ่ กซี พี่ แบ ท ดึ้ ไละ ทาง เอะ อ ฆ้า เมาน่าง ลู่ง ม ลี้ ดึ้ เท่อ. ลู่ง อ คู ล้อง นอ ท โอ ล เม้ง แคว่-อ้ะ แบ ด้อง คูคล้าง ท๊อง. อ เมะ นอ แบ ด้อง กโพล้ง อ เมะ.
[8] อ คูซู๊ง นอ แบ ด้อง กมืง อ คูซู๊ง. อ แซว๊ นอ แบ ด้อง คี๊ยื่ง อ แซว๊
[9] ทวี ล แพ นอ โอ ดี๊ อ ท ด้างทะ ซ้ะแน๊ นอ แบ ด้อง ท้ะ. อ ได้ะ นอ เซ๊ แบ ด้อง เลาะ กซี แอ ฌ้อง ลี้ ฆ้าง ดึ้ เท่อ
[10] โอ ดี๊ อ มี่ไค๊ พี่ ม ไพละ เท่อ แบ ด้อง ทุ้คลุ้. อ ดู้ง อ ยาง พี่ ม แม้ ปได้ กโพล้ง ลู่ง แล้ เย่ เบง อ แค๊ นอ โอ ลู่ง อ มี่ คี๊ง.
[11] ทวี่ ล แพ นอ โอ ดี๊ อ จ๊าวแพเดง พี่ อ เก ท โยะคิ้ พ้า อ กแช่. ท โยะคิ้ พ้า อ กแช่ อ เม้ง ลู่ง ฮีบรู อ คว่าง นอ กุ้ เว๊ อาบะโด กรี อ คว่าง นอ กุ้ เว๊ อาโปงลีโยง. อ นอ อุ้ เว๊ อ โค๊ โพล้ง แม้ เฌ๊ฌ้อง เท่อ.
[12] ท น้ะ ท โน๊ง อ ต้องคู ล เม้ง พ้อง ไฆวะ เย้า. โอ ก้ะ คี๊ง เม้ง เด้าะ พี่ ม เก ทาง โคะ.
[13] ท่อง ท มุ้คู พู ฆู๊ง แฌ้ ล แฌ้ อูง ทาง ควี้ นอ จ แน่ฌ๊า ท อ ลู่ง เซ๊ ทาง ลู่ง ท แบ้ ทาง อ ล่าง พี่ อ ไต้ เว๊ ดี๊ ท๊อง ล ช๊อง นอ อ โนง ลี่ง แพ้ พี่ อ โอ ลู่ง กแช่ แยว้ อ เมะแซ พ้า.
[14] ท อ ลู่ง นอ อางแม้เลา ท มุ้คู พู ฆู๊ง แฌ้ ล แฌ้ พี่ อ โชะ ควี้ นอ ไจ้ะ เว๊ "แกว ล้าง ท มุ้คู พู ลี่ง แฌ้ พี่ อ แบ ท จ้าทะ-อ้ะ ลู่ง ที๊ง พ้ะดู ยูฟาเต กล้อง นอ ไช้ะ".
[15] กแช่ แยว้ แด้ เว้ ท มุ้คู พู ลี่ง แฌ้ นอ ลู่ง ล โมง อี้ง ล นี้ง อี้ง ล แล้ อี้ง ดี๊ ล เนง อี้ง อ ฌ่าง บี่ ซุ้ ม เกม๊า เว๊ อ แม้ ซี๊ง กโพล้ง ซ๊า โป้ง นอ แม้ ซี๊ง เว๊ ล โป้ง.
[16] ท โล้ แบ แย้ ซึ้พู กซี นอ โอ คี๊ง แย้ ล๊าง แฌ้.
[17] ลู่ง ท ทาง แพล้ นอ จ แด กซี. โพล้ง พี่ อ เทา กซี คู ล แพ นอ โอ ดี๊ อ ท ด้างทะ ซ้ะแน๊ อ โฌ้ อ ฮี๊ อ บ้าง. กเย่ กซี ล แพ อ คู นอ แบ ด้อง คี๊ยื่ง อ คู. มี ดี๊ ท คูง ดี๊ ท ซ อวี้ง น๊า ม๊าง โอ ลู่ง กซี ล แพ นอ อ นุ้ พ้า ซยุ้ ทาง.
[18] กโพล้ง แบ ท แม้ ซี๊ง-อ้ะ ซ๊า โป้ง ซี๊ง ไฆวะ ล โป้ง ลู่ง ท แม้ อ้า แม้ ซ๊าง ซ๊า เม้ง อี้ง อ กย้อง เมะ เว๊ มี ดี๊ ท คูง ดี๊ ท ซ อวี้ง น๊า ม๊าง พี่ อ โอ กซี อ นุ้ พ้า ซยุ้ ทาง นอ.
[19] อ ไฌ่ บี่ อี้ง กซี นอ อ ดู้ง อ ยาง โอ ลู่ง อ นุ้ พ้า ดี๊ อ มี่ คี๊ง. อ มี่ นอ แบ ด้อง ฌู่ง. อ คู โอ ปะ. ท ล แพ อี้ง แม้ น้ะ โพล้ง ซี.
[20] กโพล้ง กุ้ อ แฌ้ พี่ ล แบ ท แม้ ซี๊ง-อ้ะ ลู่ง ท แม้ อ้า แม้ ซ๊าง ล แพ อี้ง แบ นอ ล นย๊อง ไฆวะ เท่อ พี่ อ แม้ เว๊ นอ ได้ะ แบ ล ไจ แด ท มื้งแฆ่ ได้ะ แบ ล ไจ แด ท เค่ง ท ฌ้าง พี่ อ ไต้ ทาง เว๊ ดี๊ ท๊อง ดี๊ จี้ ดี๊ ท่องบ้าง ดี๊ โล่ง ดี๊ เซง นอ ได้ะ แบ. ท เค่ง ท ฌ้าง ล แพ อี้ง แคว่ เท่อ ฌี้ ช๊องแน เท่อ ฌี้ ดี๊ ไจ ฌี้~ๆ ซี น่าง เม้ง เอะ.
[21] โพล้ง ล แพ อี้ง แม้ ซี๊ง โละ อ ซ้ะ ได้ะ ทื๊ง ท อูง ท โป้ ได้ะ แม้ กแม มืง กแม แคว๊ เท่อ ได้ะ อางฌูง อางแบล เท่อ ได้ะ.