[1] ท่อง อ ช๊าง จ แด แกะ พู อุ้พ้ะ ทาง ท อ แท๊ ล เบง ลู่ง ท เนว๊ เบง อ แกล้ นอ ฌ้อง จ แน่ฌ๊า เครุ้ ลี่ง ดื้ง นอ โอ ล ดื้ง กุ้ ซย้ะ ทาง เท่อ อ ลู่ง เซ๊ พ้ะดู บี่ ซุ้ ล๊าง เซ๊ ไจ้ะ เว๊ "เฌ๊ เซ้อ".
[2] อ นอ จ แด แบ กซี แอว้ ล ดื้ง. โพล้ง เทา กซี ล ดื้ง นอ โชะ ดี๊ คลีง. อ เว๊ นอ นี่ แบ คูคล้าง ฌ้อง เทา ทาง กซี ไจ ทาง บี่ ซุ้ ดี๊ โพล้ง น้า เท่อ ม แม้ น้า แม้ ฆ่าง เท่อ นอ ล้อ.
[3] ท่อง แกะ พู อุ้พ้ะ ทาง ก้ะ ท อ แท๊ คี๊ง เบง ล เบง นอ ฌ้อง จ แน่ฌ๊า เครุ้ คี๊ง ดื้ง ล ดื้ง นอ อ ลู่ง กุ้ ทาง เท่อ ไจ้ะ เว๊ "เฌ๊ เซ้อ".
[4] ท่อง อ ช๊าง กซี ล ดื้ง เด้าะ เฌ๊ ฆ้าง เก กซี โฌ้. โพล้ง เทา กซี ล ดื้ง อี้ง นอ นี่ แบ อ ดู้ง อ ยาง เกม๊า อ โชะ ไฆวะ ท มึ ท พ้า ลู่ง ฌางคู โคล๊ง คู บี่ ซุ้ ม เกม๊า โพล้ง กุ้ อ แฌ้ ดึ้ โละ อ ซ้ะ. อ เว๊ นอ นี่ แบ น้ะ พ้ะดู ล เบง.
[5] ท่อง แกะ พู อุ้พ้ะ ทาง ก้ะ ท อ แท๊ ซ๊า เบง ล เบง นอ ฌ้อง จ แน่ฌ๊า เครุ้ ซ๊า ดื้ง ล ดื้ง นอ กุ้ ทาง เท่อ ไจ้ะ เว๊ "เฌ๊ เซ้อ". ฌ้อง จ แด กซี ซ๊า ล ดื้ง. โพล้ง เทา กซี ล ดื้ง นอ โชะ ดี๊ นางเค๊ง ล ช๊อง.
[6] ฌ้อง จ แน่ฌ๊า เท่อ แบ ด้อง ท อ ลู่ง เซ๊ ทาง ลู่ง เครุ้ ลี่ง ดื้ง นอ อ แกล้ ไจ้ะ เว๊ "บืง ซาลี ล โซยะ นอ อ ฆวี้ ที๊ ซุ้ คางเล้ง ล นี้ง. บืง บาลี ซ๊า โซยะ นอ ที๊ ซุ้ คางเล้ง ล นี้ง. แบ เด้าะ แม้ เฌ๊ฌ้อง ทซู ดี๊ ซไบ้ะ แซ ที๊ง นอ ล ฌี้".
[7] ท่อง แกะ พู อุ้พ้ะ ทาง ท อ แท๊ ลี่ง เบง ล เบง นอ ฌ้อง จ แน่ฌ๊า เครุ้ ลี่ง ดื้ง ล ดื้ง นอ กุ้ ทาง เท่อ ไจ้ะ เว๊ "เฌ๊ เซ้อ".
[8] ฌ้อง จ แด กซี บ้างเบว้ ล ดื้ง. โพล้ง เทา กซี ล ดื้ง นอ อ เม้ง เมะ เว๊ ท ซี๊ง. พลื่ง ค่าง เฌ๊ โพะ เว๊ อ ไค๊. ท คี๊ง เม้ง อี้ง นอ นี่ แบ อ ดู้ง อ ยาง แม้ ซี๊ง โพล้ง ฌางคู โคล๊ง คู ซี. ลี่ง โป้ง นอ แม้ ซี๊ง ไฆวะ เว๊ ซี ล โป้ง แม้ ซี๊ง เว๊ ดี๊ น้ะ ดี๊ ท ซ้ะวี่ง ล้างดุ้ ดี๊ ท เจ้า ท แช๊ ดี๊ ท พูแฆ่ เม้ง.
[9] ท่อง แกะ พู อุ้พ้ะ ทาง ท อ แท๊ เย่ เบง ล เบง นอ ฌ้อง จ แด แบ วีง แล้ ลู่ง ท แบ้ ทาง อ ล่าง อ พ๊างละ เก โพล้ง อ วีง อ แล้ กุ้ อ แฌ้ พี่ อ แบ ท แม้ ซี๊ง-อ้ะ ลู่ง กแช่ แยว้ อ ลู่ง อ แท๊ ดี๊ ลู่ง เก พีงนยาง พี่ อ เฌิ่ง อ ค๊า นอ อ กย้อง.
[10] อ ซื๊ง เว๊ ซีง ล แพ นอ กุ้ ซย้ะ เท่อ เซ๊ พ้ะดู ไจ้ะ เว๊ บี่ อี้ง "กแช่ ลู่ง อ ฌี้ อ แอว้ ดี๊ อ ที๊ง อ โต้-เอ้อ ชี่ ไยะ เด้าะ เล้ น ม แม้ เตา แม้ แต๊ ดี๊ แม้ ช๊า ก้ะ โพล้ง พี่ อ โอ ฌางคู โคล๊ง คู ลู่ง อ แม้ ซี๊ง เฆ้อ อ กย้อง".
[11] ฌ้อง โพล้ง ล แพ นอ นี่ แบ ไช๊แค่ แอว้ พ้ะโท๊ กุ้ อ แฌ้ ดี๊ กแช่ แยว้ โล้ เว๊ เกม๊า อ โอ คุ้ ล ปี๊ เด้าะ โอ ท้อง อ ฌุ้พาง กุ้ อ แฌ้ พี่ อ แม้ กแช่ แยว้ อ เท่อ เมะ เว๊ อ ด๊างพื่งวี่ นอ ม แบ ท แม้ ซี๊ง-อ้ะ บี่ ซุ้ อ ซื๊ง เว๊ ท้อง อ ชิ้ ทาง.
[12] ท่อง อ ช๊าง จ แด แกะ พู อุ้พ้ะ ทาง ท อ แท๊ ฆู๊ง เบง ล เบง นอ ฌ้อง ฌางคู ว้ะ พ้ะดู. มื่ง ไค้ะ ซ๊า ทาง บี่ ซุ้ เต่ กเซ้าะ พี่ โพล้ง ไต้ เว๊ ดี๊ ท พูแฆ่ อ ชอง. แล้ โฌ้ ทาง ด๊าง เบง บี่ ซุ้ ท ซวีง.
[13] แซย ซีง ลู่ง มุ้คู นอ ล้างเทะ ลู่ง ฌางคู คู บี่ ซุ้ ดี๊ เซง กูงเย้ พี่ ลี้ง พ้ะดู อูง แบ-อ้ะ ฌ้อง อ แซ พี่ ล คลึ้ เม๊ง ได้ะ แบ นอ ล้างเทะ ไฆวะ เลา ปะ.
[14] มุ้คู ล้างแม่ ไฆวะ บี่ ซุ้ ไละ พี่ โพล้ง ทื๊ง ทาง ไท้ เว๊ ท้อง อ เลา. ท ลู่ง กุ้ อ โพลง ดี๊ เก้าะคู กุ้ อ จอง แบ ท ซึ้ ไฆวะ-อ้ะ ลู่ง อ ล่าง.
[15] ฌ้อง จ๊าวแพเดง กุ้ อ แฌ้ ลู่ง ฌางคู โคล๊ง คู อี้ง ดี๊ โพล้ง ดู โพล้ง แซย่ ซึ้คู ดู ซที๊ง โพล้ง พี่ อ โอ ดี๊ อ ดู้ง อ ยาง ดี๊ กุ้ อ แฌ้ พี่ อ เก ท อ ฆ่อง ฌี้ ล เก ท อ ฆ่อง แบ ฌี้ โอ คิ้ซูง ลู่ง ท พ้า ท ที่ ดี๊ โล่ง เช้า ไล๊ เช้า ลู่ง ท ลู่ง คู.
[16] อ ซื๊ง เว๊ กุ้ ทาง เท่อ โล้ แบ ท ลู่ง ดี๊ โล่ง ล แพ นอ ไจ้ะ เว๊ "ล้างแพล้ กดื้ง ทะ เฆ้อ เซ้อ. อางกี ซูง ไฆวะ เฆ้อ ไช้ะ. เกม๊า ก พ้อง ไฆวะ ดี๊ โพล้ง พี่ อ ชี๊น้าง อ ล่าง ยู่แคว่ เท่อ ล แฌ้ นอ อ เมะ ดี๊ เกม๊า ก พ้อง ไฆวะ ดี๊ แกะ พู ล แฌ้ นอ อ ท ซ้ะทาง ไช้ะ.
[17] อ ไฌ่ บี่ อี้ง ท้อง มื่ง นี้ง พี่ กแช่ แยว้ ดี๊ แกะ พู อ ซ้ะทาง พ้ะดู เย้า. โพล้ง เล้ ม โท่ง เว๊ เก".