[1] กแช่ เยซู โล้ เอะ อ พู อ ลี้ง บี่ อี้ง "ซที๊ง โอ ล แฌ้ โพล้ง ยู่แคว่ เอะ อ คอง อ แซย้ ล แฌ้. โพล้ง เฌ๊ โล้ แบ-อ้ะ 'โพล้ง ยู่แคว่ น เท่อ ล แฌ้ นอ เจ่ ฌี่ง เจ่ ฌ้อง น กลู น จี้'.
[2] ซที๊ง กุ้ นี่ โพล้ง พี่ อ ยู่แคว่ เอะ อ เท่อ ล แฌ้ นอ ไจ้ะ เอะ เว๊ 'เท่อ พี่ จ แน่ฌ๊า แบฆ้ะ ดี๊ แน้ นอ แม้ อ ซ้ะ บี่ จะ เล้. กเย่ เท่อ พี่ น ยู่แคว่-อ้ะ ล แพ นอ กวิ้ไน-อ้ะ เมาน่าง ฌ้อง เกม๊า เอะ แย้ อ ไฌ่ บี่ อี้ง น ล ยู่แคว่ แบ เอะ จ เท่อ ล้า แบ'.
[3] โพล้ง แคว๊ ล แฌ้ นอ ช๊องมอง เท่อ ลู่ง อ ซ้ะ พ้า 'จ เซงคู ม โฌ๊ ไจ ทาง ไฆวะ แย้ จ ม แม้ ก้ะ บี่ จะ เล้. จ ม ลี้ พล้ะ เท่อ เดอะ จ ไฌ่ ล ชอง แบ ไจ อางท่าง อาง เท่อ เดอะ ล้าง ท ฌางแช้.
[4] อ๊า จ ซีงแฌ๊ เย้า จ ม แม้ บี่ จะ เล้ พี่ โพล้ง ม ฮะ นี่ แย้ ลี้ โอ อ เด้า ลู่ง จ ท แม้ ล โอ ล้า แบ'.
[5] ท บี่ นอ โพล้ง ยู่แคว่ เท่อ ล แฌ้ นอ กุ้ นี่ โพล้ง กุ้ อ แฌ้ พี่ อ โอ แม่ ดี๊ อ เซงคู นอ ล~แฌ้ แบ ล แฌ้ ฌ้อง อางจ้ะ เว๊ อ ต้องคู ล แฌ้ บี่ อี้ง 'น โอ แม่ ดี๊ จ เซงคู ชี่ แอ เล้'.
[6] อ เท่อ ไคล้ ช้า-อ้ะ 'จ โอ แม่ ดี๊-อ้ะ ตซู อ ไปะ ล แย้'. โพล้ง ยู่แคว่ เท่อ ล แฌ้ นอ โล้ เอะ-อ้ะ 'อี้ง น ไละ กวิ้ไน เท่อ. ชี๊น้าง เซ้อ กวิ้ ก้ะ-อ้ะ อ ไปะ เย่ ชี๊ง'.
[7] ฌ้อง อางจ้ะ ก้ะ เว๊ ล แฌ้ เด้าะ 'นี๊ บ่อ น โอ แม่ ชี่ แอ เล้'. อ เท่อ ไคล้ ช๊า-อ้ะ 'จ โอ แม่ ดี๊-อ้ะ บืง อ ไปะ ล ม๊า'. โพล้ง ยู่แคว่ เท่อ ล แฌ้ นอ โล้ เอะ-อ้ะ 'อี้ง น ไละ กวิ้ไน เท่อ. กวิ้ ก้ะ-อ้ะ อ ไปะ โฆะ แย้'.
[8] โพล้ง ยู่แคว่ เท่อ ล โต้ ล ล้อง แบ ล แฌ้ นอ อ เซงคู อางปฆ้า-อ้ะ พี่ อ เว๊ แม้ เท่อ ลู่ง อ ไพ่ อ แซย๊. อ ไฌ่ บี่ อี้ง โพล้ง ฌางคู โคล๊ง คู โย้ ลู่ง อ แม้ ซกุ้ ไพ้ะ ซกุ้ เท่อ นอ แม้ อ ซ้ะ แซย๊ นี่ โพล้ง พี่ อ โอ ท พ้าง พ้า".
[9] กแช่ เยซู ไคล้ เด้าะ บี่ อี้ง "เจ่ คอง แซย้ ลู่ง ฌางคู โคล๊ง คู อี้ง แม้ มึ น ฌุ้เม้ง ฌุ้พาง บี่ ซุ้ น คอง น แซย้ เมะ เจ่ ล ซี ล้า แบ โคะ นอ อ ซื๊ง เว๊ ม ตองช้า ฮะช้า น ซื๊ง ลู่ง ท อ ล่าง ล้างชู้ ล้างแกย.
[10] โพล้ง พี่ อ โต้ อ ล้อง ดี๊ ท ล ปี๊ ล คี่ นอ ม โต้ ม ล้อง ดี๊ เท่อ ลู่ง อ ดู ปะ ล้อ. โพล้ง พี่ อ กไบล้ะ กแบล ดี๊ ท ล ปี๊ ล คี่ นอ ม กไบล้ะ กแบล ดี๊ เท่อ ลู่ง อ ดู ปะ ล้อ.
[11] ท บี่ นอ น ซื๊ง เมะ ล โต้ ล ล้อง ดี๊ คอง แซย้ ลู่ง ฌางคู โคล๊ง คู อี้ง แบ โพล้ง เล้ ม อางกี เท่อ พี่ อ ล้างเปิ่ง เต้~ๆ นอ ดี๊ แน้.
[12] ดี๊ น ซื๊ง เมะ ล โต้ ล ล้อง ดี๊ โพล้ง อ แฌ้แพ อ เท่อ แบ นอ โพล้ง เล้ ม เกล๊าง เอะ น เท่อ พี่ ม เก นี๊ แด.
[13] เพล่ ล โอ น่าง แฌ้ แบ พี่ ม แม้ เอะ เซงคู คี๊ง แฌ้ อ เท่อ ล พ๊า ฆ่าง ซี อ ไฌ่ บี่ อี้ง ม แช๊เมะ ดี๊-อ้ะ ล แฌ้ ม เอ เว๊ ล แฌ้ ม ทื๊ง แบ นะ แบ เว๊ ล แฌ้ ม ดึ้เดว~เว๊ ล แฌ้. น เก กแช่ แยว้ อ เพล่ ดี๊ เก กลู เก จี้ อ เพล่ ล พ๊า ฆ่าง ล ซี แบ".
[14] โพล้ง ฟารีซี แน่ฌ๊า แบ อ ท ซอง ล แพ อี้ง นี่ง แบ กแช่ เยซู เป๊งนี่ อ ซื๊ง เว๊ เอ กลู เอ จี้.
[15] กแช่ เยซู ไจ้ะ เอะ อ ซื๊ง เว๊ บี่ อี้ง "น ซื๊ง แม้ ดุ้ น ซ้ะ บี่ ซุ้ โพล้ง ม แคว่ น ซื๊ง เก โพล้ง ฌี้ โพล้ง แอว้ แบ เด้าะ กแช่ แยว้ ซีงแฌ๊ น เซิง น ซ้ะ. เท่อ พี่ โพล้ง ช๊องมอง เว๊ อ ลื่ง ดู ฆวี้ ดู นอ กแช่ แยว้ แคว่ เว๊ เก ท ล ล้างเปิ่ง แบ ล้อ.
[16] เซ๊งพ้า ท้างพ้า ดี๊ โม ไคล้ คิ้ กแช่ แยว้ อ แค๊ โอ ท้อง ลู่ง โยฮาง พี่ แม้ ท ไฌ่ จูง ที๊ง ล แฌ้ นอ อ ชู้. ท๊อง นอ โพล้ง ลี้ โล้ ล้าง ก้ะ ท ฌี้ อ ไฌ่ แบฆ้ะ ดี๊ กแช่ แยว้ อ มื่ง อ บ้าง ดี๊ โพล้ง กุ้ อ แฌ้ เฌา ย้ะโละ นึ ฆ้าง ลู่ง มื่ง บ้าง ล เบง นอ.
[17] มุ้คู ดี๊ ฌางคู ม ล้างแม่ ไฆวะ โย๊ นี่ ไละเมะ ลู่ง เซ๊งพ้า ท้างพ้า ม ล้างแม่ ไฆวะ ล ปี๊ ล คี่.
[18] โพล้ง แคว๊ กุ้ อ แฌ้ พี่ อ นย๊อง ไฆวะ อ แม๊ ฌ้อง แม้ ก้ะ กมืง อ แฌ้แพ นอ อ เว๊ เอโบ้ง อ แม๊ ล่างลี้ง. โพล้ง แคว๊ พี่ ล แฌ้ เล้ แม้ ก้ะ ดี๊ โพล้ง มืง พี่ อ นย๊อง ไฆวะ อ แว้ เย้า นอ อ เว๊ เอโบ้ง เอพะ เท่อ ปะ ล้อ.
[19] ซที๊ง โอ ล แฌ้ ซุ้ ไช๊ ก้อง ช้าง ลู่ง อ ฆวี้ แค้ อาง ฌี่ง อาง ฌ้อง เท่อ กุ้ มื่ง นี้ง.
[20] โพล้ง แคว๊ ลู่ง อ ซยาง อ น้ะ โอ ล แฌ้ อ เม้ง ลาซาโร มี๊งน้าง เบ้า ดี๊ ซที๊ง อ เกล้ ป้ะตู๊ง. อ ล้อง อ ย่าง โอ ที่ อ พ้าล่าง.
[21] อ เว๊ มื้งแล่ ม อาง ก้ะ เท่อ พี่ อ โอ ซที๊ง อ คะ คู ล้างเทะ. ทึ เมะ ทวีง นอ เฌ๊ อางไล เว๊ อ พ้าล่าง.
[22] ลู่ง ไค๊ นอ ลาซาโร ซี๊ง เว๊. ท มุ้คู พู เฌ๊ แม้ นี่-อ้ะ ไท้ โชะ เว๊ ลู่ง อาบราฮาง อ โอ. ลู่ง ไค๊ ซที๊ง ล แฌ้ นอ ซี๊ง ปะ. โพล้ง เคิง ล้างบ้า-อ้ะ.
[23] อ เว๊ โอ ลู่ง มแนโฮะ พ้า แบ น้ะ แบ โน๊ง เต้~ๆ แคว่ ทาง เท่อ แด อาบราฮาง ลู่ง อ ไย้ ดี๊ แด ลาซาโร โอ เว๊ อ ฌ๊างไท้ะ
[24] ฌ้อง กุ้ ซย้ะ ทาง เท่อ บี่ อี้ง 'ก แพ่ อาบราฮาง-เอ้อ ย๊างซ้ะ แบ แย้ ไช้ะ. เกม๊า ลาซาโร จูง ล้าง อ จูงโน้ง ลู่ง ที๊ง พ้า เฌ๊ ต้อง แบ จ พลี้ แม้ ล้างเคลง-อ้ะ ไช้ะ อ ไฌ่ บี่ อี้ง จ แบ น้ะ แบ โน๊ง เต้~ๆ ลู่ง มี อ้า พ้า อี้ง'.
[25] แบ เด้าะ อาบราฮาง ไคล้ ช๊า-อ้ะ 'พูแคว๊-เอ้อ นาง แบ ไท้-อ้ะ พี่ น โอ ม๊า อ แค๊ อู้ นอ น นี่ แบ ท อ ฌี้ ลู่ง น ฌ่าง แบ เด้าะ ลาซาโร นี่ แบ ท น้ะ ท โน๊ง ลู่ง อ ฌ่าง. ค๊องเนง อี้ง อ เว๊ โอ ดี๊ ท มึ ท พ้า. นี๊ แด นอ น โอ ดี๊ ท น้ะ ท โน๊ง.
[26] น้ะ นี่ อ นอ ตคื่อ โยะคิ้ โอ นุ้ ทะ แน้ ดี๊ เฆ้อ อ เบ้าช้า พ้า. ท บี่ นอ โพล้ง พี่ อ แบ ซ้ะ ลี้ ลู่ง น โอ นอ ลี้ ล ซี แบ ดี๊ โพล้ง ลู่ง น โอ เฌ๊ ฆ้าง ลู่ง ก โอ ล ซี แบ ปะ'.
[27] ซที๊ง ไจ้ะ เว๊ 'แพ่ อาบราฮาง-เอ้อ เมะ บี่ นอ เกม๊า ลาซาโร ลี้ ลู่ง จ มู่ จ แพ่ อ เด้า.
[28] อ ไฌ่ บี่ อี้ง จ ด๊างพื่งวี่ แคว๊ โอ เย่ แฌ้ ได้ะ. เกม๊า ลาซาโร ลี้ โล้ แบ-อ้ะ บี่ ซุ้ อ ซื๊ง เว๊ ล แบ เฌ๊ ลู่ง ท น้ะ ท โน๊ง อ ล่าง อี้ง แบ'.
[29] แบ เด้าะ อาบราฮาง โล้ เอะ-อ้ะ บี่ อี้ง 'น พื่ง น วี่ นอ พ้ะ แบ ไละ พี่ โมเซ ดี๊ โม ไคล้ คิ้ กแช่ แยว้ ล แพ กวิ้ เว๊ นอ เย้า. เกิ้ง ม แม้ โพะ เว๊ อ ไค๊'.
[30] ซที๊ง นอ ไจ้ะ เว๊ 'แพ่ อาบราฮาง-เอ้อ ล เมะ แบ. แบ เด้าะ โพล้ง พี่ อ ซี๊ง เย้า ล แฌ้ เมะ ลี้ โล้ แบ-อ้ะ นอ อ ซื๊ง เว๊ ม เปลง ไท้ ซ้ะ อ ซ๊าง'.
[31] แบ เด้าะ อาบราฮาง โล้-อ้ะ 'อ ซื๊ง เว๊ เมะ ล ช๊องแน โมเซ ดี๊ โม ไคล้ คิ้ กแช่ แยว้ แบ ทึ เมะ โพล้ง ซี๊ง ม๊า ทาง ไท้ ล แฌ้ ฌี้~ๆ ล นะ เว๊ แบ ปะ ล้อ' ".