[1] โอ ล นี้ง กเย่ โพล้ง กิ้ นี่ ท อ ค๊อง ดี๊ โพล้ง ท เด้บ้ะ เฌ๊ ฌู กแช่ เยซู พี่ ม คุ้ช๊องแน เว๊ อ ซอง เท่อ.
[2] โพล้ง ฟารีซี ดี๊ คู ซอง เท่อ เซ๊งพ้า ท้างพ้า ล แพ นอ เอ้งไฌ้ เท่อ บี่ อี้ง "อ เว๊ ล แฌ้ อี้ง ฮะ นี่ โพล้ง ท เด้บ้ะ ดี๊ อาง ซกุ้ โอ้ ซกุ้ เท่อ ดี๊-อ้ะ".
[3] ท บี่ นอ กแช่ เยซู อางด้อง ล้าง เท่อ ดี๊ อ ซื๊ง เว๊ บี่ อี้ง
[4] "โพล้ง ล แฌ้ ลู่ง น ซื๊ง แกล้ อ แกะ เมะ โอ อ ดื้ง ล แย้ ดี๊ ล้างแม่ ไฆวะ ล ดื้ง อ เว๊ ม แม้ บี่ จะ เล้. อ เว๊ ม อางกี โท่ ไฆวะ อ แกะ ควี๊ง ชี๊ง ควี๊ง ดื้ง ลู่ง ตเค แกล้ ฌ้อง ลี้ อางฆื๊ง นี่ ไท้ แกะ พี่ อ ล้างแม่ ล ดื้ง นอ ท้อง อ แด เว๊ เมะ-อ้า.
[5] ท่อง อ แด นี่ ไท้ เว๊ ฌ้อง นอ ซ้ะอวีง ซ้ะโทะ เว๊ โชะ ทาง เว๊ ลู่ง อ จื๊งแป ล้อง.
[6] พี่ อ ไท้ ท้อง อ เด้า นอ กุ้ ซยอง อ ฌุ้เม้ง ฌุ้พาง ดี๊ โพล้ง เฌง คู ฆ๊าง พ้า โล้ เอะ เว๊ 'ซ้ะอวีง ซ้ะโทะ ฆึ ดี๊ แย้ พี่ จ แด ไท้ จ แกะ ลู่ง อ ล้างแม่ ล ดื้ง นอ เย้า'.
[7] จ โล้ เอะ น ซื๊ง ลู่ง มุ้คู แม้ อ ซ้ะ บี่ นอ ปะ ล้อ เมะ เว๊ โพล้ง ท เด้บ้ะ ล แฌ้ ล้อ พี่ เปลง ไท้ ซ้ะ อ ซ๊าง นอ ลู่ง ท มุ้คู ซ้ะอวีง ซ้ะโทะ เว๊ แอ นี่ โพล้ง ฌี้ ควี๊ง ชี๊ง ควี๊ง แฌ้ พี่ ล แบ ซ้ะ เปลง ไท้ ซ้ะ อ ซ๊าง แบ.
[8] ไคะ ดุ้ โพล้ง มืง ล แฌ้ อ จี้ แทะ โอ ล ชี๊ง. อ เท่อ เมะ ล้างแม่ ไฆวะ ล แทะ อ เว๊ ม เช้า ทาง มี กว้ะ เกล้ง เท่อ อางฆื๊ง แคว่ เว๊ ล้างที๊ง ท้อง อ แด ไท้ เว๊ ล เมะ แบ-อ้า.
[9] พี่ อ แด ไท้ เว๊ เย้า นอ อ เว๊ กุ้ นี่ อ ฌุ้เม้ง ฌุ้พาง ดี๊ โพล้ง เฌง คู ฆ๊าง พ้า โล้ เอะ เว๊ 'ซ้ะอวีง ซ้ะโทะ ฆึ ดี๊ แย้ พี่ จ แด ไท้ จ จี้ ลู่ง ล้างแม่ ล แทะ นอ'.
[10] จ โล้ เอะ น ซื๊ง ท แม้ อ ซ้ะ บี่ นอ ปะ เมะ เว๊ กแช่ แยว้ อ มุ้คู พู ซ้ะอวีง ซ้ะโทะ เว๊ ดู มะ พี่ โพล้ง ท เด้บ้ะ ล แฌ้ เปลง ไท้ ซ้ะ อ ซ๊าง".
[11] กแช่ เยซู โล้ เว๊ เด้าะ บี่ อี้ง "โพล้ง แคว๊ โอ ล แฌ้ อ พูแคว๊ โอ คี๊ง แฌ้.
[12] อ พู ไป้ะ ล แฌ้ นอ ไคล้ ดี๊ อ แพ่ บี่ อี้ง 'แพ่-เอ้อ น คอง น แซย้ พี่ อ ล้างเทะ แบ ยี๊ แด นอ อางน้าง ไฆวะ เอะ แย้ ค๊องเนง อี้ง'. ฌ้อง อ แพ่ อางน้าง อ คอง อ แซย้ เอะ อ พูแคว๊ คี๊ง แฌ้ เลา.
[13] ลู่ง ไค๊ ล แอ นี้ง แบ นอ อ พู ไป้ะ อางกี ซยอง อ ท กุ้ อ เม้ง ฌ้อง ลี้ ลู่ง ที๊ง ไย้ ค่าง ไย้. อ เว๊ แม้ อ ซ้ะ ล กลุ้ ล จ้ะ แบ โละ กลู โละ จี้ ท้อง อ เลา.
[14] พี่ อ กลู อ จี้ ล โอ ล้า แบ นอ ท ซ้ะวี่ง ล้างดุ้ น้ะ โอ ทาง ลู่ง ค่าง ล เบง นอ อ พ้า. อ เว๊ อ ท อาง ท โอ้ ล โอ ล้า แบ.
[15] ฌ้อง อ เว๊ ลี้ แม้เล้ง เท่อ ดี๊ โพล้ง ล ค่าง นอ ล แฌ้. อ เท่อ เจ่-อ้ะ ลี้ บืงล้าง เอะ อ ทุ้ ลู่ง ฆึ้ แกล้ พ้า.
[16] อ เว๊ แบ อ ซ้ะ อาง ทุ้แซ ไพ้ะ พี่ อ บืงล้าง ทุ้ นอ แบ เด้าะ โพล้ง ล เกม๊า อาง-อ้ะ น่าง เม้ง แบ.
[17] ลู่ง ไค๊ ทึ อ เว๊ นาง ล้าง ไท้ อ ซ้ะ ไคล้ เท่อ บี่ อี้ง 'จ แพ่ อ เพล่ อ บาง โอ แอ ฌี่ง แอ ฌ้อง อาง กึ้ โอ้ ฆวี้ แบ เด้าะ ยี๊ แด จ ม โอ วี่ง ซี๊ง พี่ อี้ง.
[18] เอ๊ จ ม ไท้ ฌู จ แพ่. จ ม โล้ เอะ-อ้ะ บี่ อี้ง "แพ่-เอ้อ จ แม้ ไพ้ะ แบ กแช่ แยว้ ดี๊ แม้ ไพ้ะ แบ แน้ เย้า.
[19] ล เกิ้ง ล้า แบ พี่ โพล้ง ม กุ้ แย้ เก น พู. เกม๊า จ เก บี่ ซุ้ น เพล่ ล โค๊".
[20] ฌ้อง อ เว๊ เฌ้เทิง ทาง ไท้ ฌู อ แพ่ ไวะ. พี่ อ ไท้ ล คลึ้ ท้อง ได้ะ แบ นอ อ แพ่ แด ฌู จู้-อ้ะ ย๊างเซิง ย๊างซ้ะ แบ เว๊ ปชื่ง ลี้ ซยู๊ พอง โฌ๊ง น๊าม๊า เว๊.
[21] อ พูแคว๊ ล แฌ้ นอ ไคล้ ดี๊ อ แพ่ บี่ อี้ง 'แพ่-เอ้อ จ แม้ ไพ้ะ แบ กแช่ แยว้ ดี๊ แม้ ไพ้ะ แบ แน้ เย้า. ล เกิ้ง ล้า แบ พี่ โพล้ง ม กุ้ แย้ เก น พู'.
[22] แบ เด้าะ อ แพ่ อางแม้เลา อ เพล่ บี่ อี้ง 'ลี้ เมะ เพล แม้ นี่ ไช๊แค่ พ้ะโท๊ ลู่ง อ ฌี้ ทึ ล เบง ดึ้ ซุ้ ทาง เอะ-อ้ะ. แม้ นี่ จูงไซ้ะ ดึ้ ซุ้ ทาง-อ้ะ ลู่ง อ จูง ล้อง ดี๊ แม้ นี่ คางไพ้ะ ดึ้ ไย่ ทาง-อ้ะ.
[23] ฌ้อง ลี้ แม้ นี่ งู้ พู ลู่ง อ บอง ทึ ล ดื้ง นอ แม้ ซี๊ง อาง-อ้ะ. เกม๊า ก ลื่ง อาง ลื่ง โอ้ โละ ซ้ะ.
[24] อ ไฌ่ บี่ อี้ง จ พูแคว๊ ล แฌ้ โย้ ซี๊ง เย้า ม๊า ทาง ไท้ เด้าะ ล้างแม่ พลุ้ เย้า แด ไท้ เด้าะ'. ฌ้อง อ ซื๊ง เว๊ ซีง ลื่ง อาง ลื่ง โอ้ โละ ซ้ะ โอ ดี๊ ท ซ้ะอวีง ซ้ะโทะ มึ มะ ล้อ.
[25] เมะ อ พู วี่แซย่ ล แฌ้ นอ โอ ลู่ง ฆึ้ พ้า. พี่ อ เว๊ เฌ๊ ไท้ เบ้า ทาง ดี๊ เด้า นอ อ เว๊ แน่ฌ๊า โพล้ง ซ้ะอวีง แท๊ ดี๊ เฌ้เทิงลี่ง.
[26] อ เว๊ กุ้ นี่ อ เพล่ ล แฌ้ อางจ้ะ เว๊ บี่ อี้ง 'โพล้ง แม้ ท เม้ง เล้ นอ'.
[27] อ เพล่ ไคล้ ช๊า-อ้ะ 'น พื่ง เฌ๊ ไท้~ๆ เย้า. น แพ่ เกม๊า โพล้ง แม้ ซี๊ง งู้ พู บอง ทึ ล ดื้ง เมะ เว๊ นี่ ไท้ อ พูแคว๊ พี่ อ เท่อ ล แบ ท น่าง เม้ง แบ นอ'.
[28] อ โจ้ แน่ฌ๊า บี่ นอ อ ซ้ะทาง เต้~ๆ ล นย่อง ไท้ ฆ้าง เด้า พ้า แบ. อ แพ่ ไจ ทาง อางโฆ อางแย๊-อ้ะ เกม๊า อ ไท้ นึ ฆ้าง เด้า พ้า.
[29] อ เว๊ ไจ้ะ เอะ อ แพ่ บี่ อี้ง 'จ แม้ เอะ น เท่อ แอ เนง แอ แล้ บี่ ซุ้ จ เก น ฆ่อง. จ ล ลือ แน้ น่าง พ๊า แบ. แบ เด้าะ น ล เกล๊าง แย้ ท น่าง เม้ง แบ ทึ เมะ แมะ พู ล ดื้ง ฌี้~ๆ พี่ จ ม ลื่ง อาง ลื่ง โอ้ จ ฌุ้เม้ง ฌุ้พาง นอ น ล เกล๊าง แย้ แบ.
[30] แบ เด้าะ น พูแคว๊ ล แฌ้ นอ โละ น คอง น แซย้ เลา ปะ ไจ ดี๊ กมืง กม้า. พี่ อ เว๊ เฌ๊ ไท้ นอ น แม้ ซี๊ง งู้ พู ลู่ง อ บอง ทึ ล ดื้ง ลื่ง อาง-อ้ะ ล โค๊'.
[31] อ แพ่ ไคล้ ช๊า-อ้ะ 'พู-เอ้อ น โอ ดี๊ แย้ ลู่ง เด้า ครึ~ๆ. พี่ แพ่ อ เท่อ โอ กุ้ อ เม้ง นอ เก นี๊ แด เลา ปะ ล้อ.
[32] แบ เด้าะ เกิ้ง ก ม ลื่ง อาง ลื่ง โอ้ โละ ซ้ะ ดี๊ ซ้ะอวีง ซ้ะโทะ เมะ เว๊ น พื่ง แคว๊ นอ ซี๊ง เย้า ม๊า ทาง ไท้ ล้างแม่ พลุ้ ฌ้อง แด ไท้ เด้าะ' ".