[1] ท เอิ้งล้าง พี่ ก ม นึ ฆ้าง ลู่ง กแช่ แยว้ อ ล่าง โอ ไปว้ะ โอ แซ ซี นอ โอ ได้ะ. ท บี่ นอ เกม๊า น ซื๊ง ปโล่ ล้าง ซ้ะ บี่ ซุ้ โพล้ง ลู่ง น ซื๊ง แกล้ ล โอ น่าง แฌ้ แบ พี่ กแช่ แยว้ ม แคว่ เว๊ ล นี่ นึ ฆ้าง ลู่ง ท ล่าง โอ ไปว้ะ โอ แซ อี้ง แบ.
[2] ก เว๊ ก แน่ฌ๊า ท ฌี้ อ ไฌ่ บี่ ซุ้ ดี๊ อ ซื๊ง เว๊ ซีง ปะ. แบ เด้าะ โพล้ง พี่ อ แน่ฌ๊า เว๊ ล แพ นอ ล นี่ แบ อ บลึ้ น่าง เม้ง แบ เป๊งนี่ ล ฮะ นี่ เว๊ ดี๊ ท ชู่ง ท นะ แบ.
[3] เมะ ก เว๊ แด พี่ ก ท ชู่ง ท นะ โอ นอ ก นี่ นึ ฆ้าง ลู่ง ท ล่าง โอ ไปว้ะ โอ แซ พี่ กแช่ แยว้ เอิ้งล้าง เว้ เว๊ นอ บี่ ซุ้ อ เว๊ ไจ้ะ เว๊ "จ ซ้ะทาง จ อืงล้าง เท่อ บี่ อี้ง จ ไจ้ะ อ ซื๊ง เว๊ ล นี่ นึ ฆ้าง ลู่ง จ ล่าง โอ ไปว้ะ โอ แซ น่าง พ๊า แบ". กแช่ แยว้ ไคล้ บี่ อี้ง ทึ เมะ อ เว๊ แม้ ชิ้เทา อ ท ไพ้ะ ท แม้ ลู่ง อ ไต้ ล้าง ฌางคู โคล๊ง คู เย้า นอ.
[4] ไละ ฌี้ ไละ แอว้ โอ ล โท้ แบฆ้ะ ดี๊ มื่ง เนว๊ นี้ง ล นี้ง ไจ้ะ เว๊ บี่ อี้ง "ลู่ง มื่ง เนว๊ นี้ง ล นี้ง นอ กแช่ แยว้ โอ ไปว้ะ โอ แซ แด ไฆวะ อ ท ไพ้ะ ท แม้ เลา ปะ".
[5] แบ เด้าะ ลู่ง อ พ้อง ไฆวะ ล โท้ นอ ไจ้ะ เว๊ "อ ซื๊ง เว๊ ล นี่ นึ ฆ้าง ลู่ง จ ล่าง โอ ไปว้ะ โอ แซ น่าง พ๊า แบ".
[6] โพล้ง พี่ อ แน่ฌ๊า วี่ง แบ ท ฌี้ อ ไฌ่ ล แพ นอ ล นี่ นึ ฆ้าง ท ล่าง โอ ไปว้ะ โอ แซ แบ เป๊งนี่ ล ชู่ง ล นะ เท่อ แบ แบ เด้าะ โพล้ง อ แฌ้แพ โอ ได้ะ พี่ ม นี่ นึ เว๊.
[7] ท บี่ นอ กแช่ แยว้ อางกี ล้าง เว๊ ล นี้ง เด้าะ กุ้ เว๊ % "ล นี้ง แย๊ อี้ง". พ้อง ไฆวะ ตบลึ้ ชู้ ตบลึ้ ชะ อ เว๊ เกม๊า จ๊าวแพเดง ดาเว ไคล้ เท่อ พี่ ก เฆว้ง แบ-อ้ะ เย้า ไจ้ะ เว๊ บี่ อี้ง "ล นี้ง แย๊ อี้ง น ซื๊ง เมะ แน่ฌ๊า กแช่ แยว้ อ ลู่ง เซ๊ นอ เกม๊า น โน้ง ตาง แน่ ตาง ล ฌี้".
[8] โยชูวา ลี้ ฌ้า โพล้ง ลู่ง ท ล่าง โอ ไปว้ะ โอ แซ เมะ ซี นอ ลู่ง ไค๊ กแช่ แยว้ ล แบ ไคล้ แบฆ้ะ ดี๊ มื่ง นี้ง อ แฌ้แพ แบ.
[9] ท บี่ นอ กแช่ แยว้ อ พู อ ลี้ง อ มื่ง นี้ง โอ ไปว้ะ โอ แซ ม โอ ได้ะ บี่ ซุ้ อ เว๊ โอ ไปว้ะ ลู่ง มื่ง เนว๊ นี้ง ล นี้ง.
[10] อ ไฌ่ บี่ อี้ง โพล้ง พี่ อ นึ ฆ้าง ลู่ง กแช่ แยว้ อ ล่าง โอ ไปว้ะ โอ แซ นอ อ เว๊ ม โอ ไปว้ะ ไฆวะ ดี๊ อ ท ไพ้ะ ท แม้ บี่ ซุ้ ดี๊ กแช่ แยว้ โอ ไปว้ะ ไฆวะ ดี๊ อ ท ไพ้ะ ท แม้ นอ ปะ.
[11] ท บี่ นอ เกม๊า ก เฌาโละ แม้-อ้ะ เมาน่าง พี่ ก ม นี่ นึ ฆ้าง ลู่ง ท ล่าง โอ ไปว้ะ โอ แซ อี้ง บี่ ซุ้ โพล้ง ลู่ง ก แกล้ ล โอ น่าง แฌ้ แบ พี่ ล นี่ นึ ฆ้าง เว๊ แบ บี่ ซุ้ อ ซื๊ง เว๊ ลู่ง เอะ อู้ นอ เป๊งนี่ ล ชู่ง ล นะ เท่อ แบ.
[12] กแช่ แยว้ อ ลู่ง อ แท๊ นอ โอ ม๊า โอ ดี๊ อ ซยื๊ง อ ซย้อง ไอ ฌี้ นี่ น้ะ พี่ อ แน่ ไอ คี๊ง แพ้ ชิ้ เท่อ นึ โยะ ล โยะ นอ ท้อง ลู่ง ม อางน้าง พ้ะ เซิง ซ้ะ ดี๊ วีง แล้ ดี๊ อางน้าง พ้ะ ฆีง ดูโมะ ดี๊ ฆีง อ คี่ง อ ซอง ดี๊ ต้ะเซ๊ง โพล้ง อ ท ช๊องมอง ดี๊ อ ท แบ ซ้ะ.
[13] ท ล โอ น่าง เม้ง แบ พี่ ม อางกี ซูง ไฆวะ อ ซ้ะ ดี๊ กแช่ แยว้ ซี แบ เด้าะ ท กุ้ อ เม้ง พี่ กแช่ แยว้ ไต้ ล้าง เว๊ นอ โพล ทาง เติ้งต้าง ลู่ง อ เมะแซ พ้า ดี๊ อ เว๊ ล้อ พี่ เฆ้อ กุ้ แฌ้ ก แบ โล้ ล้าง ซ้ะ ดี๊-อ้ะ.
[14] ก โอ ดี๊ แยว้ อ คู ดู ทึ ล แฌ้ พี่ อ ลี้ ลู่ง มุ้คู โท๊ ทึ เมะ เว๊ กแช่ เยซู กแช่ แยว้ อ พูแคว๊. ท บี่ นอ เกม๊า ก โอ เฌิ่ง โอ ค๊า ลู่ง ก ท ทื๊ง ท นะ พี่ ก ทื๊ง-อ้ะ.
[15] แยว้ อ คู ดู ทึ ล แฌ้ อี้ง เก โพล้ง ลู่ง อ ย๊างเซิง ย๊างซ้ะ เฆ้อ พี่ ก เซิง แช่ ซ้ะ แช่ นอ ล้อ เมะ เว๊ อ เว๊ แบ ท ลองดุ้ อ ซ้ะ บี่ ซุ้ เฆ้อ กุ้ อ เม้ง แบ เด้าะ อ ท เด้บ้ะ ล โอ แบ.
[16] ท บี่ นอ เกม๊า ก โอ ดี๊ เซิง เบิง ซ้ะ เบิง พี่ ม ลี้ ลู่ง กแช่ แยว้ อ เมะแซ พ้า ลู่ง อ โอ ดี๊ อ โก้ง อ โบ้ง อ บลึ้ อ บลาง บี่ ซุ้ ก ม นี่ แบ อ ท ย๊างเซิง ย๊างซ้ะ ดี๊ อ บลึ้ อ บลาง ลู่ง ม แม้ช้า เฆ้อ พี่ ล โท้ แย๊ ก แบ ซ้ะ-อ้ะ นอ ล้อ.