[1] เซ๊งพ้า ท้างพ้า นอ เก บี่ ซุ้ ท อ ฌี้ พี่ ม เฌ๊ โคะ อ กดื้งแล้ ล เมะ เก ท ล๊า~ๆ ฆวี้~ๆ แบ. ทึ เมะ ท ลื่ง ทาง แบ ท เทว๊-อ้ะ กุ้ อ เนง ฌี้~ๆ เซ๊งพ้า ท้างพ้า แม้ กู้ง แม้ ล๊า โพล้ง พี่ อ เฌ๊ เทว๊ เว๊ ลู่ง กแช่ แยว้ อ เมะแซ พ้า นอ ล ซี น่าง ชุ้ แบ เฆาะ.
[2] แม้ กู้ง แม้ ล๊า เว๊ เมะ ซี นอ โพล้ง ล ลื่ง ทาง เท่อ ล้า แบ ล เมะ แบ-อ้า. อ ไฌ่ บี่ อี้ง โพล้ง พี่ อ ลี้ โบง ทาง แบ้ ทาง เท่อ ล แพ นอ เมะ พ้อง ไฆวะ ดี๊ อ ท เด้บ้ะ ล พ๊า เย้า นอ อ ซื๊ง เว๊ ล แบ มอง แบ ม้ะ ลู่ง อ ท เด้บ้ะ อ กย้อง ล้า แบ.
[3] แบ เด้าะ ท ลื่ง ทาง นอ เกม๊า โพล้ง นาง แบ ไท้ อ ท เด้บ้ะ กุ้ อ เนง
[4] เมะ เว๊ งู้ แพ๊ ดี๊ แมะ อ ซวีง นอ แม้ ไฆวะ โพล้ง อ ท เด้บ้ะ ล ซี น่าง เม้ง แบ เฆาะ.
[5] ท บี่ นอ พี่ กแช่ เยซู คริ้ เฌ๊ ล้าง ลู่ง ฌางคู โคล๊ง คู อ เว๊ ไคล้ ดี๊ กแช่ แยว้ บี่ อี้ง "ท ลื่ง ทาง ดี๊ ท โบง ท แบ้ นอ น ล แบ ซ้ะ-อ้ะ แบ แบ เด้าะ น แด้ เว้ เอะ จ ล้อง จ ย่าง.
[6] ท ลื่ง ทาง พี่ อ แบ ท เช้า-อ้ะ ดี๊ ท ลื่ง ทาง พี่ อ แม้ ไฆวะ ท เด้บ้ะ นอ ล แบ น ซ้ะ แบ.
[7] ฌ้อง จ ไจ้ะ บี่ อี้ง กแช่ แยว้-เอ้อ จ โอ พี่ อี้ง เย้า บี่ ซุ้ แบ ท กวิ้ ล้าง เว้ เว๊ แบฆ้ะ ดี๊ แย้ ลู่ง ไละ ทื๊ง พ้า จ เฌ๊ พี่ ม แม้ เท่อ ลู่ง อ แบ น ซ้ะ นอ".
[8] อ วี่งคู นอ กแช่ เยซู ไจ้ะ บี่ อี้ง "ท โบง ท แบ้ ดี๊ ท ลื่ง ทาง ท ลื่ง ทาง พี่ อ แบ ท เช้า-อ้ะ ดี๊ ท ลื่ง ทาง พี่ อ แม้ ไฆวะ ท เด้บ้ะ นอ ล แบ น ซ้ะ แบ น ล เอ ดุ้-อ้ะ แบ". อ เว๊ ไจ้ะ บี่ นอ ทึ เมะ ท โบง ท แบ้ ล แพ อี้ง เซ๊งพ้า ท้างพ้า อางแม้เลา เว๊ ฌี้~ๆ
[9] ฌ้อง ไจ้ะ เว๊ บี่ อี้ง "จ โอ พี่ อี้ง เย้า จ เฌ๊ พี่ ม แม้ เท่อ ลู่ง อ แบ น ซ้ะ นอ". ท บี่ นอ กแช่ เยซู แม้ ไฆวะ ท ลื่ง ทาง ดี๊ ท โบง ท แบ้ อ คางไท้ะ บี่ ซุ้ ม แม้ ทาง ไท้ เว๊ อ ซ๊าง.
[10] ลู่ง อ เว๊ แม้ เท่อ แบ กแช่ แยว้ อ ซ้ะ อ กย้อง นอ เฆ้อ กุ้ อ แฌ้ แบ ท แม้ เช๊ง แม้ เกล้ง แม้ ฌี้ แม้ แอว้ พี่ อ เว๊ เทว๊ ล้าง อ ล้อง อ ย่าง ล พ๊า ล้อ.
[11] แยว้ คู กุ้ อ แฌ้ ชี๊เทิง แม้ แยว้ คู อ ท ไพ้ะ ท แม้ กุ้ มื่ง นี้ง เฌ๊ โชะ ดี๊ ท ลื่ง ทาง ล เม้ง ฆ่าง ตบลึ้ พ๊า. แบ เด้าะ ท ลื่ง ทาง ล แพ อี้ง แม้ ไฆวะ โพล้ง อ ท เด้บ้ะ ล ซี น่าง เม้ง แบ เฆาะ.
[12] เมะ กแช่ เยซู นอ เทว๊ ล้าง อ ซ้ะ เก ท ลื่ง ทาง เท่อ ลู่ง โพล้ง อ ท เด้บ้ะ อ ฌ่าง ล พ๊า ล้อ เก ท ลื่ง ทาง พี่ อ แม้ ไฆวะ โพล้ง อ ท เด้บ้ะ ล้างชู้ ล้างแกย ฌ้อง อ เว๊ ชี๊น้าง โอ ลู่ง กแช่ แยว้ อ จูง ฆุ้ ล โค๊.
[13] ค๊องเนง อี้ง อ เว๊ โอ คุ้ แคว่ เท่อ พี่ นอ ท้อง กแช่ แยว้ ม อางกี โพล้ง แช๊เมะ ไฌ๊ซ้ะ ดี๊-อ้ะ ลู่ง อ คาง พ๊างละ.
[14] ลู่ง ท ลื่ง ทาง ล เม้ง ล้อ อ กย้อง นอ อ เว๊ ดึ้ เกม๊า โพล้ง พี่ อ แบ ท แม้ เช๊ง แม้ เกล้ง แม้ ฌี้ แม้ แอว้ เย้า ล แพ นอ โอ กู้ง โอ ล๊า ล้างชู้ ล้างแกย ล้อ.
[15] วีง ฌี้ แล้ แอว้ เก เอะ ก พีงนยาง ปะ อ วี่งคู โล้ ล้าง กแช่ แยว้ อ ท ไคล้ บี่ อี้ง
[16] "อ อี้ง เก ท เอิ้งล้าง พี่ จ ม แม้-อ้ะ ดี๊ อ ซื๊ง เว๊ ลู่ง ไค๊ ล โค๊ นอ เมะ เว๊ จ ม แม้ นี่ เซ๊งพ้า ท้างพ้า อางกี ล้าง-อ้ะ ลู่ง อ เซิง พ้า ซ้ะ พ้า ดี๊ จ ม กวิ้ไน-อ้ะ ลู่ง อ ซ้ะ ล้อง".
[17] ฌ้อง กแช่ แยว้ โล้ เว๊ บี่ อี้ง เด้าะ "จ ล นาง แบ อ ท เด้เทา เด้บ้ะ ดี๊ อ ท ลือ ค๊างพะ น่าง พ๊า ล้า แบ".
[18] ท บี่ นอ พี่ กแช่ แยว้ ล ทื๊ง นี่ นะ นี่ โพล้ง อ ท เด้บ้ะ ล้า แบ นอ ท โบง ท แบ้ พี่ ม แม้ ไฆวะ โพล้ง อ ท เด้บ้ะ นอ ล แบ เทว๊-อ้ะ ล้า แบ.
[19] ด๊างพื่งวี่ ซีง-เอ้อ ลู่ง กแช่ เยซู อ ซวีง เก ท โบง ท แบ้ อ กย้อง นอ ก ลี้ นึ ลู่ง ท ฌี้ ทึ แอว้ ทึ อ ล่าง เบิง.
[20] อ เว๊ อุ้พ้ะ เอะ ก เกล้ อ ซ๊าง เก เกล้ พี่ อ เกล๊าง ท ม๊า ลี้ นึ แบ ตไก้ยะ อ เช้า พ้า. ตไก้ยะ นอ เมะ เว๊ กแช่ เยซู อ ล้อง อ ย่าง.
[21] ก โอ ดี๊ แยว้ อ คู ดู ทึ พี่ อ ยู่แคว่ กแช่ แยว้ อ เด้า อ ล่าง ลู่ง มุ้คู.
[22] ท บี่ นอ เกม๊า ก เฌ๊ โอ เบ้า ดี๊ กแช่ แยว้ ลู่ง ก เซิง โต้ ซ้ะ ล้อง ดี๊ ท ชู่ง ท นะ เฌิ่ง~ๆ ค๊า~ๆ ดี๊ ก เซิง ก ซ้ะ พี่ อ แบ ท แม้ เช๊ง ไฆวะ-อ้ะ เย้า ฌ้อง ซีงแฌ๊ ล้าง ซ้ะ ท ไพ้ะ ท แม ล โอ ล้า แบ ดี๊ ก ล้อง ก ย่าง พี่ อ แบ ท อางซฌ้ะ ไฆวะ-อ้ะ ดี๊ ที๊ง ฌี้ ที๊ง แอว้.
[23] เกม๊า ก โอ เฌิ่ง โอ ค๊า ดี๊ ก ท มื้งแล่ พี่ ก โล้ ล้าง-อ้ะ นอ อ ไฌ่ บี่ อี้ง กแช่ แยว้ พี่ อ เอิ้งล้าง เอะ ก เท่อ นอ เก โพล้ง โต้ โพล้ง ล้อง.
[24] เกม๊า ก ช๊องมอง เก้อะเร้อะ ดุ้-อ้ะ ม แม้ ก้ะ บี่ จะ เล้ พี่ ก ม แม้ช้า โพล้ง เกม๊า อ เอ โละ กวี้ง โละ ซ้ะ ดี๊ แม้ ท อ ฌี้ แอ ทาง.
[25] แบ แฌ้~ๆ ล เฌ๊ โอ ซยอง ล้า แบ แบ เด้าะ เกิ้ง ก แบ เฌ๊ โอ ซยอง โละ ซ้ะ. เกม๊า ก แม้ มึ ทาง ชอง ทาง โละ ซ้ะ แอ ทาง แอ ทาง อ ไฌ่ บี่ อี้ง น ซื๊ง ซีงแฌ๊ เย้า มื่ง นี้ง พี่ กแช่ เยซู คริ้ ม ต้ะเซ๊ง เท่อ นอ เฌ๊ เบ้า ม ท้อง เย้า.
[26] ก เมะ ซีงแฌ๊ แน่ฌ๊า แบ ท อ ที๊ง อ โต้ เย้า แบ เด้าะ ก อางกี ล้าง ซ้ะ แม้ ท เด้บ้ะ ได้ะ ท ลื่ง ทาง พี่ ม แม้ ไฆวะ ท เด้บ้ะ นอ ล โอ ล้า แบ.
[27] โอ ก้ะ ที่ ท คุ้แท๊ ดี๊ ท ซ้ะเม ซ้ะไพล้ กแช่ แยว้ อ ท ต้ะเซ๊ง โคะ ดี๊ มี คู่เล้า คู่ล๊าง พี่ ม แม้ เตา แม้ แต๊ โพล้ง พี่ อ แม้ ไทะทะ กแช่ แยว้.
[28] โพล้ง พี่ ล แม้ โพะ โมเซ อ เซ๊งพ้า ท้างพ้า อ ไค๊ แบ นอ อ พีงนยาง เมะ โอ คี๊ง แฌ้ ซ๊า แฌ้ นอ อ เว๊ ม แบ ท แม้ ซี๊ง-อ้ะ. ท ย๊างเซิง ย๊างซ้ะ แบ-อ้ะ ล โอ แบ เฆาะ.
[29] โพล้ง พี่ อ ไย่เละ ค๊างพะ กแช่ แยว้ อ พูแคว๊ ดี๊ แคว่ เว๊ อ ซวีง พี่ อ เท่อ แม้ เช๊ง แม้ เกล้ง-อ้ะ บี่ ซุ้ กแช่ แยว้ เอิ้งล้าง เว้ เว๊ นอ เก ท ล กลุ้ ล จ้ะ แบ ดี๊ ดึ้เดว ทื่งแช้ วีง ฌี้ แล้ แอว้ พี่ อ โอ ดี๊ อ โก้ง อ โบ้ง อ บลึ้ อ บลาง นอ ช๊องมอง ดุ้ แฆว่ โพล้ง ล แฌ้ นอ เกิ้ง ม แบ ท แม้ เตา แม้ แต๊-อ้ะ น้ะ เมาะ ท เล้.
[30] ก ซีงแฌ๊ กแช่ แยว้ เย้า พี่ อ ไจ้ะ เว๊ % "แย้ จ ม แม้ แก ไท้ ท อ้า ท ซ๊าง. แย้ จ ม แม้ ช๊า ไท้-อ้ะ" ดี๊ ไจ้ะ เว๊ เด้าะ บี่ อี้ง % "กแช่ แยว้ ม ต้ะเซ๊ง อ พู อ ลี้ง".
[31] กแช่ แยว้ พี่ อ โอ ม๊า ครึ~ๆ ล แฌ้ นอ โพล้ง เมะ ล้าง โอ แบ เว๊ อ ดู้ง อ ยาง อ พ๊างละ นอ ม ล้าง ซ้ะเม ซ้ะไพล้ เต้~ๆ.
[32] ช๊องมอง ล้าง ไท้ น ซื๊ง ซ้ะ ลู่ง อ พ้อง ไฆวะ นอ แม้ อ ซ้ะ บี่ จะ เล้. พี่ น ซื๊ง ชู่ง ไท้ นะ ไท้ กแช่ เยซู อ ซ๊างคู นอ น แบ โท่ง ท น้ะ ท โน๊ง ท แก ท เฌ้ แอ เม้ง.
[33] แบ พ๊า~ๆ น ซื๊ง แบ ท ดึ้เดว ทื่งแช้ ดี๊ แบ ท แม้ น้ะ แม้ โน๊ง ลู่ง โพล้ง อ เมะแซ พ้า. แบ พ๊า~ๆ เด้าะ น ซื๊ง ลี้ โอ แบ ดี๊ โพล้ง พี่ อ แบ ท แม้ น้ะ แม้ โน๊ง บี่ นอ.
[34] น ซื๊ง โท่ง ฆึ ท น้ะ ท โน๊ง ดี๊ โพล้ง แบซุ้. โพล้ง เมะ ตมละ นี่ น ฆ้า น โฆ่ เลา ปะ นอ น นย่อง เกล๊าง-อ้ะ ดี๊ ท เซิง มึ ซ้ะ มึ อ ไฌ่ บี่ อี้ง น ซีงแฌ๊-อ้ะ เย้า น โอ ดี๊ เท่อ พี่ อ ฌี้ นี่ อ นอ ได้ะ พี่ ม โอ ครึ~ๆ.
[35] ท บี่ นอ เกม๊า น เซิง ล้างท่อง ซ้ะ ล้างท่อง ล ฌี้ อ ไฌ่ บี่ อี้ง น เซิง เฌิ่ง ซ้ะ ค๊า ม เกม๊า น โอ ดี๊ ท บลึ้ ท บลาง แอ~ๆ.
[36] น ซื๊ง แบ โอ โก้ง เท่อ บี่ ซุ้ น ม แม้ เท่อ พี่ อ แบ กแช่ แยว้ อ ซ้ะ ดี๊ ม นี่ แบ เท่อ พี่ กแช่ แยว้ เอิ้งล้าง เว้ เว๊
[37] บี่ ซุ้ ไละ ฌี้ ไละ แอว้ โล้ เว้ เว๊ "ล ไยะ ล้า แบ โพล้ง พี่ ม เฌ๊ ล แฌ้ นอ ม เฌ๊ เต้~ๆ ล โกย้~ๆ แบ.
[38] โพล้ง พี่ อ แบ กแช่ แยว้ อ ซ้ะ นอ ม โอ ม๊า ดี๊ อ ท ชู่ง ท นะ ล้อ แบ เด้าะ อ เว๊ เมะ แกย ไฆวะ อ ซ้ะ ดี๊ แย้ นอ จ ล เฆว๊ ซ้ะ ดี๊ โพล้ง ล แฌ้ นอ ล้า แบ".
[39] ก เว๊ แด ล เมะ ก เก โพล้ง พี่ อ แกย ไฆวะ ซ้ะ ดี๊-อ้ะ ฌ้อง ล้าง แบ เตา แบ แต๊ นอ แบ. แบ เด้าะ ก เก โพล้ง พี่ อ โอ ดี๊ ท ชู่ง ท นะ ดี๊ ม นี่ แบ ท พ้อง ท พลิ้ นอ ล้อ.