[1] Si henn di Bundes-Lawt funn Gott rei gebrocht in da tent es da Dawfit uf gedu katt hott fa see, un henn brand-opfahra un dank-opfahra gopfaht fannich Gott.
[2] Vo da Dawfit faddich voah brand-opfahra un dank-opfahra macha, hott eah di leit ksaykend im Hah sei nohma.
[3] No hott eah en layb broht, en shtikk flaysh un en boddel vei gevva zu alli mann un fraw in Israel.
[4] Eah hott samm funn di Lefiddah eiksetzt fa deena fannich di Bundes-Lawt fumm Hah. Si henn sella preis, dank un lohb gevva zumm Hah, da Gott funn Israel.
[5] Dee mennah voahra: Da Asaph, da evvahsht; da Sacharia da zvett evvahsht, no voah's da Jeiel, da Semiramoth, da Jehiel, da Matthithia, da Eliab, da Benaia, da Obed-Edom un da Jeiel mitt grohsi un glenni harfa, un da Asaph mitt cymbals.
[6] Di preeshtah Benaia un Jahasiel henn sella di blohs-hanna blohsa fannich di Bundes-Lawt funn Gott di gans zeit.
[7] Sellah dawk hott da Dawfit's eahsht moll em Asaph un sei freindshaft dess dank-leet zumm Hah gevva:
[8] Gevvet dank zumm Hah, un roofet sei nohma oh; fakindichet unnich di heida vass eah gedu hott.
[9] Singet zu eem, yau, singet un preiset een; sawwet veyyich awl sei vundahboahri verka!
[10] Hallichet sei heilichah nohma; losset di hatza funn selli es da Hah sucha sich froiya.
[11] Suchet da Hah un sei graft; suchet sei ksicht immah.
[12] Denket an di vundahboahri verka es eah gedu hott, un an di zaycha un gerichta aus seim maul.
[13] Oh diah sohma funn Israel, Gott sei gnecht, diah kinnah fumm Jakob, sei raus-groofeni.
[14] Eah is da Hah unsah Gott; eah richt in di gans veld.
[15] Denket an sei bund fa'immah, es vatt es eah gevva hott fa en dausend layves-zeida,
[16] sell bund es eah gmacht hott mitt em Abraham, un vass eah kshvoahra hott zumm Isaac.
[17] Eah hott's gezeikt un fesht gmacht zumm Jakob fa en adning, un zu Israel fa en ayvich bund,
[18] un hott ksawt, “Ich gebb eich's land funn Kanaan, es es dayl fa eiyah eahbshaft.”
[19] Vo si noch vennich voahra in nambah, un fremd voahra im land,
[20] sinn si rumm gloffa funn aym folk zumm anra, un funn aym kaynich-reich zumm anra.
[21] Eah hott nimmand glost si nunnah dredda; fa iahra sayk hott eah kaynicha gezankt,
[22] un hott ksawt, “Layyet di hand nett uf mei ksalbdi; doond kenn shawda zu mei brofayda.”
[23] Singet zumm Hah, alli lendah, breddichet sei saylichkeit alli dawk.
[24] Fazaylet veyyich sei hallichkeit unnich di heida, un veyyich sei vundahboahri verka unnich awl di leit.
[25] Da Hah is grohs, un is es veaht fa glohbt sei; un eah soll kfircht sei ovvich alli gettah.
[26] Fa awl di gettah funn di heida sinn abgettah, avvah da Hah hott di himla gmacht.
[27] Hallichkeit un kaynich-eah sinn fannich eem; graft un fraylichkeit sinn in seim tempel.
[28] Gevvet zumm Hah, awl diah leit funn di heida, gevvet hallichkeit un graft zumm Hah,
[29] gevvet zumm Hah di hallichkeit es zu sei nohma heaht; bringet en opfah un kummet fannich een; lohvet da Hah in seim heilicha glitz.
[30] Di gans veld soll ziddahra fannich eem! Di eaht is fesht gegrund, un kann nett gmooft sei.
[31] Losset di himla sich froiya, un di eaht fraylich sei; loss si sawwa zu di heida, “Da Hah is kaynich!”
[32] Losset da say roahra, un alles es drinn is; losset di feldah fraylich sei, un alles es drinn is!
[33] No doon awl di baym im bush singa, si singa mitt frayt fannich em Hah, fa eah kumd fa di eaht richta.
[34] Gevvet dank zumm Hah, fa eah is goot; sei shtandhaftichi-leevi bleibt fa'immah.
[35] No sawwet, “Mach uns saylich, oh Gott, unsah Heiland; fasammel uns un mach uns frei funn di heida, so es miah dei heilichah nohma danka, un dei hallichkeit lohb gevva.”
[36] Lohb sei zumm Hah, da Gott funn Israel, funn ayvichkeit zu ayvichkeit. No henn awl di leit ksawt, “Amen” un “Lohb sei zumm Hah.”
[37] Da Dawfit hott da Asaph un sei freindshaft datt glost fannich di Bundes-Lawt fumm Hah fa datt deena di gans zeit, so vi's sich kfoddaht hott alli dawk.
[38] Eah hott aw da Obed-Edom un sex un achtzich funn sei freindshaft datt glost fa deena mitt eena. Da Obed-Edom, em Jedithun sei boo, un da Hosea voahra doah-heedah.
[39] Da Dawfit hott da preeshtah Zadok un aw di preeshtah es in sei freindshaft voahra in Gibeon glost. Datt voahra si fannich em fasamling-tent uf em hohcha blatz
[40] fa brand-opfahra brenna zumm Hah uf em brand-opfah awldah alli dawk, meiyets un ohvets. Dess voah fa alles ausdrawwa vass kshrivva is im Ksetz fumm Hah es eah gevva hott zu Israel.
[41] Bei eena voah da Heman un da Jedithun, un aw di anra es groofa voahra un es gnohmd voahra. Si voahra datt fa da Hah danka veil sei shtandhaftichi-leevi ayvichlich is.
[42] Da Heman un da Jedithun voahra di ivvah-saynah fumm singes un shpeeles mitt di blohs-hanna un cymbals un anri sacha es gyoost voahra fa singa zu Gott. Em Jedithun sei boova voahra di doah-heedah.
[43] No sinn awl di leit zu iahra haymeda ganga un da Dawfit is haym ganga fa sei family saykna.