[1] Isa adhabu ka red-moredda, “Badha oreng sogi. Oreng jareya andhi' ponggaba kauwangan se ngoros dhi'-andhi'na. Oreng sogi jareya narema reppodan ja' ponggaba kauwanganna wang-mowang pessena.
[2] Daddi oreng jareya laju ngolok ponggaba kauwanganna buru, sarta ngoca', ‘Apa kabar se ekaedhing sengko' parkara ba'na reya? Sateya mara passra'agi ka sengko' laporan se genna' parkara se elakone ba'na e dhalem ngoros tang dhi'-andhi'. Ba'na ta' olle daddi ponggaba kauwanganna sengko' pole.’
[3] Ponggaba kauwangan jareya apekker, ‘Baramma sengko' sateya reya? Sengko' epaambuwa bi' tang lora. Alandhu' sengko' ta' kellar; aburumaena sengko' todhus.
[4] Sateya sengko' andhi' akkal; mon sengko' la epaambu, sengko' kodu andhi' kanca bannya' se endha' ngapolong sengko' e bengkona!’
[5] Daddi sakabbiyanna oreng se andhi' otang ka lorana bi' ponggaba kauwangan jareya eolok. Ka oreng se kapeng settong ponggaba jareya ngoca', ‘Saponapa otangnga sampeyan ka lora kaula?’
[6] Saodda oreng jareya, ‘Mennya' jaitun saratos pennay.’ Ponggaba jareya ngoca' pole, ‘Paneka' sorat otangnga sampeyan. Tore alenggi, pas toles: saeket.’
[7] Saellana jareya ponggaba buru ngoca' ka oreng se kapeng dhuwa', ‘Sampeyan, saponapa otangnga?’ Oreng jareya nyaot, ‘Gandum saebu karong.’ Ponggaba kauwangan jareya ngoca' pole, ‘Paneka' sorat otangnga sampeyan. Tore toles: ballung atos.’
[8] Daddi ponggaba kauwangan se ta' jujur jareya ealem bi' lorana polana lalakonna se penter jareya; sabab reng-oreng dunnya reya lebbi penter e dhalem ngator orosanna etembang bi' reng-oreng se odhi' e dhalem terrang.”
[9] Isa laju adhabu, “Mara edhingngagi! Angguy rang-barang e dunnya reya kaangguy nyare kanca, sopaja mon barang e dunnya reya la tadha' argana pole, me' olle ba'na etarema e kennengngan se langgeng.
[10] Oreng se ekenneng parcaja e dhalem parkara kene', ekenneng parcaja keya e dhalem parkara se raja. Tape oreng se ta' ekenneng parcaja e dhalem parkara kene' ta' ekenneng parcaja keya e dhalem parkara se raja.
[11] Daddi, mon e dhalem parkara rang-barang e dunnya reya bai ba'na la ta' ekenneng parcaja, sapa se parcaja'a massra'agi arta rohani ka ba'na?
[12] Ban mon ba'na etemmo ja' ta' ekenneng parcaja e dhalem parkara barangnga oreng laen, sapa se magiya ka ba'na pa-apa se ekaandhi' ba'na?
[13] Tadha' oreng se bisa alako ka lora dhadhuwa'; sabab oreng jareya tanto ataresna'an ka se settong etembang ban ka settonganna; otabana oreng jareya tanto aestowan ka lorana se settong etembang ban ka se settonganna. Bariya keya ba'na. Ba'na ta' kera bisa ngabdi ka Allah ban ka pesse.”
[14] E bakto reng-oreng Farisi ngedhing pa-apa se edhabuwagi Isa jareya, Isa laju ekala'-gella', sabab reng-oreng jareya lebur ka pesse.
[15] Tape Isa adhabu ka reng-oreng jareya, “Ba'na reya oreng se e adha'na oreng laen katon bendher, tape Allah ngagali essena atena ba'na. Sabab pa-apa se eanggep raja argana bi' manossa, e ajunanna Allah tadha' argana.
[16] Hokom se eajarragi Mosa ban pangajaranna bi-nabbi, teptep eangguy sampe' jamanna Yahya Pambaptis. Molae dhari jareya Kabar Bagus parkara baramma Allah marenta menangka Rato terros eberta'agi. Ban oreng maksa aba'na daddiya anggotana ommadda Allah.
[17] Tape agampangan langnge' ban bume mosna etembang ban mabattala settong aksara e dhalem Hokomma Allah.
[18] Pa'-sapa'a nellak binena laju abine babine' laen, oreng jareya azina. Ban oreng se ngabine babine' se etellak jareya, azina keya.”
[19] “Badha oreng sogi kasorang. Kalambina rang-larang, ban odhi'na re-saarena mewah.
[20] E adha'na labangnga bengkona badha oreng mesken, dhung-tedhungan e jadhiya; nyamana Lazarus. Oreng jareya bannya' porona.
[21] Lazarus terro ngakana gar-gaggarra kakanan dhari mejana oreng sogi jareya. La'-mala' pate' dhateng ajilat porona.
[22] Oreng se mesken jareya mate, laju egiba malaekat ka kennengngan se bagus e seddi'na Ibrahim e sowarga. Oreng se sogi jareya mate keya ban ekoburragi.
[23] E dunnyana oreng mate, oreng sogi jareya nanggung sangsara se talebat berra'na. Ban e bakto adhanga, laju nangale'e Ibrahim e jauna ban Lazarus neng e seddi'na.
[24] ‘Rama Ibrahim!’ oreng se sogi jareya aera'. ‘Kaneserre abdina. Pakonnagi Lazarus nyabbur garigi'na ka dhalem aeng, pakon seddingngagi ka jila abdina me' olle jila abdina bacca. Abdina ce' nyangsarana e dhalem apoy paneka!’
[25] Tape Ibrahim ngoca', ‘Kaenga'e, Na': saabidda ba'na odhi' e dunnya ba'na andhi' sakabbiyanna se gus-bagus, tape Lazarus pera' andhi' se ba'-juba'. Sateya Lazarus senneng badha e dhinna', dineng ba'na nyangsara e jadhiya.
[26] Ban pole e antarana ba'na ban sengko' epasange jurang se raja, sopaja oreng se badha e dhinna' ta' bisa entar ka jadhiya, bariya keya oreng se badha e jadhiya ta' bisa dha' enna'!’
[27] ‘Manabi sapaneka, Pa',’ ca'na oreng sogi jareya, ‘abdina nyo'ona kalaban sanget, Lazarus pakonnagi entar ka compo'na eppa' abdina.
[28] E ka'dhissa' badha taretan abdina kalema. Lazarus pakonnagi maemot eppa' sareng tan-taretan abdina gapaneka, sopaja ta' kantosa maso' ka kennengnganna seksa'an paneka.’
[29] Saodda Ibrahim, ‘Eppa' ban tan-taretanna ba'na la andhi' ku-bukuna Mosa ban bukuna para nabbi! Dina tan-taretanna ba'na me' olle atoro' apa se etoles e dhalem ku-buku jareya!’
[30] Tape oreng sogi jareya ngoca', ‘Gapaneka ta' cokop, Rama Ibrahim. Namong manabi badha oreng se ampon mate odhi' pole sarta ngaton ka tan-taretan abdina, tanto tan-taretan abdina gapaneka atobat dhari sa-dusana.’
[31] Tape Ibrahim ngoca', ‘Mon tan-taretanna ba'na jareya ta' marduli ka parentana Mosa ban bi-nabbi, tanto ta' kera parcaja keya maske badha oreng mate odhi' pole.’ ”