[1] E settong are Isa adu'a e settong kennengngan. Samarena, badha moredda se mator, “Guste, ngereng pona, abdina sakanca ka'dhinto' ajari adu'a akadi Yahya se morok red-moredda adu'a.”
[2] Dhabuna Isa, “Mon ba'na adu'a, ngoca' kantha reya, ‘Rama, Junandalem Allah se Settong. Moga Junandalem esemba sareng emolja'agi.
[3] Parenge abdidalem teddha'an se ekaparlo re-saarena.
[4] Parenge sapora sa-dusa abdidalem sadajana sabab abdidalem jugan ampon padha nyapora sadajana oreng se gadhuwan sala ka abdina. Abdidalem nyo'ona sopaja ta' kantosa kaelangan kaparcaja'an e bakto ecoba.’ ”
[5] Dhabuna Isa ka red-moredda, “Saompamana ba'na badha se entar ka bengkona kancana e baja tengnga malem, sarta ngoca', ‘Taretan, tore pona, kaula parenge ngenjam rotina tatello'.
[6] Sabab badha kanca kaula se teppa'na e dhalem parjalanan, nyepper ka compo', kaula ta' gadhuwan teddha'an pa-ponapa se eatorragiya!’
[7] Ompamana kancana ba'na se eentare jareya nyaot kantha reya dhari dhalem bengkona, ‘Ja' pot-marepot ka kaula! Labang ampon ekunci, kaula ban na'-kana' ampon tedhung. Kaula ta' bisa jaga ban ta' bisa ngatore pa-ponapa ka sampeyan.’ ”
[8] “Mon kantha jareya baramma?” ca'na dhabuna Isa pole. “Ba'na paparcaja, ya. Maske ba'na kancana, oreng jareya ta' endha' jaga kaangguy ari'-berri' ka ba'na. Tape sarrena ba'na ta' todhus ros-terrosan menta, oreng jareya tanto jaga, ban ba'na laju eberri'i pa-apa se ekabuto ba'na.
[9] Daddi, Sengko' ngoca'a ka ba'na: Menta, ba'na bakal eparengngana; nyare, ba'na bakal nemmowa; nokthok, ba'na bakal ebukka'ana labang.
[10] Sabab oreng se menta bakal narema'a; oreng se nyare bakal nemmowa, ban oreng se athokthok bakal ebukka'ana labang.
[11] E antarana ba'na se daddi eppa' ba' badha'a se aberri' olar ka ana'na mon ana'na jareya menta juko'?
[12] Otabana se aberri' kalajengking mon menta tellor?
[13] Maske ba'na reya jahat, ba'na tao keya aberri' se bagus ka ana'na. Apa pole Rama se e sowarga! Rama bakal marengngagiya Errohna ka sapa'a bai se nyo'on ka Salerana!”
[14] E settong are Isa ngojuk erroh jahat dhari settong oreng se buwi. Saellana erroh jahat jareya kalowar, oreng jareya molae acaca. Bannya' oreng se kasambu',
[15] tape badha se ngoca', “Oreng jareya bisa ngojuk erroh jahat polana kobasana Be'elzebul, kapalana roh-erroh jahat rowa.”
[16] Badha keya reng-oreng laenna se terro ajebbaga Isa, daddi reng-oreng jareya menta sopaja Isa mabadha kaajiban menangka tandha ja' Salerana pajat rabu dhari Allah.
[17] Tape Isa ngagali ka maksodda reng-oreng jareya, daddi adhabu ka reng-oreng jareya, “Mon settong nagara aca-pecca daddi pan-barampan golongan se saleng amosowan, nagara jareya ta' kera abit omorra. Ban settong kalowarga se aca-pecca ban saleng amosowan, tanto ancor.
[18] Bariya keya e dhalem karaja'anna Iblis; mon golongan se settong amosowan ban golongan laenna, karaja'an jareya tanto gujur. Ca'na ba'na Sengko' reya ngojuk erroh jahat polana kobasana Be'elzebul.
[19] Mon bariya, kalaban kobasana sapa red-moredda ba'na ngojuk erroh jahat rowa? Red-moredda ba'na dibi' abukteyagi ja' ba'na sala!
[20] Tape Sengko' ngojuk erroh jahat kalaban kobasana Allah, ban jareya artena Allah la molae marenta e nga'-tengnga'anna ba'na kabbi.
[21] Mon badha oreng se kowat, se asanjata genna', ajaga bengkona dibi', dhi'-andhi'na kabbi tanto salamet.
[22] Tape mon badha oreng se akowadan nyerrang, sarta se andhi' bengko jareya epakala, oreng se akowadan jareya tanto arampas sakabbiyanna sanjatana se eandellagi, dineng dhi'-andhi'na kabbi laju egi-bagi.
[23] Oreng se ta' noro' ka Sengko', saongguna amoso ban Sengko', ban oreng se ta' nolonge Sengko', saongguna arosak Tang lalakon!”
[24] “Mon erroh jahat ondur dhari settong oreng, erroh jareya alengleng ka kennengngan-kennengngan se paleng kerreng kaangguy nyareya kennengnganna bu-ambu lesso, tape ta' nemmo. Daddi, erroh jahat jareya ngoca', ‘Sengko' abaliya ka bengko se la edina'agi bi' sengko' rowa!’
[25] Sanapa'na ka jadhiya, erroh jahat jareya nemmone bengkona berse ban bagus atoranna.
[26] Daddi erroh jahat jareya ondur gallu, laju abali pole ngeba erroh jahat laenna kapetto se ajahadan dhari aba'na. Saellana jareya kabbi padha maso' ka dhalem oreng gella', laju enneng e jadhiya. Ban dhi-budhina kabadha'anna oreng jareya asara'an dhari dha'-adha'na.”
[27] Saellana Isa adhabu kantha jareya, laju badha babine' e antarana oreng se bannya' jareya, ngoca' kantha reya ka Isa, “Pojur onggu babine' se alahirragi sareng nyepsebbi Panjennengngan!”
[28] Tape Isa adhabu, “Apojuran pole oreng se ngedhingngagi dhabuna Allah sarta ajalannagi dhabu jareya!”
[29] Sabatara reng-oreng agaribbunge Isa, Salerana nerrossagi dhabuna, “Reng-oreng jaman sateya reya ce' jahadda. Menta kaajiban ka Sengko' sopaja bisa'a parcaja ka Sengko', tape bi' Sengko' ta' eberri'ana kaajiban maske settonga, kajabana kaajibanna Nabbi Yunus.
[30] Akantha Nabbi Yunus se daddi kaajiban monggu ka reng-oreng Niniwe, bariya keya Pottrana Manossa bakal daddiya settong kaajiban monggu ka reng-oreng jaman sateya reya.
[31] E Are Keyamat, Rato nagara Lao' bakal jaga'a abareng ban reng-oreng jaman sateya reya sarta agugat reng-oreng jareya. Sabab, Rato jareya ngalakone parjalanan se ce' jauna dhari nagarana polana terro ngedhingngagiya pangajaranna Sulaiman se bicaksana. Tape e dhinna' reya sateya badha se araja'an dhari Sulaiman.
[32] E Are Keyamat reng-oreng Niniwe bakal jaga'a abareng reng-oreng jaman sateya reya, sarta agugat reng-oreng jareya, sabab reng-oreng Niniwe jareya atobat dhari sa-dusana e bakto Yunus akotbah ka reng-oreng jareya. Tape e dhinna' reya sateya badha se araja'an dhari Yunus!”
[33] “Tadha' oreng ngodhi'i damar, ban damarra laju eerrep otabana etotobi pennay. Damar jareya tanto esaba' e ko'-tongko'na damar, sopaja oreng se maso' nangale'e sonarra.
[34] Mata reya damarra badan. Mon matana ba'na benneng, badanna ba'na tera' tar-kataran kabbi. Tape mon matana ba'na bureng, badanna ba'na petteng calemodan kabbi.
[35] Daddi pate-ngate, ja' sampe' damar se tera' se badha e ba'na jareya daddi petteng.
[36] Mon ba'na sabadan tera', ban tadha' se petteng, ba'na sabadan tera' tar-kataran akantha se esonare tera'na damar.”
[37] Saellana Isa mare se abu-dhabu, laju badha oreng Farisi ngatore Salerana adha'ar e bengkona. Daddi Isa meyos adha'ar e jadhiya.
[38] Oreng Farisi jareya heran e bakto nangale'e Isa adha'ar ta' abacco gallu menorot atoranna agamana.
[39] Daddi Guste Isa adhabu ka oreng jareya, “Ba'na reng-oreng Farisi reya biyasana pajat ngorae cangker ban pereng bagiyan lowaranna, tape e dhalemma ba'na dibi' possa' ban kakerrasan tor kajahadan.
[40] Ba'na reya budhu! Allah se la abadhi bagiyan lowar reya gu ta' la abadhi bagiyan dhalemma keya?
[41] Se badha e dhalemmanna cangker ban perengnga ba'na, jareya se kodu ebagi ka reng-oreng mesken. Kalaban cara se kantha jareya, sakabbiyanna bakal daddiya menorot agama kaangguy ba'na.
[42] Palang ba'na, reng-oreng Farisi! Saparpolonna hasella tamennanna ba'na, akantha salase ban enggu sarta pa-palappa laenna eatorragi ka Allah, tape ba'na ta' marduli ka kaadilan ban kataresna'an ka Allah. Mangkana jareya se koduna elakone ba'na, maske en-laenna ja' sampe' enthengngagi keya.
[43] Palang ba'na, reng-oreng Farisi! Ba'na lebur ngennengnge kennengngan se tenggi e dhalem kennengnganna kabakteyan, sarta lebur ehormadi oreng e sar-pasar.
[44] Palang ba'na kabbi! Ba'na reya akantha koburan se tadha' patthoganna, se eda'-didda' oreng, tape oreng se nedda' ta' apangrasa.”
[45] Sala settong dhari ru-guru agama se badha e jadhiya ngoca' ka Isa, “Guru, dhabuna Sampeyan ganeka padha sareng ya-nyeya kaula sakanca!”
[46] Dhabuna Isa, “Palang keya ba'na, ru-guru agama! Ba'na aberri' parenta ban atoran acem-macem se talebat berra' ka oreng laen, tape ba'na dibi' ta' endha' aberri' partolongan sakone'a balakka' sopaja reng-oreng jareya bisa'a ajalannagi atoran-atoran jareya.
[47] Palang ba'na kabbi! Ba'na agabay makamma bi-nabbi, se epate'e para bangatowana ba'na dibi'.
[48] Daddi ba'na dibi' ngakone ja' ba'na abendherragi apa se la elakone para bangatowana ba'na jareya; sabab bangatowana ba'na se padha mate'e bi-nabbi jareya ban ba'na se agabay kam-makamma.
[49] Jareya sababba Kabicaksana'anna Allah adhabu, ‘Sengko' ngerema bi-nabbi ban otosan-otosan ka reng-oreng jareya; sabagiyan badha se epateyana ban sabagiyan badha se ekaneyaja'a.’
[50] Allah alampa'agi jareya kabbi sopaja reng-oreng e jaman sateya reya eokom polana bi-nabbi se epate'e molae dunnya reya ecepta'agi,
[51] molae dhari se mate'e Habil sampe' ka Zakhariya, se epate'e e antarana mezba ban Padalemman Socce. Ongguwan: Reng-oreng jaman sateya reya tanto eokom polana jareya kabbi.
[52] Palang ba'na, ru-guru agama! Konci kaangguy mokka' labangnga pangataowan eteggu' ba'na, tape ba'na dibi' ta' endha' maso' ka dhalem nyare pangataowan jareya. Sabaligga ba'na la'-mala' lang-ngalange reng-oreng se aehteyar maso'a ka dhalem!”
[53] E bakto Isa gubar dhari kennengngan jareya, ru-guru agama ban reng-oreng Farisi ca'-ngoca'e Isa ce' sarana. Reng-oreng jareya molae ceng-manceng Isa sopaja kasokana abu-dhabu sabannya'na.
[54] Ban sabatara jareya reng-oreng jareya ngedhingngagi epagu-onggu polana nyareya dhabuna se sala.