[1] Emmas se agalirap la orem to-batona Padalemman Socce car-kalacer e lorong.
[2] Lamba' ngangodhadan Kottha Siyon akantha emmas se aji, sateya eanggep akantha pennay lempong.
[3] Pate' alas bai nyosowe budhu'na, tape tang ommat ce' kejjemma akantha mano' onta e talon.
[4] Babaji' tadha' se esosowe, sampe' padha mate dhari pelka'na. Na'-kana' padha menta ngakan tape tadha' se aberri'a settonga balakka'.
[5] Oreng se biyasana ngakan se man-nyaman, mate kalaparan e rong-lorong; se biyasa odhi' e dhalem kamewa'an, sateya arangka' nyare kakan e baddhana kas-rakas.
[6] Tang ommat la eokom alebbiyan dhari pandhudhu' Sodom se e dhalem saparngedep ancor e dhalem astana Pangeran maske tadha' tanangnga manossa se mokol.
[7] Lamba' tang pamimpin morne kabbi akantha kapas se berse pote. Orengnga soga' ban kowat, segger ban sehat.
[8] Tape sateya robana acellengngan dhari galagas, ajalamperran e lorong ta' ekennal oreng. Kole'na kero' nalket ka tolangnga, akantha kaju se ce' kerrengnga.
[9] Odhi'na nyangsara, mate re-lere polana ta' andhi' se ekakana sakale; oreng se mate e paperrangan, apojuran dhari se mate kalaparan.
[10] Ce' rajana balai se teba ka tang bangsa sampe' kaom ebu se alos atena ngella ana'na dibi' egabay essena tabu'na.
[11] PANGERAN norodi dukana, ngobbar Siyon epasampe' rampa ban tana.
[12] E antarana to-rato ban pandhudhu'na dunnya tadha' settonga se parcaja, ja' bang-labang sakethengnga Yerusalim ekenneng maso'e moso.
[13] Tape jareya la kalakon polana dusana para imam ban nabbina, se mangalocor dharana reng-oreng se ta' sala.
[14] Para pamimpinna kottha Yerusalim akantha oreng buta se alalana e rong-lorong. Kalambina kotor buddhak dhara, sampe' tadha' oreng endha' nyeddhing settonga.
[15] Oreng ngoca' kantha reya, “Ondur, kassa'! Ba'na najjis, ja' ding-nyedding ka sengko'!” Reng-oreng jareya pas ajalan dhari bangsa ka bangsa, tape tadha' se endha' narema e nagarana.
[16] PANGERAN la ta' mekkere ommadda; PANGERAN dibi' se mabalessadan ommadda jareya, se madaddi mam-imam ta' eargai oreng, ban para pamimpin ta' ekaneserre oreng.
[17] Tang mata daga lesso se ngabas, anante' bantowan se ta' gellem dhateng. Sengko' ngarep partolonganna settong bangsa, se sabendherra ta' bisa aberri' pa-apa.
[18] Sengko' kabbi padha ta' bisa kalowar ka lorong, sabab ros-terrosan esendhemme moso. Tang ajal la para' napa'a, etonganna tang are la genna'.
[19] Reng-oreng se nyerser sengko' ce' santa'na, aceppeddan parana dhari mano' rajabali. Sengko' eserser e gunong, ban eaddhang e ra-ara.
[20] Tang moso nangkep rato peleyanna PANGERAN, oreng se bi' sengko' eandellagi menangka se daddi somberra tang odhi', ban se ngaobi sengko' dhari moso.
[21] He, bangsa Edom ban Us, mara agella' ba'na, anga-bunga pongpong gi' bisa! Balai bakal teba'a ka ba'na keya. Ba'na bakal mabu'a sampe' padha abangkang.
[22] Siyon la ajalane okomanna polana sa-dusana; sateya sengko' ban tang bangsa ta' kera edina pole bi' PANGERAN ban ta' kera egiba pole ka pambuwangan. Tape ba'na, Edom, bakal eokoma PANGERAN. Sa-dusana ba'na bakal ebukka'a.