[1] Areya' caretana nagara Kana'an e bara'na Songay Yordan se egi-bagi e antarana ommat Isra'il. Se gi-magi tana jareya ka ommat Isra'il iya areya Imam Eleyazar, Yusak pottrana Nun, ban la-kapalana kalowarga e dhalem ku-sukuna bangsa Isra'il.
[2] Menorot dhabuna PANGERAN ka Mosa, tana e bara'na Songay Yordan se etantowagi menangka bagiyanna ku-suku bangsa Isra'il se bannya'na sanga' satengnga rowa, kodu ebagi ngangguy ellot.
[3] Tana e temorra Songay Yordan bi' Mosa la eparengngagi ka dhuwa' satengnga suku bangsa se laenna rowa. (Parlo ecathet ja' toronanna Yusup ebagi daddi dhu suku: Suku Manasye ban suku Efraim). Dineng suku Lewi ta' olle bagiyan tana sakale dhari Mosa. Pera' eparenge tha-kottha se egabay kennengnganna, ban lon-talon kennengnganna sape ban dumbana.
[5] Daddi ommat Isra'il gi-magi tana jareya menorot dhabuna PANGERAN ka Mosa.
[6] E settong are reng-oreng dhari suku Yehuda nyabis ka Yusak e Gilgal. Sala settong e antarana, iya areya Kaleb ana'na Yefune oreng Kenas, mator, “Yusak! Panjennengngan oneng ponapa se edhabuwagi PANGERAN ka Mosa, otosanna Allah ka'issa', e Kades-Barnea parkara panjennengngan sareng abdina.
[7] Abdina aomor pa' polo taon e bakto eotos dhari Kades-Barnea bi' Mosa, abdina PANGERAN ka'issa', menangka ta-mata se kodu nalektegi nagara paneka. Ban abdina abali ka salerana, ngatore kabar se sajujurra.
[8] Namong reng-oreng se asareng abdina padha ko'-nako'e ommat Isra'il. Namong abdina teptep esto ka GUSTE Allahna kaula.
[9] Daddi Mosa ajanji ja' tana se eentare abdina masthe eparengngagiya ka abdina sareng na'-ana' abdina, se ekaandhi'a salanjangnga.
[10] Samangken ampon olle pa' polo lema' taon dhari baktona PANGERAN adhabu parkara gapaneka ka Mosa. PANGERAN se adhabu ka Mosa gapaneka e bakto bangsa Isra'il gi' alalana e ra-ara beddhi. Akadi se edhabuwagi PANGERAN, abdina gi' terros epeyara, daddi gi' paggun odhi' kantos samangken. Omor abdina samangken ampon ballung polo lema' taon,
[11] namong gi' kowat akadi e bakto abdina eotos sareng Mosa. Abdina gi' cokop kowat manabi aperranga otabana alakowa ponapa saos.
[12] Daddi ngereng samangken parengngagi ka abdina tana pagunongan se ejanjiyagi PANGERAN e bakto abdina sareng ca-kanca laenna dhateng ngatore kabar ka'dhissa'. E bakto gapaneka panjennengngan dibi' meyarsa ja' e ka'issa' badha bangsa buta se anyama bangsa Enak. Bangsa gapaneka ngennengnge tha-kottha raja se apagar bato. Olle daddi PANGERAN nolongana abdina ngojuga bangsa gapaneka, menorot se edhabuwagi PANGERAN.”
[13] Daddi Yusak aberkadi Kaleb pottrana Yefune, se laju eparenge kottha Hebron menangka tana kaagunganna.
[14] Sampe' sateya kottha jareya ekasangkol toronanna Kaleb pottrana Yefune, oreng Kenas rowa, sabab Kaleb esto ban atoro' ka dhabuna PANGERAN, Allahna Isra'il.
[15] Lamba' Hebron jareya enyamae Arba. (Arba reya oreng se paleng raja dhari antarana bangsa Enak.) Daddi nagara jareya aman ban taremtem sabab tadha' perrang pole.