[1] PANGERAN aparkara ban pandhudhu'na nagara reya. He Isra'il, edhingngagi apa dhabuna, “E nagara reya tadha' kaestowan otaba kataresna'an, ban pandhudhu'na ta' ngakowe Sengko' menangka Allahna.
[2] Reng-oreng jareya asompa, ta' neptebbi sompa jareya; reng-oreng jareya acaca lecek, mate'e oreng, mamaleng ban azina. Kajahadan atamba, ban reng-oreng mate'e oreng ros-terrosan.
[3] Lantaran jareya nagara reya bakal kerrenga, ban sabarang se odhi' e jadhiya bakal mateya. Sakabbinna keban e bang-abang, tenggangan ban e sagara bakal mateya.”
[4] PANGERAN adhabu, “He para imam, ja' sampe' ba'na badha se nyala'agi otabana gigir ka Tang ommat, sabab ba'na se esala'agiya bi' Sengko'!
[5] Seyang malem ba'na agabay sala, bariya keya para nabbi. Daddi Sengko' mateyana Isra'il, ebuna ba'na.
[6] Ba'na, para imam, ta' parduli ka Sengko', daddi Tang ommat ta' parduli keya ka Sengko' sampe' padha calaka' kabbi. Ba'na nolak Tang pangajaran. Daddi, Sengko' nolaga ba'na keya, ban na'-ana'na ba'na bi' Sengko' ta' eakowa menangka Tang mam-imam.
[7] Ba'na sajan bannya' sajan dusa ka Sengko', he mam-imam! Daddi kabadha'anna ba'na bi' Sengko' eoba'a: Ba'na bakal eya'-seya'a, ta' ehormadi pole.
[8] Ba'na sogi polana dusana Tang ommat, daddi ba'na terro sopaja Tang ommat jareya dusa terros.
[9] Daddi ba'na bakal nyangsara'a akantha ra'yat! Bi' Sengko' ba'na eokoma satembang ban pa-apa se elakone ba'na.
[10] Ba'na bakal ngakana ban-kurban se egabay tor-ator, tape ba'na gi' pagguna lapar. Ba'na bakal nyemba'a ba-diba kamerdiyan, tape pandhudhu'na paggun ta' atamba, sabab ba'na la nyenglae Sengko' polana nyemba'a ka la'-alla'an.”
[11] PANGERAN adhabu, “He Tang ommat, banne pera' anggur se laju, tape anggur se anyar keya padha daddi sababba ba'na ta' bisa apekker baras pole.
[12] Ba'na menta petodu ka kaju sakerra'! Tongket malae ba'na apa se terro ekataowana ba'na! Ba'na akantha binena oreng se daddi sondel; ba'na adina'agi Sengko', massra'agi aba' ka la'-alla'an.
[13] E kennengnganna panyemba'anna brahala e co'-konco'na mo'-gumo' ban nong-gunong ba'na ngatorragi kurban, ban ngobbar dupa e babana ju-kajuwan raja se rampa' e jadhiya polana kennengngan jareya aop. Tape baramma daddina? Ban-parabanna ba'na daddi sondel ban to-manto bine'na ba'na azina!
[14] Tape Sengko' ta' ngokoma lalakonna reng-oreng jareya, sabab ba'na dibi' entar ka del-sondel se alako e wel-kowel, ban ngatorragi kurban ka ba-diba abareng ban del-sondel jareya. Teppa' onggu ca'-oca'an reya: ‘Bangsa se ta' andhi' pangarteyan parkara Allah tanto ancor.’
[15] He ba'na oreng Isra'il, ba'na ta' esto ka Sengko'! Tape Sengko' ngarep Yehuda ta' agabay sala se padha kantha jareya! Ja' ajalannagi kabakteyan e Gilgal otaba e Betel. Ja' asompa e jadhiya bit asmana PANGERAN se odhi'.
[16] Ba'na, he oreng Isra'il, ce' cengkalla! Baramma Sengko' se bisa'a ngowan ba'na akantha oreng se ngowan dumba e talon?”
[17] Ommat Isra'il la kapencot bi' brahala. Daddi la dina bai.
[18] Saellana mabu' polana ngenom anggur sabannya'na, reng-oreng jareya nyondel kalaban ate senneng. Reng-oreng jareya asennengngan eya-seya etembang ehormat oreng.
[19] Daddi reng-oreng jareya bakal mosna'a akantha se ekebbat angen. Reng-oreng jareya bakal todhusa polana ban-kurbanna se egiba ka ba-dibana.