[1] Lamba' suku Efraim ehormadi oreng, sampe' mon badha parenta dhari suku jareya, ku-suku laenna e Isra'il tako'. Tape suku Efraim agabay dusa polana nyemba Ba'al, daddi suku jareya bakal mosna'a.
[2] Sampe' sateya reng-oreng Efraim jareya gi' terros agabay dusa; agabay ca-arca salaka se esemba'a -- arca se erancang bi' akkalla manossa sarta ekagabay bi' tanangnga manossa. Ca'na reng-oreng jareya, “Mara atorragi ban-kurban ka ca-arca jareya!” Ane, baramma manossa me' bisa nyeyom arcana budhu'na sape!
[3] Lantaran jareya reng-oreng Efraim jareya bakal mosna'a akantha bun-arbun otaba ebbun e baja laggu; bakal daddiya akantha abuna darameyan se eabber angen e pagebba'anna gandum, ban akantha okos se kalowar dhari lobangnga dhapor.
[4] PANGERAN adhabu, “Sengko' reya PANGERAN, Allahna ba'na, se makalowar ba'na dhari Messer. Ba'na ta' andhi' Allah laen kajabana Sengko' malolo. Pera' Sengko' panyalamedda ba'na.
[5] E tana kajal e sagara beddhi, Sengko' se ajaga ba'na.
[6] Tape saellana ba'na badha e nagara se bagus, ban ba'na la kennyang sarta tobuk, ba'na pas angko ban loppa ka Sengko'.
[7] Daddi Sengko' nyargebba ba'na akantha macan. Akantha macan toltol Sengko' ngaddhanga ba'na e lorong.
[8] Sengko' nyerranga ba'na akantha baruwang se kaelangan dhu'-budhu'na. Bi' Sengko' ba'na ebit-sebbida. Akantha macan Sengko' nyargebba ba'na e kennengnganna, ban akantha burun alas galak Sengko' bit-nyebbida ba'na.
[9] Sengko' maancora ba'na, he, bangsa Isra'il! Ban sapa se bisa'a nolong ba'na?
[10] Ba'na menta rato ban pamimpin, tape kemma to-rato ban pin-pamimpin jareya sateya? Ba' bisa'a reng-oreng jareya masalamet ra'yadda ba'na?
[11] Kalaban ate peggel Sengko' aberri' rato ka ba'na, ban kalaban ate panas to-rato jareya bi' Sengko' etarek pole.”
[12] PANGERAN adhabu, “Dusa ban kasala'anna Isra'il la ecathet, ban catheddanna esempen.
[13] Isra'il andhi' kasempadan kaangguy odhi', tape ce' budhuna sampe' ta' aguna'agi kasempadan jareya. Isra'il jareya akantha babaji' se para' lahira tape ta' endha' kalowar dhari gandhu'anna ebuna.
[14] Bangsa reya bi' Sengko' ta' epasalamedda dhari kobasana dunnyana oreng mate. He, pate, mara pabalattra wabahna ba'na! Jalannagi lalakonna ba'na se maancoran jareya! Sengko' ta' neser pole ka bangsa jareya.
[15] Maske Isra'il ma'mor akantha rebba se landhu, tape Sengko' ngerema angen temor se panas dhari sagara beddhi. Angen jareya bakal makerrenga ber-somber ban mor-somor, sampe' sabarang se aji tadha' karena sakale.