[1] Reya pessen se enyataagi bi' PANGERAN ka Nabbi Habakuk.
[2] Adhu GUSTE, kantos bilaepon abdidalem kodu aserro nyo'on partolongan? Bilaepon Junandalem meyarsa'agiya sareng masalamedda abdidalem dhari seksa'an?
[3] Aponapa abdidalem sareng Junandalem me' epanneng nengale kajahadan se talebat bannya'epon? Masa' Junandalem kowat ngoladi talebat bannya'epon oreng se nerrak dhabuwepon Junandalem? E man-ka'dhimman badha kaancoran sareng kakerrasan, badha tokar sareng cekcok.
[4] Hokom ta' eparduli oreng, dineng kaadilan ta' oneng ejalannagi. Oreng jahat ngongkole oreng jujur, daddi kaadilan elik-balik.
[5] PANGERAN pas adhabu ka ommadda, “Abassagi sa-bangsa e kangan-kacerra ba'na, ba'na tanto heran ban cengngeng. Sabab e jamanna ba'na badha se ejalannagiya Sengko', se bi' ba'na ta' eparcaja mon pera' ecareta'agi ka ba'na.
[6] Bangsa Babil se galak rowa bi' Sengko' epadaddiya bangsa se kobasa. Bangsa jareya abaris kalowar dhari nagarana entar ka saantero bume matelloga sa-bangsa laen.
[7] Neng e man-dhimman bangsa jareya madhateng katako'an; bangsa jareya ce' sombongnga nolak sakabbinna hokom kajabana se cocok ka pangaterrona dibi'.
[8] Jaranna aceppeddan dhari macan toltol, ban agalagan dhari pate' alas se lapar. Pasukan jaranna dhateng dhari ra-nagara se jau; bangsa jareya dhateng akantha mano' ellang se nyaop mangsana.
[9] Tantarana nyerrang ajalannagiya kakerrasan, oreng kabbi padha tako' nangale padhatengnga bangsa jareya. Oreng tahananna ta' kabitong bannya'na.
[10] To-rato ebi-cebbi ban om-kaom oreng agung ekala'-gella'. Sakabbinna binteng ta' eanggep; binteng jareya etembuk ban tana sarta pas erebbu'.
[11] Saellana jareya reng-oreng se gung-ngagungngagi kakowadanna dibi' jareya pas mangkat padha ban angen ceppedda.”
[12] GUSTE, ngabidi gi' dhimen Junandalem ka'dhinto Allah. Junandalem Allah abdidalem se socce sareng langgeng. GUSTE, Allah abdidalem sareng pangaoban abdidalem, bangsa Babil sareng Junandalem epele sareng epakowat kaangguy ngokom abdidalem sadaja.
[13] Namong kadi ponapa Junandalem me' kowat ngoladi reng-oreng jahat se kejjem ka'dhissa'? Junandalem gu ta' talebat soccena me' daddi ngoladi kajahadan? Junandalem gu ta' ce' baji'na ngoladi barang se ta' adil? Daddi aponapa Junandalem me' mendel saos e bakto oreng alem epaancor sareng reng-oreng se daraka?
[14] Aponapa manossa sareng Junandalem me' eanggep padha sareng juko' e tase', padha sareng sabangsana nyarowan se tadha' pamimpinnepon?
[15] Bangsa Babil mega' reng-oreng ngagem panceng, akaton reng-oreng gapaneka eanggep juko'. Reng-oreng ka'dhinto eeret ngagem la-jala ban bangsa Babil anga-bunga dhari ollena hasellepon.
[16] Saamponnepon gapaneka sareng bangsa ka'dhinto jalana esemba sareng eatore tor-ator kurban, sabab kalaban jala ka'dhinto bangsa gapaneka manggi rajekke se talebat bannya'epon sareng pas daddi ma'mor.
[17] Masa' bangsa ka'dhinto badhi terrosa ngonos peddhangngepon sareng mate'e sa-bangsa laennepon, ta' gadhuwan rassa neser sakale.