[1] Nyama se ro'om aparlowan dhari mennya' se larang; are e bakto mate lebbi becce' dhari are e bakto buru egandhu' ebu.
[2] Lebbi becce' entar ka bengko kasossa'an katembang entar ka kennengnganna pesta. Sabab manossa kodu ros-terrosan ngenga'e ja' maot anante' saneyap oreng.
[3] Kasossa'an lebbi becce' katembang kaperagen. Sanajjan mowa orem asal ate loggang.
[4] Oreng budhu terros nyerser kasennengngan; oreng penter ros-terrosan mekker kamateyan.
[5] Lebbi becce' epaenga' salana bi' oreng se bicaksana katembang ealem oreng se budhu.
[6] Gella'na oreng budhu tadha' artena, akantha monyena dhuri se ekello' apoy.
[7] Mon oreng se bicaksana nepo oreng, jareya lalakon se budhu; mon oreng narema pesse sogo', rosak babategga.
[8] Aherra settong parkara lebbi becce' dhari parmola'anna; ate sabbar lebbi bagus dhari ate gumbira.
[9] Ja' ru-kaburu norodi peggella ate; pera' oreng budhu se nyempen sake' ate.
[10] Ja' atanya, ‘Arapa jaman lamba' me' anyamanan dhari jaman sateya?’ Pera' oreng gendheng se atanya kantha jareya.
[11] Oreng odhi' masthena andhi' hekmat; argana hekmat reya padha ban sangkolan;
[12] padha ban pesse se mataremtem ate. Apa pole pangataowan parkara hekmat! Sapa se andhi' pangataowan jareya bakal salamedda.
[13] Kodda' tetene sabarang se elampa'agi Allah. Sapa se bisa'a maloros sabarang se epabilu' bi' Allah?
[14] Daddi pagumbira mon ba'na teppa'na pojur. Tape mon ba'na teppa'na palang, ja' loppa ja' kasennengngan ban kasossa'an jareya padha dhari Allah asalla. Manossa ta' tao apa se bakal dhatengnga.
[15] Odhi'na sengko' reya tadha' gunana, tape e dhalem tang odhi' reya badha se etangale'e sengko', iya areya: Badha oreng se becce' mate, maske aba'na abakte ka Allah jareya, ban badha oreng se jahat lanjang omorra maske terros agabay dusa.
[16] Ja' ce'-becce' gallu, ban ja' bicaksana parana. Apa gunana aradda'?
[17] Bariya keya ja' hat-jahat parana ban ja' dhu-budhu gallu. Arapa'a ba'na me' terro mateya sabellunna baktona?
[18] Jauwi se dhadhuwa' jareya. Mon ba'na tako' ka Allah, tanto becce' hasella.
[19] Oreng se andhi' hekmat lebbi parjuga katembang sapolo pangobasa e settong kottha.
[20] E bume reya tadha' oreng se samporna; tadha' oreng se terros becce' ban ta' tao agabay dusa.
[21] Ja' dujan ngedhingngagi cacana oreng, sopaja ba'na ta' sampe' ngedhing ja' ba'na ebasto barengnga.
[22] Ba'na dibi' apangrasa ja' ba'na tao abasto oreng keya.
[23] Jareya kabbi bi' sengko' eoji ngangguy tang hekmat. Tape sajan esare hekmat jareya, sajan jau dhari sengko'.
[24] Sapa se bisa nemmo artena odhi' reya? Talebat dhalem, malarat se epahamana.
[25] Tape sengko' bajeng ajar ban nyare pangataowan, sopaja olleya hekmat ban jawabanna sakabbinna tang partanya'an. Sengko' ngoddi sopaja ngarteya ja' dusa reya lalakon se budhu parana ban kajahadan reya kanekadan.
[26] Sengko' sateya tao ja' babine' reya apae'an dhari maot. Kataresna'anna babine' reya akantha jala ban jebbak se to-sabakto bisa ajira' mangsana. Pagellu'na akantha kalenthong se cekka' ce' serredda. Oreng se ajalannagi kasokanna Allah epalopot dhari jira'na, tape oreng se dusa bakal etawana.
[27] Abas, dhabuna Se Ahli Pekker. Jareya kabbi se etemmo bi' sengko', e bakto gan satengka' sengko' nyare jawaban.
[28] Sengko' gi' terros keya nyare jawaban laenna, tape ta' ahasel. E antarana oreng saebu sengko' nemmo lalake' settong se ehormadi bi' sengko'. Tape e antarana reng-oreng jareya tadha' babine' settonga se ehormadi bi' sengko'.
[29] Pera' reya se ekataowe sengko': Allah abadhi manossa reya majja ban biyasa. Manossa dibi' se agabay aba'na daddi malarat ban alet-bulet.