[1] Ca'-oca' e dhalem ketab reya asalla dhari Oreng Se Ahli Pekker, pottrana Daud, se agante Daud jumenneng rato e Yerusalim.
[2] Oreng Se Ahli Pekker jareya adhabu: Kabbi padha tadha' gunana! Odhi' reya parcoma, kabbi tadha' artena.
[3] Saomorra sengko' ban ba'na alalakon, sampe' kalowar pello koneng. Tape, kemma ollena se ekenneng andellagi?
[4] Toronan se settong dhateng, toronan settonganna mosna, tape dunnya paggun bai tadha' obana.
[5] Are gi' moncar ban gi' compet. Kalaban lesso abali ka kennengngan asalla, pas moncar pole.
[6] Angen dhateng dhari lao', terros ka dhaja; ater-poter, pas abali pole.
[7] Songay agili ka tase' kabbi, tape tase' ta' endha' possa' keya. Aengnga abali ka olona songay, pas molae agili pole.
[8] Kabbi mabusen, ban kabusennan jareya ta' kaocap. Mata tadha' tobugga se nangale; kopeng tadha' tobugga se ngedhing.
[9] Apa se tao kadaddiyan, bakal kadaddiyan pole. Apa se tao elakone, bakal elakonana pole. Tadha' barang se anyar e dunnya reya.
[10] Badha oreng se ngoca', ‘Abas, reya anyar!’ Tape jareya la badha sabellunna sengko' ban ba'na lahir.
[11] Oreng ta' kera enga' ka kadaddiyan e jaman lamba'. Bariya keya kadaddiyan e antarana sateya ban pagi' ta' kera ekaenga'e bi' reng-oreng e jaman pagi'.
[12] Sengko', Se Ahli Pekker, marenta e Yerusalim menangka rato Isra'il.
[13] Sengko' la atekat nalektegana ban ajara kalaban bicaksana parkara sabarang se kadaddiyan e dunnya reya. Papasthen se esadhiya'agi Allah ka sengko' ban ba'na mangennes onggu.
[14] Sengko' la nangale'e sabarang lalakonna oreng e dunnya reya. Ba'na paparcaja, ya, jareya kabbi tadha' gunana, akantha oreng nyerser angen.
[15] Se bilu' ta' ekenneng paloros, se tadha' ta' ekenneng bitong.
[16] Ca'na tang pekker, “Sengko' reya la daddi oreng penting ban penter, apenterran parana dhari sakabbinna oreng se marenta e Yerusalim sabellunna sengko'. Sengko' makompol pangataowan ban elmo sabannya'na.”
[17] Daddi sengko' la atekat aehteyara sopaja tao bidana antarana pangataowan ban kabudhuwan, antarana kabicaksana'an ban kagendhengngan. Tape nyatana sengko' padha ban oreng nyerser angen.
[18] Sabab sajan bannya' hekmadda oreng, sajan tako' rassana atena. Sajan bannya' pangataowanna oreng, sajan bannya' keya kasossa'anna.