[1] Mara edhingngagi, he, ommat Isra'il! Bi' sengko' ba'na enyanyeyagiya nyanyeyan sossa:
[2] Isra'il se gi' paraban la gaggar, ban ta' kera jaga pole! Neng e attassa tanana dibi' aba'na edina, tadha' se nolonge majaga.
[3] GUSTE Allah Se Mahatenggi adhabu, “Badha settong kottha e Isra'il se majalan parjuridda saebu oreng, tape se abali pera' saratos oreng; kottha laenna makalowar saratos oreng, se abali coma sapolo.”
[4] PANGERAN adhabu ka ommat Isra'il, “Mara abali ka Sengko', sopaja ba'na odhi'a.
[5] Ja' entar ka Bersyeba kaangguy abakte. Ja' nyare'e Sengko' e Betel, sabab Betel bakal mosna'a. Bariya keya ja' entar ka Gilgal, sabab oreng kottha jareya bakal eangko'a ka pambuwangan.”
[6] Mara abali ka PANGERAN, sopaja ba'na odhi'a. Mon ba'na ta' abali ka Salerana, Salerana tanto rabu akantha apoy se alatlat makatonon oreng Isra'il sampe' tadha' karena. E Betel tadha' oreng settonga se bisa'a mate'e apoy jareya.
[7] Palang ba'na, reng-oreng se alik-balik kaadilan ban ngangkange ha'na oreng!
[8] PANGERAN se abadhi tang-bintang e bang-abang -- bintang Belanti' ban bintang Karteka. PANGERAN ngoba petteng epadaddi tera' ban seyang epadaddi malem; aeng dhari sagara etotta' ka tenggangan. Se ngalampa'agi jareya kabbi asmana PANGERAN.
[9] Salerana maancor reng-oreng se kobasa epabareng ban partahananna.
[10] Ba'na baji' ka oreng se nangtang sabarang se ta' adil sarta ka se acaca sabendherra e dhalem pangadilan.
[11] Ba'na nyecce' oreng mesken sarta arampas gandumma. Daddi ba'na ta' kera ngennengnge bengkona ba'na se bagus ban larang se la epaddek ba'na jareya. Ba'na ta' kera ngenom anggur dhari bun-kebbun anggurra se la etamenne ba'na.
[12] Sengko' tao saapa rajana kajahadanna ba'na ban saapa bannya'na dusana. Ba'na nyecce' oreng becce'; ba'na narema sogo' sarta neng-enneng mon badha oreng mesken se ta' narema kaadilan e pangadilan.
[13] Polana tengkana ba'na jareya reng-oreng se bicaksana arassa lebbi becce' neng-enneng bai e jaman se jahat se kantha jareya.
[14] Mara aehteyar atengka becce' ban ja' alako juba', sopaja ba'na odhi'a, sopaja PANGERAN, Allah Se Mahakobasa alenggiya e antarana ba'na onggu akantha se ekoca'agi ba'na.
[15] Kabaji'i pa-apa se jahat ban kaleburi pa-apa se becce', sarta'anna pole jalannagi kaadilan. Pola PANGERAN me' neser ka karena bangsa Isra'il se gi' odhi'.
[16] GUSTE Allah Se Mahatenggi ban Mahakobasa adhabu, “E lan-jalan kottha, oreng bakal nangesa agingging ban aserrowan polana sossa. La'-mala' reng-oreng tane bakal eologa esorowa noro' nanges bi' reng-oreng se narema bajaran kaangguy nangese oreng mate sambi agingging.
[17] E sakabbinna kebbun anggur, oreng bakal nangesa agingging polana Sengko' dhateng ngokoma ba'na. Sengko', PANGERAN, la ngoca'.”
[18] Palang onggu ba'na se te'-nante'an Arena PANGERAN! Apa gunana are jareya ka ba'na? Are jareya pera' daddi are se petteng monggu ka ba'na, banne are se tera'.
[19] Kabadha'anna padha ban oreng se buru dhari macan tape tatemmo ban baruwang. Otabana padha ban oreng se mole ka bengkona sarta tanangnga etapettagi ka geddhung, pas ekekke' olar!
[20] Arena PANGERAN pajat madhateng petteng, banne madhateng tera', are se madhateng orem.
[21] PANGERAN adhabu, “Sengko' baji' ban ngalennyer nangale'e sakabbinna paraya'anna agamana ba'na!
[22] Mon ba'na ngeba kurban obbaran ban kurban gandum, bi' Sengko' ta' etarema'a. Sengko' ta' endha' narema ban-kebanna ba'na se po-lempo se bi' ba'na eatorragi ka Sengko' menangka kurban salameddan.
[23] Ambu ba'na ja' nyanyeyan-nyanyeyan terros, Tang kopeng palengpengen; Sengko' ta' ngedhingngagiya monyena calempongnga ba'na jareya.
[24] Lebbi becce' ba'na aehteyar sopaja kaadilan agili akantha aeng, sarta kajujuran padha ban songay se ta' tao kerreng.
[25] He, ommat Isra'il, e bakto Sengko' nonton ba'na lebat e sagara beddhi pa' polo taon abidda, Sengko' ta' menta tor-ator ban kurban dhari ba'na.
[26] Tape sateya ba'na nyemba Sakut se bi' ba'na eanggep ratona jareya, sarta Kewan, bintang se bi' ba'na eanggep diba jareya. Daddi ca-arca gabayanna ba'na jareya angko' dibi'
[27] mon bi' Sengko' ba'na ebuwang ka nagara se ajauwan dhari Damsyik. Sengko', PANGERAN se anyama Allah Se Mahakobasa la ngoca'.”