[1] Saellana jareya Zedekiya aberonta' ka Nebukadnezar rato Babil. Daddi Nebukadnezar pas mangkat ka jadhiya ban sakabbinna angkadan perrangnga nyerrang Yerusalim e tanggal sapolo bulan sapolo e taon se kapeng sanga' pamarenta'anna Zedekiya. Reng-oreng jareya maddek markas e lowarra kottha, pas agabay pagar pangeppongan dhari bato,
[2] kottha jareya ros-terrosan ekeppong sampe' taon se kasabellas pamarenta'anna Zedekiya.
[3] E tanggal sanga' bulan empa' e taon jareya keya e baktona laep jareya la ce' sarana sampe' ra'yat tadha' se ekakana,
[4] pagarra kottha epagujur bi' moso. E malem jareya keya, sanajjan kottha jareya gi' ekeppong bi' oreng Babil, tantara Yehuda padha buru ka Cora Yordan kabbi. Reng-oreng jareya lebat e kebbunna karaton, kalowar lebat e labang saketheng se daddi panyambungnga geddhung se dhadhuwa' e jadhiya.
[5] Tape Rato Zedekiya eserser bi' tantara Babil, pas ekenneng pega' e tana rata Yerikho. Tantara pangerengnga padha buru kabbi, ratona edina'agi.
[6] Rato Zedekiya pas egiba ka Rato Nebukadnezar e kottha Ribla, terros eokom.
[7] Tra-pottrana epate'e ajunanna. Saellana jareya Zedekiya econgke' socana, pas ekalenthong sarta terros egiba ka Babil.
[8] E tanggal petto' bulan lema' e taon se kapeng sanga bellas pamarenta'anna Nebukadnezar rato Babil, panasehadda Nebukadnezar ban panglimana tantarana se anyama Nebuzaradan rabu ka Yerusalim.
[9] Nebuzaradan ngobbar Padalemman Socce, karatonna rato ban bengkona para pamimpin e Yerusalim.
[10] Pagarra kottha jareya pas epagujur bi' sakabbinna tantarana ban pangerengnga.
[11] Karena ra'yat se gi' badha e dhalem kottha, iya areya kang-tokang se ahli, reng-oreng mesken se la noro' Babil, bi' Nebuzaradan eangko' kabbi ka Babil.
[12] Tape sabagiyan dhari ra'yat se paleng mesken ban ta' andhi' pa-apa edina e Yehuda esoro agarap kebbun anggur ban gal-teggal.
[13] Lar-pelar paronggu ban ta-kareta e Padalemman Socce ban mong-cemmong parongguna epaancor bi' oreng Babil, paronggu la'-bella'anna eangko' ka Babil kabbi.
[14] Rang-barang laenna eangko' keya, iya areya: kop-sekkop, baddhana abuna mezba, kas-pakakassa damar, sabadhana kobugan panadha'anna dharana keban se esambelli kaangguy kurban, sabadhana kobugan pangobbaranna dupa ban rang-barang laenna se eangguy e dhalem opacarana kabakteyan.
[15] Rang-barang emmas ban salaka, tamaso' sabadhana kobugan se kene' ban reng-pereng baddhana mardha ekala' Nebuzaradan dibi'.
[16] Rang-barang paronggu gabayanna Rato Sulaiman kaangguy Padalemman Socce, iya areya pelar se dhadhuwa', ta-kareta ban mong-cemmong raja, kabbi ta' katembang sabab talebat berra'na.
[17] Cangga paronggu se dhadhuwa' jareya padha; tenggina padha ballung meter se epobuwi pentholan dhari paronggu se tenggina settong koma tello' meter. E sakalenglengnga pentholanna pelar jareya epobuwi anggi'an se erengga ban buwana dalima dhari paronggu.
[18] Laen dhari jareya Nebuzaradan nangkep Imam Agung Seraya, Sefanya imam se abanto, panjagana Padalemman Socce katello, panasehadda rato se kalema se gi' badha e dhalem kottha, panglima, bakkella panglima se ngoros administrasina tantara, ban kaom oreng agung laenna se bannya'na sabidak oreng.
[20] Reng-oreng jareya egiba kabbi ka Rato Nebukadnezar e kottha Ribla,
[21] e dhaera Hamat. E jadhiya kabbi padha eseksa pas epate'e. Daddi reng-oreng Yehuda eangko' dhari nagarana egiba ka pambuwangan.
[22] Saellana jareya Nebukadnezar ngangkat Gedalya pottrana Ahikam bajana Safan, epadaddi gubennor e Yehuda epamarenta karena oreng se gi' badha e jadhiya.
[23] E bakto para parwira ban parjurit Yehuda se ta' atellok ka Babil ngedhing ja' Gedalya epadaddi gubennor jareya, kabbi padha nyabis ka Gedalya e Mizpa. Ra-parwira jareya iya areya Isma'il ana'na Netanya, Yokanan ana'na Kareyah, Seraya ana'na Tanhumet dhari kottha Netofa, ban Yazanya dhari kottha Ma'akha.
[24] Dhabuna Gedalya ka reng-oreng jareya, “Sampeyan ta' osa tako' ka om-kaom oreng agung pamarenta Babil. Sampeyan alenggi e nagara paneka saos, ngabdi ka rato Babil. Kaula se nanggunga sampeyan tanto padha salamet.”
[25] Tape e bulan petto' taon jareya Isma'il ana'na Netanya kompoyya Elisama se gi' toronanna rato, meyos ka Mizpa asareng ban oreng kasapolo. Reng-oreng jareya nyerrang ban mate'e Gedalya sarta reng-oreng Yehuda ban oreng Babil se akompol ban Gedalya e jadhiya.
[26] Daddi ra'yat Yehuda, sogi ban mesken, ban para parwirana padha buru ka Messer polana tako' ka oreng Babil.
[27] E tanggal petto lekor bulan dhubellas e taon se kapeng tello polo petto' saellana Yoyakhin eangko' ka pambuwangan, Ewil-Merodakh jumenneng rato Babil. E taon jareya keya rato jareya noduwagi kabellasanna ka Yoyakhin, Yoyakhin epakalowar dhari penjara,
[28] sarta ekabecce'e. Yoyakhin eparenge pangkat se atenggiyan dhari to-rato laenna se ebuwang ka Babil keya.
[29] Yoyakhin la ta' ngagem kalambi penjara pole ban biyasana adha'ar e karaton sarta eparenge pesse kaangguy kaparlowanna re-saarena.