[1] E taon se kapeng dhuwa' pamarenta'anna Yowas pottrana Yowahas e Isra'il, Amaziya pottrana Yowas jumenneng rato Yehuda.
[2] E bakto jareya yuswana sagame' taon, ban marenta e Yerusalim sanga lekor taon abidda. Ebuna iya areya Yowadan dhari Yerusalim.
[3] Amaziya alampa'agi pa-apa se masenneng panggaliyanna PANGERAN, tape Amaziya ta' padha ban Daud, bangatowana. Akantha ramana,
[4] Amaziya ta' magujur kennengnganna panyemba'anna diba se badha e man-dhimman, daddi ra'yadda terros bai ngeba kurban ban ngobbar dupa ka jadhiya.
[5] Saellana koko kakobasa'anna, ba-ponggabana se mate'e ramana bi' Amaziya eokom mate kabbi.
[6] Tape na'-ana'na ba-ponggabana ta' epate'e, sabab Amaziya atoro' ka papakonna PANGERAN e dhalem Ketab Mosa se amonye, “Ja' ngokom mate oreng towa lantaran kajahadan se elakone na'-ana'na, ban ja' ngokom mate na'-ana'na oreng lantaran kajahadan se elakone oreng towana. Saneyap oreng pera' olle eokom mate lantaran kajahadanna dibi'.”
[7] E dhalem settong paperrangan, Amaziya mate'e parjurit Edom sapolo ebu oreng e Cora Accen, ban arebbu' kottha Sela. Kottha jareya bi' Amaziya enyamae Yokte'el. Sampe' sateya kottha jareya paggun anyama Yokte'el.
[8] Saellana jareya Amaziya ngerem otosan ka Yowas rato Isra'il, Rato Yowas etangtang eajak aperrang.
[9] Tape Rato Yowas ngerem jawaban kantha reya, “E settong bakto ombut se adhuri e Pagunongan Libanon ngerem kabar sapaneka ka bungkana comara, ‘E bungkana comara, mara ana' parabanna ba'na palake'e tang ana'.’ Tape saamponna ganeka laju badha burun alas lebat e ka'issa'; ombut se adhuri gapaneka enyek-enyek.
[10] Sampeyan, Amaziya, samangken angga' polana makala oreng Edom. Ponapa kamennangan ganeka gi' ta' cokop? Langkong sae sampeyan alenggi e compo'na saos! Aponapa'a me' re-nyare parkara se pera' macalaka'a sampeyan dibi' sareng ra'yadda?”
[11] Tape Amaziya rato Yehuda ta' marduli dhabuna Yowas rato Isra'il jareya. Daddi Rato Yowas ban reng-oreng baba'anna laju mangkat ka Bet-Semes e Yehuda ban aperrang bi' Amaziya e jadhiya.
[12] Tantara Yehuda epakala ban parjuridda, pas padha buru kabbi mole ka bengkona bang-sebang.
[13] Yowas nangkep Amaziya, laju meyos ka Yerusalim terros magujur pagar alassa kottha jareya lebbi korang dhu ratos meter lanjangnga, molae dhari Labang Saketheng Efraim sampe' ka Labang Saketheng Paddu.
[14] Emmas ban salaka sarta pakakas se epanggi e Padalemman Socce, bariya keya essena karaton, ban pan-barampan oreng sandera ebakta kabbi ka Samaria bi' Yowas.
[15] Careta laenna parkara Rato Yowas, tamaso' kapahlawananna se aperrang ban Amaziya rato Yehuda ecathet e dhalem ketab Sajarana To-rato Isra'il.
[16] Yowas seda laju esareyagi e pasareyanna to-rato e Samaria, laju egante pottrana, Yerobeyam II.
[17] Saellana Yowas rato Isra'il seda, Amaziya rato Yehuda, gi' odhi' lema bellas taon aggi'.
[18] Badha reng-oreng e Yerusalim se asakongkel mateyana Amaziya. Daddi Amaziya laju buru ka Lakhis, tape bi' so-mosona eserser laju epate'e. Jinazana eangko' ban jaran ka Yerusalim, pas esareyagi e pasareyanna to-rato e Kottha Daud. Daddi bi' ra'yat Yerusalim Uziya, pottrana Amaziya laju epajumenneng ratona. E bakto jareya yuswana Uziya gi' buru nem bellas taon. Careta laenna parkara Rato Amaziya ecathet e dhalem ketab Sajarana To-rato Yehuda.
[22] Sasedana ramana, kottha Elat bi' Uziya erebbu' pole sarta pas epaddek pole.
[23] E taon se kapeng lema bellas pamarenta'anna Amaziya pottrana Yowas e Yehuda, Yerobeyam II pottrana Yowas jumenneng rato Isra'il, ban marenta e Samaria pa' polo settong taon abidda.
[24] Rato jareya dusa ka PANGERAN polana nerowe kajahadanna Rato Yerobeyam I se andaddiyagi oreng Isra'il alako dusa.
[25] Yerobeyam II reya se arebbu' pole sakabbinna dhaera kakobasa'anna Isra'il, dhari jalan ka Hamat e dhaja sampe' ka Tase' Mate e lao'. Jareya cocok ban janjina PANGERAN, Allahna Isra'il, se epanapa' kalaban parantara'anna abdina, iya areya Nabbi Yunus pottrana Amitai oreng Gat-Hefer.
[26] PANGERAN ngoladi saapa sangsarana oreng Isra'il, ban tadha' oreng settonga se nolonge.
[27] PANGERAN ta' amaksod maancora Isra'il salanjangnga, daddi laju etolong kalaban parantara'anna Rato Yerobeyam II.
[28] Careta laenna parkara Rato Yerobeyam II, parkara kapahlawananna e dhalem paperrangan-paperrangan ban baramma se arebbu' pole Damsyik ban Hamat dhari Yehuda epabali ka Isra'il pole, la ecathet kabbi e dhalem ketab Sajarana To-rato Isra'il.
[29] Yerobeyam II seda pas esareyagi e pasareyanna to-rato, laju egante Zakhariya, pottrana.