[1] E seddi'anna karatonna Rato Ahab e Yizre'el badha settong kebbun anggur andhi'na oreng se anyama Nabot.
[2] E settong are Ahab adhabu ka Nabot, “Mara, ra, kebbunna anggurra ba'na jareya bagi ka sengko', sabab kebbun jareya semma' ka tang karaton. Ban sengko' kebbun jareya terro etamennana ngan-ganganan. Bi' sengko' ba'na eganteyana kebbunna anggur se abecce'an, otabana, mon ba'na endha', bi' sengko' kebbunna jareya ebelliya bai kalaban arga se pantes!”
[3] Nabot nyaot, “Kebbunna anggur ka'dhinto dadinggalannepon bangatowa abdidalem. Bit asmaepon Allah, abdidalem ta' kengeng ngatorragi kebbun ka'dhinto ka junandalem.”
[4] Ahab duka panggaliyanna meyarsa oca'na Nabot jareya, laju gubar. Sanapa'na ka karaton laju marobbu e pasareyanna, addhep ka geddhung ban ta' kasokan adha'ar.
[5] Izebel rajina, nyander ka seddi'anna pas atanya, “Aponapa sampeyan me' apeggellan? Aponapa me' ta' kasokan adha'ar?”
[6] Saodda Ahab, “Sengko' peggel ka Nabot. Bi' sengko' kebbun anggurra ebelliya, otabana eporobana kebbun anggur laen mon pajat jareya se ekakarep, tape Nabot ta' endha' magi!”
[7] “Sampeyan gu ta' rato Isra'il?” dhabuna Izebel. “Tore abungo pas adha'ar. Pasenneng panggaliyanna. Kaula se ngatorragiya kebbunna Nabot ganeka ka sampeyan.”
[8] Izebel laju noles sorat attas asmana rato, sorat jareya epasange segella rato, pas ekerem ka para pamimpin ban pin-pamimpinna masarakat e Yizre'el.
[9] Essena sorat jareya kantha reya, “Omommagi ka ra'yat soro apowasa kabbi, soro akompol kabbi ra'yat jareya! Nabot berri'i kennengngan se pantes.
[10] Padhateng oreng jahat kadhuwa soro entar ka adha'anna Nabot, soro ngarane ja' Nabot abasto Allah ban rato. Pas giba Nabot jareya ka lowarra kottha, garujuk pasampe' mate.”
[11] Papakonna Izebel jareya etoro' bi' para pamimpin ban pin-pamimpinna masarakat e Yizre'el.
[12] Ra'yat eparenta'agi sopaja apowasa, kabbi pas padha epakompol. Nabot eberri'i kennengngan se pantes.
[13] Oreng jahat kadhuwa epatoju' dhep-adhebban ban Nabot. E adha'anna oreng se bannya' jareya oreng jahat gella' ngarane Nabot abasto Allah ban rato. Daddi Nabot pas egiba ka lowarra kottha ban egarujuk ban bato sampe' mate.
[14] Kabar ja' Nabot la epate'e jareya epanapa' ka Izebel.
[15] Buru meyarsa kabar jareya, Izebel adhabu ka Ahab, “Nabot ampon mate. Samangken pondhut kebbun anggurra se ta' eatorragi epondhuda sampeyan.”
[16] Ahab pas duli mangkat mondhut kebbun anggurra Nabot jareya.
[17] Dhabuna PANGERAN ka Eliya, nabbi se asalla dhari Tisbe rowa,
[18] “Ahab, rato Samaria rowa sateya badha e kebbun anggurra Nabot ngala'a kebbun jareya. Kassa' ba'na entar dha' essa'.
[19] Kabala ka Ahab ja' Sengko', PANGERAN, ngoca' kantha reya, ‘Sala mate'e, gi' arampas dhi'-andhi'na oreng! Daddi dharana ba'na bakal ejilada te'-pate' e kennengnganna te'-pate' se ajilat dharana Nabot!’ ”
[20] E bakto ngoladi Eliya, Ahab adhabu, “He, moso, dhi-budhina ba'na tatemmo keya ban sengko'!” “Lerres,” dhabuna Eliya. “Amarga junandalem alampa'agi barang se juba' e dhalem pangoladanna PANGERAN,
[21] daddi Pangeran adhabu kadi ka'dhinto ka junandalem, ‘Sengko' madhatengnga balai ka ba'na. Bi' Sengko' ba'na ebuwanga, sakabbinna lalake' e dhalem kalowargana ba'na, se towa ban se kana', bi' Sengko' epamosna'a.
[22] Kalowargana ba'na bakal padha'a ban kalowargana Rato Yerobeyam ana'na Nebat, bakal padha'a ban kalowargana Rato Baesa ana'na Ahiya, sabab ba'na madusa reng-oreng Isra'il sampe' mapeggel Sengko'.’
[23] Manabi Izebel, menorot dhabuna PANGERAN badannepon bakal ekakana pate' e dhalem kottha Yizre'el.
[24] Pasera'a saos dhari anggotana kalowargaepon junandalem se seda e kottha bakal ekakana pate', dineng se seda e lowarra kottha bakal ekakana mano'.”
[25] Tadha' oreng laen se ajalannagi kajahadan se menorot pangoladanna PANGERAN padha ban Ahab. Kajahadan jareya elakone ollena Izebel, rajina.
[26] Ahab alampa'agi sa-dusa se ce' juba'na: nyemba ka brahala akantha oreng Amori, iya areya reng-oreng se la eojuk bi' PANGERAN epakalowar dhari nagara Kana'an e bakto oreng Isra'il maso' ka nagara jareya.
[27] Samarena Eliya abu-dhabu, Ahab nyebbit rasoganna pas ngagem rasogan karong menangka tandha atobat, pas aseyam. E bakto asaren terros paggun ngagem rasogan karong, mon alomampa mowana orem terros.
[28] Dhabuna PANGERAN ka Nabbi Eliya,
[29] “Apa ba'na nangale'e baramma Ahab marendha aba'na e adha'anna Sengko'? Sarrena Ahab la atobat Sengko' burung ta' madhatengnga balai ka aba'na saabidda gi' odhi' e dunnya reya. Calaka' balai jareya bi' Sengko' buru epadhatengnga ka ana' binena.”