[1] Енӧжсис ме казялі эшӧ ӧтік вына мыччалан пас, кӧдасянь диво кутіс. Ме казялі сизим ангелӧс, кӧдна видзисӧ медбӧрья сизим умӧльсӧ. Этна медбӧрья умӧллезӧн чулалӧ Енлӧн лӧгыс.
[2] Ме адззылі мыйкӧ стеклоись саридз кодьӧ, сія кыдз биӧн ӧграліс. Сы вылын сулалісӧ вӧрпасӧ вермиссес. Нія вермисӧ и вӧрпаыс вылӧ вачкисяна керӧмсӧ да сы нимлісь лыд пассӧ. Киэзаныс нылӧн вӧлісӧ Еныслӧн сиа орсаннэз.
[3] Нія сьылісӧ Енлӧн Моисей раблісь да Дзельыслісь сьыланкывсӧ: ─ Дӧсвидзись, Дӧсвермись Енӧ! Вынаӧсь Тэнат керӧммет, диво кутӧ! Веськытӧсь да быльӧсь Тэнат туйезыт, вежа отирлӧн Ӧксу!
[4] Дӧсвидзисьным, Кин оз пов Тэись да оз сьылӧт Тэнчит нимтӧ? Тэ эд Ӧтнат вежаыс. Быд отирись йӧзыс локтас да копыртчас Тэныт. Ӧні эд быдӧнныс адззӧны Тэнчит веськыта судитӧмметӧ.
[5] Сыбӧрын ме видзӧті да казялі: енӧжас оссис Вежа Керкуыс ─ скинияыс.
[6] Сэтісь петісӧ сизим ангел медбӧрья сизим умӧльнас. Нія пасьтасьӧмась лёнісь сӧстӧм свиттялан паськӧмӧ. Морос вылӧттяныс йыасьӧмась зарниись йыӧн.
[7] Нёль енӧжись олісь коласісь ӧтікыс сетіс сизим ангеллӧ зарниись сизим доз. Нія вӧлісӧ тыраӧсь пырся олісь Енлӧн лӧгӧн.
[8] Сэк Енлӧн югьялӧмсянь да Сылӧн вынсянь Вежа Керкуыс тырис тшынӧн. Сэтчӧ некин оз вермы пырны, кытчӧдз эзӧ чулалӧ ангеллэзлӧн вайӧм сизим умӧльыс.