[1] Меным сетісӧ меряйтан бедь да висьталісӧ: «Чеччы да мун меряйт Еныслісь Вежа Керкусӧ да езъяланінсӧ. Лыддьы сэтчинісь юрбитіссесӧ.
[2] Вежа Керкуыслісь ӧтӧрланись йӧрсӧ эн видзӧт, эн меряйт сійӧ. Сія сетӧм ентӧдтӧммеслӧ. Нія пондасӧ тальны вежа карсӧ нёльдас кык тӧлісь сьӧрна.
[3] Ме ыста Ассим кык висьтавлісьӧс. Нія пасьтасясӧ чорыт паськӧмӧ да пондасӧ Месянь юӧртны сюрс кыксё кватьдас лун сьӧрна».
[4] Нія висьтавліссес ─ кык випу да кык бивидзан. Нія сулалӧны мусӧ видзись Ен одзын.
[5] Пондылас кӧ кинкӧ нылӧ умӧльсӧ керны, сэк висьтавліссес ӧмись петас би да сотас ны вылӧ лэбтісьӧм мортсӧ. Сідз кулас быд морт, кӧда лӧсьӧтчас нылӧ керны умӧльсӧ.
[6] Нылӧн эм вын игнавны енӧжсӧ, медбы эз вӧв зэрыс Енсянь юӧртӧмныс коста. Нія вермӧны васӧ пӧртны вирӧ. Нылӧ кӧ колас, вермасӧ мусӧ тшыкӧтны быдкодь умӧльнас.
[7] Юӧртан кадныс чулалӧм бӧрын ны вылӧ уськӧтчас вӧрпа. Сія петас пыдӧстӧминсис да кутчас ныкӧт тышкасьны. Вӧрпаыс висьтавліссесӧ вермас да вияс.
[8] Нылісь шойезнысӧ коляс куйлыны ыджыт кар шӧрас. Сійӧ карсӧ отирлӧн оланныс сьӧрті позьӧ шуны Содомӧн да Египетӧн. Висьтавліссеслӧн Дӧсвидзисьныс вӧлі дорӧм сія жӧ карын.
[9] Быдкодь отирись, чужан вужжезісь, быдкодь кыв вылын баитісь йӧзісь, быдкодь увтыррезісь уна отир пондасӧ видзӧтны ны шойез вылӧ куим да джын лун. Озӧ лэдзӧ нійӧ дзебны.
[10] Ны кулӧмсянь му вылын оліссес пондасӧ гажӧтчыны. Ӧтамӧдныслӧ козьналасӧ козиннэз. Этна кык висьтавлісьыс эд ёна маитісӧ му вылын оліссесӧ.
[11] Куим да джын лун бӧрті Енлӧн олан лолыс пырис висьтавліссес пытшкӧ. Нія кыкнанныс чеччисӧ. Ны вылӧ видзӧтіссес ӧддьӧн повзисӧ.
[12] Висьталіссес кылісӧ енӧжсис гора шы: «Лэбтісьӧ татчӧ!» Лёк кериссез син одзын нія лэбтісисӧ енӧжас кымӧр вылын.
[13] Сэтӧн жӧ муыс ёна зэгаліс. Карыслӧн дасӧт торыс разьсис. Му зэгалӧмыс коста вийсисӧ сизим сюрс морт. Ловйӧн кольччӧммес ӧддьӧн повзисӧ да ошкисӧ енӧжсис Енсӧ.
[14] Мӧдік умӧльыс чулаліс. Сибалӧ ни куимӧт ыджытся-ыджыт умӧльыс.
[15] Сизимӧт ангел пондіс пӧльтны аслас буксанӧ. Сэк енӧжас кылісӧ гора шыэз. Нія баитісӧ: ─ Быдӧс вылын Юралісьнас сувтіс миян Дӧсвидзисьным да Сылӧн Мавтӧмыс. Сія пондас юравны пырся-пыр.
[16] Сэк кыкдас нёль пӧрисьыс, кӧдна пукалӧны Еныс одзын асланыс юралан пукӧссэз вылын, уськӧтчисӧ кыминь да копыртчисӧ Еныслӧ.
[17] Нія шувлісӧ: ─ Буркывтам Тэнӧ, Дӧсвидзись Енным, Дӧсвермисьным, Тэ эм, Тэ вӧлін и лоан. Тэ мыччалін Ассит ыджыт вынтӧ да босьтін юралӧмсӧ.
[18] Ентӧдтӧммес лёксялісӧ, а ӧні кадыс локтіс Тэныт лӧгасьны. Локтіс кад судитны кулӧммесӧ да сетавны козиннэсӧ раббетлӧ: Тэсянь юӧртіссезлӧ, Аслат вежа отирлӧ, Тэись поліссезлӧ: учӧттэслӧ да ыджыттэслӧ. Локтіс кад орӧтны оланнысӧ мусӧ тшыкӧтіссеслісь!
[19] Енӧжас Еныслӧн Вежа Керкуыс оссис. Сэтчин пондіс тыдавны Еныслӧн Йитӧтнас коробьяыс. Сэк пондіс вирдавны, гымавны, муыс пондіс зэгавны, кылісӧ гора шыэз да усис гырись шер.