[1] Сійӧ висьталӧм бӧрын Исусыс Галилея мусис муніс. Сія локтіс Иордан ю сайӧ, Иудея муӧ.
[2] Исусыс сьӧрӧ муніс ӧддьӧн уна отир. Сія нійӧ веськӧтіс.
[3] Исусыс дынӧ локтісӧ фарисейез. Сійӧ кутӧм могись нія юалісӧ: «Быд могись я позьӧ янсӧтчыны инькӧт?»
[4] Исусыс нылӧ висьталіс: «Эдӧ разь лыддьӧтӧ: "Еныс медодз аркмӧтіс ай мортӧс да инькаӧс".
[5] Еныс висьталіс: "Сійӧн морт коляс ассис ай-мамсӧ да ӧтлаасяс иньыскӧт. Кыкыс лоасӧ ӧтік вывтыр".
[6] Сідзкӧ, нія абу ни кык, а ӧтік вывтыр. Мый Еныс ӧтлаӧтіс, сійӧ мортыслӧ янсӧтны оз туй».
[7] Фарисейес Исуслісь юалісӧ: «Мыля нӧ сэк Моисейыс лэдзис янсӧтчыны инькӧт да сетны сылӧ янсӧтчан гижӧт?»
[8] Исусыс нылӧ висьталіс: «Моисейыс лэдзис тіянлӧ янсӧтчыны иннезныткӧт чорыт сьӧлӧммезныт кузя, но одзжык сідз эз вӧв.
[9] А Ме тіянлӧ висьтала: инькаыс жӧникыс сайсянь эз кыскась, а жӧникыс тай сыкӧт янсӧтчӧ. Этӧн сія ачыс ыстӧ иньсӧ жӧникыс сайсянь кыскасьны. А кин босьтас кӧ янсалӧм инькасӧ, сія ачыс кыскасьӧ».
[10] Велӧтчиссес Сылӧ шуисӧ: «Сідз кӧ колӧ овны инькӧт, сэк буржык овны гӧтрасьтӧг».
[11] Исусыс нылӧ висьталіс: «Озӧ быдӧнныс босьтӧ сьӧлӧманыс Менчим кыввезӧс, дзир кинлӧ сетӧм.
[12] Уна мыйсянь морт оз вермы гӧтрасьны: ӧтіккез мам кынӧмсянь ни сэтшӧмӧсь, мӧдіккесӧ сэтшӧммезӧн отир керӧмась, куимӧттэс Енӧжись Юралӧм понда гӧтрасьтӧг олӧны. Кин вермӧ кӧ сідз овны, ась олӧ».
[13] Исусыс дынӧ вайӧтісӧ челядьӧс, медбы Сія ны вылӧ пуктыліс киэсӧ да кеймис, но велӧтчиссес локтіссесӧ видісӧ.
[14] Исус нылӧ висьталіс: «Лэдзӧ челядьсӧ локны Ме дынӧ, эд падмӧтӧ нійӧ. Ны коддеслӧ эд лӧсьӧтӧм Енӧжись Юраланіныс».
[15] Исусыс пуктыліс челядьыс вылӧ киэсӧ да сэтісь муніс.
[16] Ӧтпыр Исусыс дынӧ сибӧтчис морт да юаліс: «Бур Велӧтісь, мый меным керны пырся оланӧ пырӧм понда?»
[17] Исусыс сылӧ шуис: «Мыля тэ Менӧ шуан бурӧн? Бур ӧтнас Еныс. Мӧдан кӧ пырны пырся оланӧ, ов тшӧктӧммес сьӧрті».
[18] Мортыс юаліс: «Кытшӧмӧсь тшӧктӧммес?» Исусыс сылӧ висьталіс: «Эн вий», «гозйӧн овтӧн ӧтамӧдныт сайсянь эд ветлӧтӧ», «эн гусясь», «морт йылісь вӧвлытӧмсӧ эн баит»,
[19] «ай-мамтӧ бурӧ пукты», «матісьтӧ радейт асьтӧ моз».
[20] Том мортыс шуис: «Ны сьӧрті ме томсянь ола. Мый эшӧ оз тырмы?»
[21] Исусыс Сылӧ висьталіс: «Мӧдан кӧ лоны быдсӧн бурӧн, мун, пажытьтӧ быдӧс вузав, сьӧмтӧ сетав кориссезлӧ. Сэк лоас тэныт дона пажытьыс енӧжас. Сэсся лок мунны Ме сьӧрӧ».
[22] Нійӧ кыввесӧ кылӧм бӧрын мортыс ӧшӧтіс юрсӧ да сэтісь муніс. Сылӧн эд уна вӧлӧм пажытьыс.
[23] Сэк Исусыс велӧтчиссеслӧ висьталіс: «Ме тіянлӧ быльсӧ висьтала: бура олісьыслӧ сьӧкыт пырны Енӧжись Юраланінӧ.
[24] Эшӧ висьтала: кокнитжык верблюдлӧ мунны ем пысӧт, нежели бура олісьлӧ пырны Енлӧн Юраланінӧ».
[25] Сэтшӧмсӧ кылӧмсянь велӧтчиссесӧ диво кутіс. Нія юалісӧ: «Кин нӧ сэк вермас мезмыны?»
[26] Исусыс видзӧтіс ны вылӧ да висьталіс: «Морт оз вермы, но Еныс эд быдӧс вермӧ».
[27] Сэк Петра юаліс: «Мийӧ быдӧс колим да мунім Тэ сьӧрӧ. Мый миянлӧ сы понда сетасӧ?»
[28] Исусыс нылӧ висьталіс: «Ме тіянлӧ быльсӧ висьтала: виль оланын Морт Зон пуксяс Аслас югьялана юралан пукӧс вылӧ. Сэк и тійӧ, Ме сьӧрын муніссес, пуксят даскык юралан пукӧс вылӧ. Тійӧ пондат Израильлӧн даскык увтырись отиркӧт суд вылас бӧрйисьны.
[29] Быдыс, кин Ме понда коляс керкусӧ, воннэсӧ, сойесӧ, айсӧ, мамсӧ, челядьсӧ, ассис муэсӧ, сія сёпӧв унажык босьтас да пырас пырся оланӧ.
[30] Медодззаэс унаӧн лоасӧ медбӧрьяэзӧн, медбӧрьяэс ─ медодззаэзӧн».