[1] Сія лунӧ Исусыс петіс керкусис, локтіс ты дынӧ да пуксис ва дорас.
[2] Сы дынӧ ӧксисӧ уна отир. Сійӧн Исусыслӧ ковсис пуксьыны пыжӧ, а отирыс сулалісӧ ва дорас.
[3] Исусыс сэк висьтавліс нылӧ уна велӧтан висьт: «Кӧдзись петас кӧдзны.
[4] Кӧдзикас мукӧд кӧдзыс туссес усясӧ туй дорас. Сэтчӧ локтасӧ кайез да нійӧ кокаласӧ.
[5] Кынымкӧ тусь усясӧ изъяинӧ. Сэтӧн муыс етша вӧлӧм. Лажмыт муас нія чожа петаласӧ.
[6] Вуджныс тай нылӧн вӧлӧм жеб. Шондісяняс нія рушмасӧ да чожа мыйись косьмасӧ.
[7] Мукӧд туссес усясӧ йӧн коласӧ. Йӧныс быдмас да петассэсӧ пӧдтас.
[8] Мукӧдыс усясӧ бур муӧ. Нія сетасӧ воӧмсӧ: ӧтіккез ─ сёпӧв, мӧдіккез ─ кватьдаспӧв, мукӧдыс ─ куимдаспӧв унажык.
[9] Пеля мортыс ась кылӧ!»
[10] Велӧтчиссес локтісӧ Исусыс дынӧ да юалісӧ: «Мыля Тэ отирыскӧт баитан велӧтан висьттэзӧн?»
[11] Исусыс нылӧ висьталіс: «Енӧжись Юралӧмись тӧдлытӧмсӧ тіянлӧ сетӧм тӧдны, а нылӧ абу.
[12] Кинлӧн эм, сылӧ сетасӧ да унапӧв содтасӧ. Кинлӧн абу ─ сылісь босьтасӧ и сійӧ, мый эм.
[13] Нія видзӧтӧны да озӧ адззӧ, кывзӧны да озӧ кылӧ, озӧ вежӧртӧ. Сійӧн висьтавла нылӧ велӧтан висьттэсӧ.
[14] Енсянь юӧртісь Исайлӧн ны йылісь эта висьтавлӧмыс керсьӧ: ─ Асланыт пеллезӧн пондат кывзыны, да одӧ вежӧртӧ. Асланыт синнэзӧн пондат видзӧтны, да одӧ казялӧ.
[15] Эта йӧзлӧн сьӧлӧмныс чорзьӧм. Пеллезнаныс нія умӧля кылӧны. Нія синнэзнысӧ куньӧмась, озӧ адззӧ. Сьӧлӧмнаныс озӧ вежӧртӧ, Меланьӧ озӧ бергӧтчӧ, медбы Ме нійӧ веськӧті.
[16] Тійӧ шудаӧсь: тіян синнэзныт эд адззӧны, пеллезныт кылӧны.
[17] Ме тіянлӧ быльсӧ висьтала: уна Енсянь юӧртісь да Ен сьӧрті веськыта олісь мӧдісӧ адззывны, мый тійӧ адззат, да эзӧ адззылӧ. Мӧдісӧ кывны, мый тійӧ кылат, да эзӧ кылӧ».
[18] «Кывзӧ, Ме вежӧртӧта тіянлӧ кӧдзись йылісь велӧтан висьтсӧ.
[19] Морт кывзӧ Енлӧн Юралӧм йылісь Кывсӧ, да оз вежӧрт. Сы дынӧ локтӧ куль да сы сьӧлӧмись кӧдзӧмсӧ гусялӧ. Этӧ мыччалӧ туй дорӧ усьӧм кӧдзысыс.
[20] Изъяинӧ усьӧм кӧдзысыс лоӧ то мый: морт Кывсӧ кылӧ, сьӧлӧмас гажӧн босьтӧ.
[21] Но сія вуджтӧм, сійӧн оз дыр верит. Кӧр локтӧ сьӧкыт кад да Ен Кыв понда вашӧтлӧм, сія дугдӧ веритны.
[22] Йӧн коласӧ усьӧм кӧдзысыс лоӧ то мый: морт Кывсӧ кылӧ, но сылӧн быд лунся тӧждісьӧмыс да унажык сьӧм шедтӧмыс пӧдтӧны Кывсӧ. Сійӧн сэтӧн абу бур воӧмыс.
[23] Бур муӧ кӧдзӧм кӧдзысыс лоӧ то мый: морт Кывсӧ кылӧ, сійӧ вежӧртӧ. Сэтшӧмыс уна воӧмсӧ вайӧ: ӧтік ─ сёпӧв, мӧдік ─ кватьдаспӧв, куимӧт ─ куимдаспӧв унажык».
[24] Сэсся Исусыс висьтасис мӧдік велӧтан висьт: «Енӧжись Юралӧмыс сэтшӧм: морт кӧдзас аслас ыб вылӧ бур кӧдзыс.
[25] Ойнас, кӧр отирыс узисӧ, сэтчӧ вовлас лёк керись. Шогді кӧдзыс коласас сія кӧдзас ёг кӧдзыс да мунас.
[26] Шогдіыс петалас, пондас шепьясьны, сэтчӧ тшӧтш ёгыс быдмас.
[27] Уджаліссес локтасӧ кӧзяиныс дынӧ да шуасӧ: "Кӧзяин, ыб вылат тэ кӧдзин бур кӧдзыс, кытісь нӧ сэтчӧ ёгыс петӧм?"
[28] Сія нылӧ висьталас: "Лёк керись сійӧ керӧм". Уджаліссес шуасӧ: "Колӧ кӧ, мийӧ шогді колассис ёгсӧ нетшкам?"
[29] Сія нылӧ висьталас: "Оз ков. Тійӧ ӧтлаын ёгтуруныскӧт шогді шеппесӧ вермат нетшкыны.
[30] Кольӧ нійӧ быдмыны ӧтлаын вундан кадӧдз. Вундікас ме висьтала вундіссеслӧ: одзжык ёгтурунсӧ кӧрталӧ кольтаэзӧ да сотӧ. Сэсся вӧлись шогдісӧ ӧктӧ менам сусекӧ"».
[31] Исусыс висьталіс нылӧ мӧдік велӧтан висьт: «Енӧжись Юралӧмыс горчига тусь кодь, кӧдӧ морт кӧдзӧм ыб вылӧ.
[32] Кӧдзысӧн сія медпоснит. А кӧдзӧм бӧрас мӧдік быдмассэзся вылынжыка быдмӧ, лоӧ пу кодь. Сэтӧн нельки кайез поздісьӧны».
[33] Исусыс висьтасис эшӧ ӧтік велӧтан висьт: «Енӧжись Юралӧмыс вачкисьӧ майӧв вылӧ. Инька шӧмӧсӧ пуктас куим лыддян доз пизь, содтас майӧв да кӧтас нянь. Быдӧс няньыс ловзяс».
[34] Сійӧ быдӧс Исусыс висьтасис велӧтан висьттэзӧн. Нытӧг эз сёрнит отиркӧт,
[35] медбы керсис Енсянь юӧртісьлӧн висьтавлӧм сьӧрті: ─ Ме велӧтан висьттэзӧн отирыскӧт сёрнита, быдӧс аркмӧтӧмсянь тӧдтӧмсӧ юӧрта.
[36] Отирсӧ ыстӧм бӧрын Исусыс пырис керкуӧ. Велӧтчиссес сибӧтчисӧ Сы дынӧ, корисӧ: «Вежӧртӧт миянлӧ шогді коласын быдмӧм ёгыс йылісь висьтсӧ».
[37] Исус висьталіс: «Бур кӧдзыссӧ кӧдзисьыс ─ Морт Зон.
[38] Кӧдзӧм муыс ─ быдӧс отирыс. Бур кӧдзысыс ─ Енлӧн отир, ёгтуруныс ─ кульлӧн йӧзыс.
[39] Лёк керисьыс, ёг кӧдзыссӧ кӧдзисьыс ─ куль. Вундан кадыс ─ векпон. Вундіссес ─ ангеллэз.
[40] Кыдз сотӧны чукӧртӧм ёгтурунсӧ, сідз лоас векпон коста.
[41] Морт Зон иньдӧтас Ассис ангеллэсӧ ӧктыны Аслас Юраланінісь быд ылӧтлісьсӧ да быд лёк керисьсӧ.
[42] Нійӧ шупкасӧ ӧгралан биӧ. Сэтчин лоас горзӧм да пиннезӧн гирскӧм.
[43] Сэк Ен сьӧрті веськыта оліссес Айныс Юраланінын шонді моз югьявны пондасӧ. Пеля мортыс ась кылӧ!»
[44] «Енӧжись Юралӧмыс ─ ыб вылӧ дзебӧм дона тор кодь. Морт мусис сійӧ адззас да бӧр дзебас. Гажувьяс сія быдӧс, мый сылӧн эм, вузалас да сійӧ ыбсӧ небас».
[45] «Енӧжись Юралӧмыс сэтшӧм: вузасись кошшӧ дона иззэз.
[46] Мортыс адззас сійӧ дона изсӧ. Сія ассис быдӧс, мый сылӧн вӧлі, вузалас да небас сійӧ дона изсӧ».
[47] «Енӧжись Юралӧмыс саридзӧ вӧтьӧм кыян вылӧ вачкисьӧ. Сэтчӧ шедас быдкодь чери.
[48] Кыянсӧ васис кыскасӧ, бур черисӧ ӧктасӧ дозӧ, умӧльсӧ чапкасӧ.
[49] Сідз лоас векпонас: ангеллэс локтасӧ, Ен сьӧрті веськыта оліссез дынісь лёк йӧзсӧ торйӧтасӧ.
[50] Лёк йӧзсӧ шупкасӧ ӧгралан биӧ. Сэтчин лоас горзӧм да пиннезӧн гирскӧм».
[51] Исусыс юаліс: «Быдӧс вежӧртіт?» Велӧтчиссес паныт шуисӧ: «Вежӧртім, Дӧсвидзисьным».
[52] Сэк Сія нылӧ висьталіс: «Туйдӧтӧ велӧтісьыс тӧдӧ кӧ Енлісь Юралӧмсӧ, сія вачкисьӧ кӧзяин вылӧ, кӧда аслас видзанінісь петкӧтӧ вильсӧ и важсӧ».
[53] Нійӧ велӧтан висьттэсӧ висьталӧм бӧрын Исусыс сэтісь муніс.
[54] Сія локтіс Аслас карӧ. Сэтӧн отирсӧ велӧтіс синагогаын. Быд кывзісьсӧ диво кутіс. Нія ӧтамӧдныслӧ баитісӧ: «Кытісь Сылӧн сэтшӧм ыджыт мывкыдыс да сэтшӧм выныс?
[55] Абу я Сылӧн айыс черӧн уджалісь? Абу я Сылӧн Мамыс Мария, а воннэс Яков, Иосий, Симон да Иуда?
[56] Сылӧн сойес озӧ я олӧ миян коласын? Кытісь нӧ Сылӧн эта быдӧс?»
[57] Сійӧн нія эзӧ веритӧ Сылӧ. Исусыс нылӧ висьталіс: «Енсянь юӧртісьӧс бурӧ пуктӧны быдлаын, дзир чужанінас да гортас озӧ».
[58] Отирыс Сылӧ эзӧ веритӧ. Сійӧн сэтӧн Сія адззывлытӧммесӧ уна эз кер.