[1] Кысянь тіян ӧтамӧдныткӧт лӧгалӧмныт да етшасьӧмныт? Нія этасянь: вывтыраныт ӧзйӧтчӧммес пессьӧны тіян пытшкын, зника озӧ сетӧ.
[2] Тіянлӧ мыйкӧ колӧ, но сія абу. Тійӧ виятӧ, завидуйтат, а колӧмсӧ одӧ вермӧ судзӧтны, сійӧн етшасятӧ да лӧгалатӧ. Но тіян абу, одӧ корӧ Еныслісь да.
[3] Коратӧ, а корӧмныт абу сійӧн, мыля одӧ корӧ, медбы керны бурсӧ. Коратӧ дзир ас пондасиныт, медбы керны асланыт ӧзйӧтчӧм сьӧрті.
[4] Енсӧ колиссез! Одӧ я тӧдӧ, му вылісьыскӧт ёртасьӧмыс ─ Еныс вылӧ лэбтісьӧм. Сідзкӧ, тійӧ кӧ ёртасит му вылісьыскӧт, сэк тійӧ Еныс вылӧ лэбтісит.
[5] Юраныт поди видзат, Вежа Гижӧтас висьталӧм этадз весись: «Еныс миян пытшкӧ сетӧм ловсӧ радейтӧ вежӧктӧмӧдз»?
[6] Сылӧн миянлӧ бурсетӧмыс ӧддьӧн уна, сійӧн сідз и Вежа Гижӧтас висьталӧм: ─ Асьнысӧ вылына лэбтіссеслӧ Еныс паныт сувтӧ. Рам сьӧлӧмаэслӧ козьналӧ бурсетӧмсӧ.
[7] Сідзкӧ, сетчӧ Еныслӧ, а кульыслӧ лэбтісьӧ паныт! Сэк сія пышшас тіян дынісь.
[8] Сибӧтчӧ Еныс дынӧ, и Сія сибӧтчас тіян дынӧ. Умӧльсӧ кериссез, миссьӧтӧ киэзнытӧ! Ылӧтчиссез, сӧстӧмтӧ сьӧлӧммезнытӧ!
[9] Тӧждісьӧ, горзӧ, герьясьӧ! Сералӧмнытӧ ась вежӧ горзӧм, гажнытӧ ─ тӧждісьӧм.
[10] Дӧсвидзисьыс одзын асьнытӧ лэдзӧ, раммӧтӧ, сэк Сія лэбтас тіянӧс.
[11] Воннэзӧ, ӧтамӧдныт йылісь эд баитӧ умӧля. Кин воныс йылісь умӧля баитӧ да сійӧ осудитӧ, сія Туйдӧтыс йылісь умӧля баитӧ, Туйдӧтсӧ осудитӧ. Сэк сія мортыс абу Туйдӧт сьӧрті олісь, но судитісь.
[12] Туйдӧтсӧ Сетісьыс да Судитісьыс эд ӧтік. Сія ӧтнас вермӧ мездыны да лов босьтны. А тэ, мӧдік йылісь умӧля баитісь, кин тэ сэтшӧмыс?
[13] Мукӧдыс тай баитӧны: «Талун, ашын я мунам эта карӧ. Сэтчин олам ӧтік во. Пондам вузасьны да ӧктыны шедтӧм сьӧмсӧ». Ӧні кывзӧ, этадз баитіссез.
[14] Тійӧ сідз баитат, а асьныт одӧ тӧдӧ, мый лоас ашын. Мый тіян оланныт? Сія чочком ру кодь, мыччасьӧ недыр кежӧ, сэсся ӧшӧ.
[15] Сідз шуӧмныт туйӧ тіянлӧ колӧ висьтавны: «Дӧсвидзисьыс кӧ лэдзас да ловьяӧсь лоам, сэк керам этӧ, мӧдікӧ я».
[16] Тійӧ асьнытӧ вылына лэбтӧмсянь ошшасят. Сэтшӧм быд ошшасьӧмыс ─ умӧль керӧм.
[17] Сідзкӧ, кин вежӧртӧ бурсӧ керны, да оз кер, сія умӧльсӧ керись.