[1] Менам воннэзӧ, унаӧн эд керсьӧ велӧтіссезнас. Тӧдат эд, миянкӧт, велӧтіссескӧт, суд вылас Еныс пондас чорытжыка бӧрйисьны.
[2] Мийӧ быдӧнным уна керам умӧльсӧ. Мортыс оз кӧ пыр умӧляс аслас кыв кузя, сія вермӧ асьсӧ быдсӧн видзны быд умӧль керӧмись. Сэтшӧмыс быд ладорсянь ни бур морт.
[3] Вӧввес миянӧс медбы кывзісисӧ, мийӧ ӧманыс нылӧ сюйыштам ӧмлӧс. Сы отсӧтӧн веськӧтлам быдсӧн вывтырнас.
[4] Корабллес ӧддьӧн ыджытӧсь. Вына тӧлыс нійӧ новйӧтӧ саридзӧттяс. Но, кытчӧ колӧ, веськӧтлісьыс учӧтик рульӧн туйдӧтӧ.
[5] Сідз и миян кывным: вывтырын сія учӧтик торок, но уна керӧ. Видзӧт, учӧтик биыс кытшӧм уна вӧр сотӧ!
[6] И кылыс ─ би, умӧльсӧ ӧктісь. Кылыс вывтыраным быд торрез коласын сідз сулалӧ, нельки быдсӧн вывтырнымӧс сэрпӧсьтӧ. Сія ӧзйӧ адсяняс да сотӧ миянлісь быдӧс оланнымӧс.
[7] Мортыс вермӧ раммӧтны да видзны киас вӧрпаэсӧ, кайесӧ, виклясиссесӧ да ваын оліссесӧ.
[8] А кывсӧ раммӧтны некин оз вермы. Сія лёк керись, виян ядӧн тырӧм.
[9] Кывнаным ошкам Ен Айнымӧс. Сійӧн жӧ ёрдам Еныс сьӧрті аркмӧтӧм отирсӧ.
[10] Ӧтік ӧмись петӧ ошкӧм да ёрдӧм. Воннэзӧ, сідз оз ков керны.
[11] Му пытшксис ӧтіклаын вермас я петны чӧскыт да курыт ва?
[12] Менам воннэзӧ, инжир пу оз вермы вайны виягӧд. Виноград вылын оз быдмы инжир. Сідз и ӧтіклаись оз вермы петны чӧскыт да курыт ва.
[13] Кин ылӧса да мывкыда тіян коласісь, ась мыччалӧ мывкыдсӧ аслас оланӧн. Ась быдӧс керӧ бур мывкыдсянь рама видзсьӧмӧн.
[14] Но мӧдік вылӧ видзӧттӧн тіян завид кутӧмнытсянь кӧ сьӧлӧмныт пизьӧ, тійӧ кӧ дзир асьнытӧ радейтат, сэк эд ошшасьӧ. Асланыт бӧбӧтчӧмӧн быльсӧ мӧдӧрӧ эд бергӧтӧ.
[15] Сэтшӧм мывкыдыс абу сетӧм вылісянь. Сія му вылісь отирсянь да сэрпӧсь ловвезсянь.
[16] Кытӧн эм завидуйтӧм, дзир асьӧс радейтӧм, сэтчин быдӧс арттӧм, уна умӧльыс.
[17] Вылісянь сетӧм мывкыдыс сӧстӧм, лӧнь, рам, кывзісьӧ, небыт сьӧлӧмсянь бурсӧ керӧ, оз лыддьы ӧтіккезӧс мӧддэзся буржыккезӧн, оз ылӧтлы.
[18] Отирсӧ ӧтамӧдкӧт бурӧтіссес-лӧньсьӧтіссес кӧдзӧны лӧнь оланлісь кӧдзыссӧ. Сэтісь воӧмыс ─ Ен сьӧрті веськыта олӧм.