[1] Воннэзӧ, керас кӧ мортыс мыйкӧ умӧльӧ, сэтшӧм мортсӧ рам сьӧлӧмӧн туйдӧтӧ. Тійӧ эд Лов сьӧрті оліссез. Быдыс тіян коласісь ась видзӧтӧ ас сьӧрас, медбы асьныт эдӧ ылалӧ.
[2] Ӧтамӧднытлӧ отсалӧ, кӧр кинлӧ сьӧкыт. Сідз керӧмныт лоас Кристослӧн тшӧктӧм сьӧрті.
[3] Мортыс ас йывсис унаӧв кӧ пыртӧ юрас, а ачыс абутӧм туйӧ, сэк сія ачыс асьсӧ ылӧтӧ.
[4] Быдӧнныт тӧдмалӧ-видзӧтӧ ассиныт керӧмнытӧ. Сэк вӧлись вермат ошшасьны асланыт уджӧн, а одӧ пондӧ ассиныт керӧмнытӧ видзӧтны мӧдіккезлӧн керӧм сьӧрті.
[5] Быдыс эд ассис нопсӧ нӧбӧтӧ.
[6] Кинӧс Ен Кылас велӧтӧны, сія ась быдӧсісь, мый сылӧн эм, янсӧтӧ велӧтісьыслӧ.
[7] Асьнытӧ эд ылӧтӧ: Енсӧ он эд вермы пуктыны абутӧм туйӧ. Мортыс мый кӧдзас, сійӧ и вундас.
[8] Мортыс кӧдзӧ кӧ вывтыр сьӧрті керӧмсӧ, вундас кулӧм. Лов сьӧрті керӧмсӧ кӧдзӧ кӧ, Ловсянь вундас пырся олан.
[9] Бурсӧ кертӧн юрнытӧ эд ӧшӧтӧ. Пондам кӧ керны бурсӧ, сэк аскадӧ босьтам кӧдзӧмнымӧс, огӧ кӧ сетчӧ мыдзӧмыслӧ.
[10] Кытчӧдз эм эшӧ кадыс, пондам керны бурсӧ быдӧнныслӧ. Ӧддьӧнжык пондам отсасьны миянкӧт веритіссезлӧ.
[11] Адззат, аслам киӧн кытшӧм гырися ме тіянлӧ гижа!
[12] Отирыс сьӧрті керӧм могись мукӧдыс тшӧктӧны тіянӧс асьнытӧ вундыштыштны. Нія полӧны, медбы нійӧ эзӧ вашӧтлӧ Кристослӧн крест понда.
[13] Вундыштыштӧммес асьныс озӧ олӧ Туйдӧтыс сьӧрті. Нылӧ колӧ, медбы тіянӧс вундыштыштісӧ, сэсся нія вермасӧ сійӧн ошшасьны отирыс одзын.
[14] Меным эд немӧн ошшасьны. Ме верма ошшасьны дзир миян Дӧсвидзись Кристос Исуслӧн крест вылас кулӧмӧн. Меным му вылісьыс быдӧс куліс крест вылас, а ме кулі му вылісьыслӧ.
[15] Кристос Исускӧт ӧтлаасьӧм мортлӧ вундыштыштӧмыс нем оз сет. Колӧ, медбы тэ виль мортӧн вӧлін.
[16] Эта велӧтӧм сьӧрті оліссезлӧ и Енлӧн Израильлӧ ась лоас лӧнь олан да Енлӧн небыт сьӧлӧмсянь бурсетӧм!
[17] Менӧ сэтшӧм тӧждісьӧмӧдз некин эдӧ ни вайӧтлӧ. Ме эд ас вылам новйӧта Дӧсвидзись Исусыслісь дойманнэсӧ.
[18] Воннэзӧ, миян Дӧсвидзись Кристос Исуслӧн бурсетӧмыс тіянкӧт! Аминь.