[1] Ерусалимас ме бӧра вовлі даснёль во бӧрті Варнавакӧт, сьӧраным босьтлім Титсӧ.
[2] Ме сэтчин муні Енлӧн осьтӧм сьӧрті. Вичкуын ыджытжыккезӧ пуктӧммезлӧ висьтаси, кыдз висьтася Бур Юӧрсӧ мӧдік отирлӧ. Меным коліс нысянь тӧдны, эг я ме весь кутчы эта удж бердӧ, кӧдӧ ӧнӧдз кера.
[3] Титыс, кӧда мекӧт ветліс, грек морт. Но Ерусалимись воннэз сійӧ эзӧ тшӧктӧ вундыштыштны.
[4] Вундыштыштны тшӧктісӧ отир, кӧдна вовлісӧ миян дынӧ воннэз моз. Нія тай гусьӧн мӧдісӧ видзӧтны миянлісь олӧмнымӧс. Нылӧ коліс тӧдны, кытшӧм мездӧтчӧм миянлӧ сетіс Кристос Исусыс. Нія тай миянӧс мӧдісӧ бӧр домавны Туйдӧтнас.
[5] Мийӧ нылӧ немымда эгӧ сетчӧ. Эгӧ пондӧ керны ны сьӧрті, медбы Бур Юӧрыслӧн быльыс тіян дынын эз вӧв вежӧм.
[6] Менӧ кывзісӧ Ерусалим вичкуись воннэз, кӧднӧ пуктӧмась ыджытжыккезӧ. Нійӧ быдыс тӧдӧ. Мый меным сэтісь, киннэз нія, Еныс эд быд мортлісь пытшксӧ тӧдӧ. Нія менӧ кывзісӧ, но висьтасьӧмам содтыны нем эзӧ тшӧктӧ.
[7] Нія казялісӧ: менӧ Петрасӧ моз Еныс сувтӧтіс висьтасьны Бур Юӧрсӧ. Петрасӧ Сія сувтӧтіс иудейезлӧ, а менӧ ─ мӧдік отирлӧ.
[8] Кӧда отсаліс Петралӧ керны апостоллісь уджсӧ иудей отир коласын, Сія и меным отсаліс мӧдік отир коласын.
[9] Яков, Кифа да Иоан йылісь шуӧны, ны вылын пӧ вичкуыс видзсьӧ. Меным да Варнаваыслӧ нія сетісӧ киэзнысӧ, кӧр пондісӧ тӧдны: менам сія уджыс Енлӧн бурсетӧмсянь, и мийӧ керам ӧтік удж. Мийӧ баитчим: нія мунасӧ иудейез дынӧ, а мийӧ ─ мӧдік отир дынӧ.
[10] Дзир корисӧ тӧдвыланым видзны Ерусалимсис умӧля олісь веритіссесӧ. Ме сідз и кера: пыр тӧждіся ны понда.
[11] Кӧр Петраыс локтіс Антиокияас, ме отирыс одзын сылӧ быдӧс веськыта висьталі. Сія отирыскӧт асьсӧ эд эз видз сідз, кыдз колӧ.
[12] Одзжык сія сёйис ӧтлаын Кристос отиркӧт, кӧдна эзӧ вӧлӧ иудейез. Сэтчӧ локтісӧ Яковлӧн кынымкӧ ыстӧм морт. Сія повзис вундыштыштӧм дор сулаліссезсис, сійӧн ны локтӧмсянь пондіс ылӧтчыны да сайласьны.
[13] Ӧтлаын сыкӧт ылӧтчисӧ сэтісь и мӧд иудейес. Локтіссес сьӧрті пондіс керны и Варнаваыс.
[14] Ме сэтӧн казялі: нія озӧ керӧ Бур Юӧрлӧн быль сьӧрті. Сэк ме быдӧнныс дырни Петраыслӧ висьталі: «Тэ, иудей, олан мӧдік отир моз, а он ов иудейез моз. Сэк мыйлӧ мӧдік отирсӧ тшӧктан овны иудейез моз?»
[15] Мийӧ иудейез шогмӧмсянь, абу «умӧльсӧ керись ентӧдтӧм отир».
[16] Мийӧ пондім тӧдны: мортыс оз вермы лоны Ен сьӧрті веськыта олісьӧн Туйдӧтыс сьӧрті керӧмнас, сэтшӧмӧн лоӧ дзир Кристос Исуслӧ веритӧмнас. Сійӧн мийӧ пондім веритны Кристос Исусыслӧ, медбы веритӧмнымсянь лоим Ен сьӧрті веськыта оліссезӧн. Туйдӧт сьӧрті керӧмнас некин оз вермы лоны Ен сьӧрті веськыта олісьӧн.
[17] Мийӧ кошшам Ен сьӧрті веськыта олӧмсӧ Кристоссянь. Сы коста асьным лоамӧ кӧ умӧльсӧ кериссез, сэк оз я пет умӧль керӧмыс Кристосыссянь? Оз эд!
[18] Ме бӧр лӧсьӧта кӧ сійӧ, мый рази, сэк ме Туйдӧтыс сьӧрті ачымӧс сувтӧта умӧльсӧ керисьӧн.
[19] Туйдӧтыс сьӧрті ме кулі, сійӧн Туйдӧтсис мезми, медбы овны Ен понда. Ӧтлаын Кристоскӧт ме вӧлі дорӧм.
[20] Ӧні ме ог ни ов, ме пытшкын олӧ Кристосыс. Вывтырам овтӧн ола Енлӧн Зонлӧ веритӧмнам. Сія менӧ радейтӧ, Асьсӧ сетіс ме понда.
[21] Еныслісь бурсетӧмсӧ ог пукты абутӧм туйӧ. А мортсӧ кӧбы позис керны Ен сьӧрті веськыта олісьӧн Туйдӧт сьӧрті олӧм понда, сэк весись куліс Кристосыс.