[1] Воннэзӧ, Енлӧн сувтӧтӧм каддэз йылісь тіянлӧ оз ков гижны.
[2] Тійӧ асьныт бура тӧдат: гусясись ойнас локтӧ видзчисьтӧг, сідз локтас и Дӧсвидзисьлӧн Луныс.
[3] Кытшӧмкӧ кадӧ отирыс пондасӧ шуны: «Лӧня олам, некинсянь абу умӧльыс». Сэк ны вылӧ видзчисьтӧг локтас вийсьӧм-разьсьӧмыс. Сідз новйӧтчись инькалӧ чужтан кадӧ локтӧ зубытыс. И некытчӧ нія сэтісь озӧ пышшӧ.
[4] Воннэзӧ, тійӧ абу пемытын. Сійӧн оз лок сія Луныс тіян дынӧ видзчисьтӧг гусясись моз.
[5] Тійӧ быдӧнныт югытлӧн да лунлӧн челядь. Мийӧ абу пемытлӧн да ойлӧн челядь.
[6] Сійӧн огӧ пондӧ узьны мӧдіккез моз. Пыр лоам лӧсьӧтчӧмӧсь да пондам овны садь юрӧн.
[7] Узиссес эд ойнас узьӧны. Кодаліссес ойнас кодалӧны.
[8] Мийӧ лунлӧн челядь. Сідзкӧ, пондам овны садь юрӧн. Эта ась лоӧ миян паськӧмным: вывтыр выланым кӧрт кышӧтыс миян ─ веритӧмным да радейтӧмным, юр сайӧвтанным ─ мезмӧм вылӧ надеяным.
[9] Еныс эз шу миян вылӧ кисьтны Ассис лӧгсӧ. Сія бӧрйис миянӧс мезмыны Дӧсвидзись Кристос Исусным пыр.
[10] Кристосыс куліс миян понда, медбы мийӧ, ловьяӧсь али кулӧмӧсь, Сыкӧт ӧтлаын олім.
[11] Сійӧн ӧтамӧднытӧ ӧзйӧтӧ-туйдӧтӧ да вынсьӧтӧ. Тійӧ эд сідз и керат.
[12] Воннэзӧ, бурӧ пуктӧ тіян дынын уджаліссесӧ, вичкуын Дӧсвидзись нимӧн веськӧтліссесӧ да тіянӧс велӧтіссесӧ.
[13] Бурӧ пуктӧ да радейтӧ нійӧ уджалӧмныс понда. Ас коласаныт лӧсялӧ.
[14] Воннэзӧ, корам тіянӧс: дышшесӧ мывкыдсьӧтӧ, поліссесӧ вынсьӧтӧ, вынтӧммеслӧ отсалӧ. Быдӧнныскӧт видзсьӧ ыджыт мылаӧн.
[15] Видзӧтӧ, медбы некинлӧ эд вештісьӧ умӧль понда умӧльӧн. Ӧтамӧднытлӧ да и быдӧнныслӧ пыр кошшӧ керны бурсӧ.
[16] Пыр лоӧ гажаӧсь.
[17] Дугдывтӧг кеймӧ.
[18] Быдӧс понда буркывтӧ Енсӧ. Сійӧ эд Еныс видзчисьӧ тіянсянь, Кристос Исуслӧ веритіссезсянь.
[19] Ловсӧ эд кусӧтӧ.
[20] Енсянь юӧртісьлісь висьталӧмсӧ абутӧм туйӧ эд пуктӧ.
[21] Быдӧс тӧдмалӧ-видзӧтӧ, бурыс бердӧ видзсьӧ.
[22] Быдпӧлӧс умӧльыс дынісь ылынжыка видзсьӧ.
[23] Лӧньсӧ сетісь Еныс ась керас тіянӧс быдсӧн вежаэзӧн. Дӧсвидзись Кристос Исусным локтік кежӧ ась видзас тіянӧс сӧстӧммезӧн: и ловнытӧ, и оланнытӧ, и вывтырнытӧ.
[24] Тіянӧс Корисьыс надейнӧй. Сія висьталӧмыс сьӧрті и керас.
[25] Воннэзӧ, кеймӧ миян понда.
[26] Окыштӧ ӧтамӧднытӧ вежа окалӧмӧн.
[27] Дӧсвидзись нимӧн тшӧкта тіянӧс, этӧ гижӧтсӧ лыддьӧтӧ вежа отирлӧ быдӧнныслӧ.
[28] Миян Дӧсвидзись Кристос Исуслӧн бурсетӧмыс тіянкӧт! Аминь.