[1] Воннэзӧ, миянсянь тійӧ тӧдат, кыдз колӧ овны Ен сьӧрті. Тійӧ сідз и олат. Но корам тіянӧс и кеймисям Кристос Исус нимӧн: вынсьӧтчӧ эшӧ буржыка овны Еныс сьӧрті.
[2] Тӧдат эд, кытшӧм тшӧктӧммез Дӧсвидзись Исуссянь мийӧ сетім тіянлӧ.
[3] Еныслӧ колӧ, медбы тійӧ вӧліт вежа отирӧн да видзсит кыскасьӧмись.
[4] Быднытлӧ колӧ кужны видзны ассиныт вывтырнытӧ вежаӧн, медбы тіянӧс пуктісӧ бур отирӧ.
[5] Эд керӧ вывтырныт ӧзйӧтчӧм-кыскӧм сьӧрті Енсӧ тӧдтӧммез моз.
[6] Веритісь веритісьлӧ умӧльсӧ эд керӧ, эд бӧбӧтчӧ. Умӧльсӧ керӧм понда Вештісисьыс ─ Дӧсвидзись. Эта йылісь мийӧ одзжык ни баитлім да тіянӧс ӧлім.
[7] Еныс эз кор миянӧс сэрпӧссьыны, корис вежаэзӧн лоны.
[8] Сідзкӧ, мортыс кӧ абутӧм туйӧ пуктӧ этӧ велӧтӧмсӧ, сія абутӧм туйӧ пуктӧ Енсӧ, Кӧда сетіс тіянлӧ Ассис Вежа Ловсӧ.
[9] Веритіссез коласын ӧтамӧдӧс радейтӧм йылісь тіянлӧ оз ков гижны. Тіянӧс Ачыс Еныс велӧтіс радейтны.
[10] Македония пасьта веритіссесӧ тійӧ радейтат. Корам тіянӧс и одзлань ӧддьӧнжык радейтны ӧтамӧднытӧ.
[11] Вынсьӧтчӧ овны лӧня. Уджалӧ, асланыт киэзӧн шедтӧ оланын коланасӧ. Тіянӧс сідз овны и одзжык мийӧ тшӧктім.
[12] Сэк Енлӧ вериттӧм отирыс пондасӧ бурӧ пуктыны тіянӧс, да и тіян быдӧс лоас тырмӧмви.
[13] Воннэзӧ, ог коль тіянлӧ висьтавтӧг кулӧммес йылісь, медбы тійӧ эдӧ тӧждісьӧ Енлӧ вериттӧм отир моз. Нылӧ эд нем бурсӧ видзчисьны.
[14] Мийӧ веритам: Исусыс куліс да ловзис. Сэк и нійӧ, кӧдна веритісӧ Исусыслӧ да кулісӧ ни, Еныс ӧтлаын Исускӧт вайӧтас дынас.
[15] А этна тіянлӧ висьталӧм кыввезным Дӧсвидзисьлӧн: миян коласісь мукӧдыс пондасӧ овны Дӧсвидзисьлӧн локтӧмӧдз. Мийӧ, овны кольччӧммес, огӧ одзалӧ кулӧммесӧ.
[16] Кывсяс тшӧктӧм, Аркангеллӧн юӧртан шы да Енлӧн буксанісь гора шы. Сэк енӧжсянь лэдзчас Ачыс Дӧсвидзисьыс. Сія кадӧ медодз ловзясӧ Кристослӧ веритіссезӧн кулӧммес.
[17] Сэсся мийӧ, ловйӧн кольчӧммес, ныкӧт ӧтлаын лэбтісям кымӧр вылын руас пантасьны Дӧсвидзиськӧт. Сэксянь Дӧсвидзисьыскӧт пыр ӧтлаын лоам.
[18] Сідзкӧ, ӧтамӧднытлісь сьӧлӧммезнытӧ бурмӧтӧ этна кыввезӧн.