[1] Дәрһәqа к’омәкдайина щьмә’та Хwәдеда әв тьштәки зедә йә, кӧ әз wәр’а бьньвисьм.
[2] Чьмки әз wе р’әзәдьлийа wә заньм у нава мәкәдонийада пе wә фьр’наq дьбьм дьбежьм, кӧ wә баwәрмәндед qәза Ахайайе һе сала парва к’аре хwә к’омәкдайине кьрийә у әв хирәтк’ешийа wә, гәләк жь нав wанда ләqандьнә.
[3] У әз жи wан бьрайед хwә дьшиньм, wәки фьр’наqийа мьнә һьндава wәда, wе йәкеда бәтал дәрнәйе, ле һун ӧса һазьр бьн, чаwа мьн wанр’а готийә,
[4] кӧ нәбә һәгәр мәкәдони т’әви мьн бен у бьбиньн һун нә һазьр ьн, әм шәрми бьн (нахwазьм бежьм һун жи) wе гӧманеда, йа кӧ әм wәда гӧман бун.
[5] Ләма жи мьн р’е тер’а дит, һиви жь бьра кьр, кӧ бәри мьн бенә щәм wә у т’ьвдарәке wе п’ешк’еша гӧмрә, йа кӧ wә соз дабу бьбиньн. Һьнге әwе бь р’әзәдьлийе һазьр бә, нә кӧ бь дәсте зоре.
[6] Ве йәке бир нәкьн: Йе дәст дьдә бәр чандьне, wе һьндьки жи бьдьру, ле йе дәст надә бәр чандьне, wе гӧмрә жи бьдьру.
[7] Дьле һәр кәсир’а чьqас дәрбаз дьбә, бьра һаqаси жи бьдә, нә кӧ бьдә ле дьле wи пәй бә йан бь борщдарийе бә, чьмки Хwәде йе бь дьл у әшq дьдә һ’ьз дькә.
[8] Хwәде дькарә һ’әму алийава сәр wәда бьбаринә, wәки һәр алийада һәр гав һ’әму тьштед wәйә керһати һәбьн у зедә бә жи бона һәр кьрьнед qәнщ.
[9] Чаwа ньвисар ә: «Wи гӧмрә да бәләнгаза, qәнщикьрьна Wи һ’әта-һ’әтайе дьминә» .
[10] Әwе кӧ т’охьм дьдә т’охьмр’әш у нан жи бона хwарьне, wе т’охьм п’ешк’еши wә кә у зедә кә, бәред qәнщикьрьна wә жи бьгьһинә .
[11] Һуне һәр тьштива дәwләти бьн, wәки һәр алийава мәр’д бьн у әw qәнщийед һун бь дәсте мә дькьн, бьбьнә мә’ни кӧ шькьрийе бьдьнә Хwәде.
[12] У гава һун ви qӧльхи дькьн, нә кӧ т’әне кемасийа щьмә’та Хwәде т’ьжи дькьн, ле әв йәк дькә кӧ Хwәдер’а һе шькьрдайин зедә бә.
[13] Әв кьрьна wә р’астийа баwәрийа wә избат дькә, бь ви аwайи шькьрийа хwә Хwәде тиньн бона гӧһдарикьрьна Мьзгинийа Мәсиһә кӧ һун иqрар дькьн у бона wе мәр’данийа wә, кӧ һун алик’арийа wан у һ’әмуйа дькьн.
[14] У әwе бона wә дӧа бькьн, һ’әйра wәда бьн, бона wе к’әрәма Хwәдейә сәр к’әрәма, йа кӧ wәр’а һатийә дайине.
[15] Шькьр жь Хwәде бона wе дайина wийә кӧ найе готьн!