[1] Бона ве йәке әм жь ви qӧльхи вәнак’ьшьн, йа кӧ мә бь р’ә’ма Хwәде стандийә.
[2] Ле бәле әм жь тьштед ә’йбә дьзива дур ьн у фелбазийа накьн, хәбәра Хwәдеда qәлпийе накьн. Ле сәрда әм р’астийе ә’йан дькьн у бь ви аwайи хwә дийари исафа һәр мәрьви дькьн ль бәр Хwәде.
[3] Ле һәгәр әв Мьзгинийа кӧ әм дьдьн вәшарти йә жи, әw ль бәр ӧндабуйийа вәшарти йә.
[4] Мире ве дьнйайейи нәһәq шәвәр’әша кора анийә сәр фә’ме нәбаwәра, wәки р’онайа Мьзгинийа р’умәта Мәсиһ нәдә сәр wан, Йе кӧ сурәте Хwәде йә.
[5] Әм нә кӧ хwә даннасин дькьн, ле Иса Мәсиһ чаwа Хӧдан у хwә жи чаwа хӧламед wә, бона Иса.
[6] Wи Хwәдейе кӧ гот: «Бьра жь тә’рийе р’онайи дәре» , Wи хwәха дьле мәда шәwq да, wәки әм р’умәта Хwәде нас кьн, бь wе шәwqа кӧ жь р’уйе Мәсиһ дәрте.
[7] Ле әв хьзнә нава мә дәрданед һ’әр’ида һәйә, wәки бе к’ьфше кӧ зорайийа qәwате жь Хwәде йә, нә кӧ жь мә.
[8] Әм һәр алийава тә’ли-тәнгийада нә, ле нав дәст-п’ийе тәнгасийада начьн, дәрәще бегӧманда нә, ле бегӧман ниньн,
[9] хwәйинәйар ьн, ле нә бейар ьн, ледайи-к’әти нә, ле нә ӧндабуйи нә.
[10] Һәр гав әм мьрьна Иса бәдәнед хwәда дьбьн, wәки жийина Иса жи бәдәна мәда к’ьфш бә.
[11] Чьмки әмә кӧ сах ьн, бона Иса мьрьнер’а тенә дайине, wәки жийина Иса жи qальбе мәйи мьрида к’ьфш бә.
[12] Аwа мьрьн нава мәда йа хwә дькә, ле жийин нава wәда.
[13] Чаwа ньвисар ә: «Мьн баwәр кьр, ләма хәбәр да» . Хут бь wи р’ӧһ’е баwәрийе әм жи баwәр дькьн у ләма хәбәр дьдьн.
[14] Әм заньн Әwе кӧ Хӧдан Иса жь мьрьне р’акьр, wе мә жи т’әви Иса жь мьрьне р’акә у мә т’әви wә бәр хwә бьдә сәкьнандьне.
[15] Бәле әв һ’әму бона wә йә, кӧ гава к’әрәм һе сәр гәләкада бьр’ьжә, шькьрдарийа р’умәта Хwәде жи һе зедә бә.
[16] Ләма әм жь ве йәке вәнак’ьшьн. Бәле әм жь дәрвава дерьс дьбьн дьчьн, ле дьлда р’ож бь р’ож нуйәжийин дьбьн.
[17] Чьмки щәфед мәйә дәм-дәмә сьвьк мә дькьнә хwәйийе р’умәта гьранә һ’әта-һ’әтайейә бе һьмбәр.
[18] Аwа әм дина хwә надьнә тьштед хӧйа дьбьн, ле йед нәхӧйа, чьмки тьштед хӧйа бона wәхтәки нә, ле йед нәхӧйа һ’әта-һ’әтайи нә.