[1] Әз wе Мьзгинийе дьхwазьм биньмә бира wә хушк-бьрано, йа кӧ мьн wәр’а даннасин кьр у wә qәбул кьр, сәр wе жи сәкьнинә.
[2] Бь wе жи һун хьлаз дьбьн, һәгәр wе хәбәре, йа кӧ мьн wәр’а даннасин кьр, qәwин бьгьрьн. Һәгәр на, баwәрийа wәйе бадиһәwа бә.
[3] Мьн әв йәка сәр һәр тьштир’а, чаwа станд, ӧса жи да wә, кӧ Мәсиһ бона гӧнед мә мьр, ль гора ньвисара
[4] у һатә дәфьнкьрьне, р’ожа сьсийа Әw Хwәдеда жь мьрьне р’абу ль гора ньвисара ,
[5] Пәтрусва хӧйа бу, пәйр’а һәр донздәһ шандийава.
[6] Паше щарәкер’а пенсьд хушк-бьрайи зедәтьрва хӧйа бу, жь wан гәләк һ’әта ньһа сах ьн, ле һьнәк жи мьрьнә.
[7] Паше Аqубва хӧйа бу, пәйр’а һ’әму шандийава.
[8] Ахьрийе, пәй һ’әмуйар’а мьнва хӧйа бу, чаwа йәки нә сәре хwә жь дийа хwә буйи .
[9] Чьмки әз жь шандийа йе һәри паш ьм, кӧ нә лайиq ьм шанди жи бемә готьне, чьмки мьн щьвина Хwәде зеранд .
[10] Ле әз бь к’әрәма Хwәде мә чь жи һәмә у к’әрәма Wи кӧ бь мьнр’а йә, бош-бәтал нибу. Ле сәрда әз жь wан һ’әму шандийа зә’фтьр хәбьтим у нә кӧ әз бум, ле к’әрәма Хwәдейә кӧ бь мьнр’а йә.
[11] Аwа һәгәр әз бьм, йан әw бьн, әм һ’әму жи аһа даннасин дькьн у wә аһа жи баwәр кьрийә.
[12] Аwа һәгәр әм даннасин дькьн, кӧ Мәсиһ жь мьрьне р’абуйә, чаwа жь wә һьнәк дьбежьн, кӧ р’абуна мьрийа т’ӧнә?
[13] Һәгәр р’абуна мьрийа т’ӧнә, кӧ ӧса йә Мәсиһ жи жь мьрьне р’анәбуйә.
[14] У һәгәр Мәсиһ жь мьрьне р’анәбуйә, кӧ ӧса йә даннасинийа мә жи бош-бәтал ә у баwәрийа wә жи бош-бәтал ә.
[15] У әме жи бьбьнә шә’дед Хwәдейә дәрәw, чьмки мә бона Хwәде шә’дәти да, кӧ Әwи Мәсиһ жь мьрьне р’акьр, ле һәгәр мьрийе р’анәбьн, кӧ ӧса йә Әw жи жь мьрьне р’анәкьрийә.
[16] Чьмки һәгәр мьрийе р’анәбьн, кӧ ӧса йә Мәсиһ жи жь мьрьне р’анәбуйә.
[17] У һәгәр Мәсиһ жь мьрьне р’анәбуйә, wәки ӧса йә баwәрийа wә бадиһәwа йә, һәла һе һунә нава гӧнед хwәда нә
[18] у әwед баwәрийа Мәсиһда жи мьрьнә ӧнда бунә.
[19] Һәгәр т’әне әм бона ве жийине гӧмана хwә Мәсиһ тиньн, кӧ ӧса йә әм жь һ’әму мәрьва мә’рьмтьр ьн.
[20] Ле р’аст Мәсиһ жь мьрьне р’абуйә, чаwа бәре дәрәмәта пешьн жь нава мьрийа р’абуйи.
[21] Мьрьн р’уйе мәрьвәкида бу, бь мәрьвәки жи wе р’абуна мьрийа бьбә.
[22] Чаwа һ’әмуйед жь Адәм буйи дьмьрьн, ӧса жи һ’әмуйед жь Мәсиһ буйи wе сах бьн.
[23] Ле һәр кәс дора хwәда: Пешийе Мәсиһ чаwа бәре дәрәмәта пешьн, паше йед п’ара Мәсиһ, wәхте һатьна Wида.
[24] Һьнге ахьри wе бе, гава к’ока һәр сәрwертийе, һ’ӧкӧмәтийе у qәwате бинә у п’адшатийе бьдә дәсте Бав Хwәде.
[25] Чьмки Әw гәрәке п’адшатийе бькә, һ’әта кӧ Хwәде һ’әму дьжмьна бькә бьне п’ийед Wи .
[26] Дьжмьне хьлазийе кӧ wе к’оке ле бинә, мьрьн хwәха йә,
[27] чьмки ньвисар дьбежә: «Хwәде һәр тьшт бьне п’ийада ельми Wи кьр». Ле гава те готьне «һәр тьшт» ельми Wи кьр, фә’мдари йә, пештьри Wи Хwәдейи, Йе кӧ һәр тьшт ельми Wи кьр .
[28] У гава һәр тьшт ельми Wи бьн, һьнге Кӧр’ Хwәха жи wе ельми Wи Хwәдейи бә, Йе кӧ һәр тьшт ельми Wи кьр, wәки һәр тьштида Әw бьбә Хwәдейе һәр тьшти.
[29] Wәки дьн готи, әwед кӧ бона мьрийа тенә ньхӧмандьне wе чь бькьн? Һәгәр мьрийе т’ӧ щар р’анәбьн, иди чьма бона мьрийа тенә ньхӧмандьне?
[30] Чьма әм жи һәр гав хwә давежьнә сәр села сор?
[31] Әw фьр’наqбуна мьн шә’дә йә, хушк-бьрано, йа кӧ әз пе wә фьр’наq дьбьм йәктийа Мәсиһ Исайе Хӧдане мәда, әз һәр р’ож дәст жь ә’мьре хwә дьк’ьшиньм.
[32] Һәгәр мьн Әфәседа шәр’е хwә дәрәща мәрьвайеда т’әви «сә’ва» кьр, чь к’әтә к’исе мьн? Һәгәр р’абуна мьрийа wе т’ӧнәбә, дә иди «әм бьхwьн-вәхwьн, чьмки әме сьбе бьмьрьн» , чаwа һьнәк дьбежьн.
[33] Нәхапьн! «Һәвалтийа хьраб мәрьве хwәйип’әргал хьраб дькә» .
[34] Р’аст бьфькьрьн, сәр һ’ьше хwәда wәрьн, иди гӧна нәкьн, чьмки һьнәк жь wә һе Хwәде нас накьн, әз ве йәке дьбежьм, кӧ һун шәрм бькьн.
[35] Ле бәле йәке бежә: «Мьри чаwа дькарьн р’абьн у qальбе wане чаwа бә?»
[36] Сәре аqьл! Әw т’охьме кӧ тӧ дьчини, һ’әта «нәмьрә» жийинер’а шин набә.
[37] У әw тьште кӧ тӧ дьчини, нә кӧ wи qальби дьчини, к’ижан кӧ wе бьгьһижә, ле һ’әбәкә садә йә, мәсәлә гәньм, йан жи жь т’охьмед майин.
[38] У Хwәде qальб дьдә wи т’охьми, чаwа кӧ дьхwазә у һәр т’охьмәк qальбе хwә дьстинә.
[39] Һ’әму qальб хун-гоштәк ниньн, qальбе мерьв башqә йә у qальбе һ’әйwен башqә, йе тәйрәда башqә йә, йе мә’сийа жи башqә.
[40] Qальбед ль ә’змен жи һәнә, qальбед ль дьне жи һәнә, ле р’әwша йед ә’змен башqә йә у йед дьне башqә.
[41] Р’әwша тә’ве башqә йә, р’әwша һиве башqә у р’әwша стәйрка жи башqә йә у һәр стәйркәк бь р’әwша хwә жь һәв тенә фьрqикьрьне.
[42] Бь ви аwайи жи р’абуна мьрийа йә: Qальбе дерьс те чандьне, йе нәдерьс wе р’абә.
[43] Әw бер’әwш те чандьне, бь р’әwше wе р’абә, әw бет’аqәтийе те чандьне, бь qәwате wе р’абә.
[44] Qальбе бинбәр те чандьне у qальбе р’ӧһ’ани wе р’абә. Чаwа кӧ qальбе бинбәр һәйә, ӧса жи qальбе р’ӧһ’ани һәйә.
[45] Аһа жи ньвисар ә: «Мәрьве пешьн Адәм, бу бинбәрәки сах» , ле Адәме пашьн бу р’ӧһ’әки жийиндайине.
[46] Ле бәле пешийе йе р’ӧһ’ани нәбу, ле йе бинбәр, паше йе р’ӧһ’ани.
[47] Мәрьве пешьн жь хwәлийа ә’рде бу, мәрьве дӧда жь ә’змен бу.
[48] Чаwа йе жь хwәлийе бу, ӧса жи йед жь хwәлийе нә, чаwа йе жь ә’змен ә, ӧса жи йед жь ә’змен ьн.
[49] У мә чаwа кьрасе йе жь хwәлийе ль хwә кьрийә, әме ӧса жи кьрасе йе жь ә’змен ль хwә кьн.
[50] Готьна мьн әв ә хушк-бьрано, wәки хун у гошт ль П’адшатийа Хwәде нькарьн wар бьн, нә жи дерьсбун wе ль нәдерьсбуне wар бә.
[51] К’а бьбьһен, әз сӧр’әке wәр’а бежьм: Әм һ’әмуйе нәмьрьн, ле әм һ’әмуйе жи бенә гӧһастьне ,
[52] ньшкева, чаwа ч’ә’ве хwә бьгьри-вәки, дәма бор’ийа ахьрийе бе ледане. Чьмки гава бор’и бе ледане, мьри wе нәдерьсбуйи р’абьн, әме жи бенә гӧһастьне.
[53] Чьмки гәрәке әви дерьс нәдерьсийе ль хwә wәргьрә у әви мьри нәмьрийе ль хwә wәргьрә.
[54] Ле гава әви дерьс нәдерьсийе ль хwә wәргьрә у әви мьри нәмьрийе ль хwә wәргьрә, һьнге әw готьне бе сери, кӧ ньвисар ә: «Сәрк’әтьне мьрьн һ’уфи хwә кьр» .
[55] «Мьрьн, к’ане qиле жә’ра тә? Мьрьн, к’ане сәрк’әтьна тә?»
[56] Qиле мьрьне гӧнә йә у qәwата гӧна жь Qануне йә.
[57] Ле шькьр жь Хwәде, кӧ әм бь дәсте Хӧдане мә Иса Мәсиһ сәр хьстьн.
[58] Аwа хушк-бьрайед мьнә дәлал, qәwин бьминьн, жь щийе хwә нәһ’әжьн, һәр гав шьхӧле Хӧданда пешда һәр’ьн, бьзаньбьн хәбата wә бош-бәтал нинә ль бәр Хӧдан.