[1] Ngawo adǝyen kowo kura laa alama am kada kadami captanaye gai samelan nukci fangekko. Tayiye: «Alleluya! Njǝkkawo-a daraja-a kǝnduwo-a Alaye,
[2] awoa sharanju jire ye, kalkal ye. Jawar kura kǝnjǝnanjulan duniadǝa bannajǝnadǝro Ala shara kamjǝgǝna, koro bu wolodiyanjuye tia cuwore ngayenja cǝmowona,» yera.
[3] Koro caye gai kowo sapcane: «Alleluya! Kangenju har abada abadinno samero tǝɍǝn ciji,» yera.
[4] Daji amwurawa findi deridǝ-a alau roa dewudǝ-a tǝmdane Ala kǝla kurisnju kǝrmaiyen napkadamadǝro ambǝccagane: «Amin. Alleluya!» yera.
[5] Kuris kǝrmaiyedǝn kowo laa nukce: «Alandea yungorowo, wolodiyanju samma, nayi duwon tia rinuwi kuran ganansodǝ!» yeno.
[6] Daji kowo kura laa alamanju jama kada kadami captana so, ingi ngǝwu dunoaro cǝgasi so, gǝrdu dunoa keyeraye soye gai nukci fangekko. Tayiye: «Alleluya! Ala Kǝmande Martawama kǝrmai cunodi, diye!
[7] Kǝji fanniyo, karwu kǝjiaro walliyo, tiro daraja yiyo, dalilnjudǝ sa larusa Tamadǝye cǝdǝna, tǝmajinju ye dabbardǝna nangaro.
[8] Tiro kajǝmu linne ngalwo bul fok yiyilji cade lujǝna,» yera. Awoa kajǝmu linne ngalwodǝ kǝndo nanjireye muminnaye.
[9] Daji malaiyadǝye wuro: «Ruwune: Barganja am duwon maskaru larusa Tamadǝyero tayia dojanadǝ!» yeno. Koro walde: «Mana adǝ jiremaro Alaye,» yeno.
[10] Daji tiro ambǝttuwuro fuwunjun tǝmgadakkǝniya, wuro: «Bare dimmi! Wu ye wolodi Alaye, ni-a kǝramiyanǝm shedawu Isaye-a gai. Alaro ambǝtkǝne! Awoa sheda Isayedǝma mana duwon nawiyadǝa simojǝgǝnadǝ wo,» yeno.
[11] Daji same fǝrǝmgada kirukko. Akko fǝr bul mbeji. Kǝmbamanjudǝa Amanma-a Jirema-alan bowojai, koro jawal jireyen shara ye kamji, kǝriwu ye cadi.
[12] Simnju tǝlam kannu cambiye gai, koro kǝlanjun aɍiawu maila kadaa. Cu laa ti gǝnia wunduma nojǝnni ruwuwadaa.
[13] Kajǝmu bulan dallaada lujǝna, koro cu Kalma Alayedǝlan tia bowojai.
[14] Kǝriwuwu sameye kajǝmu linne bul fok kadawu bawoa lujana, koro kǝla fǝrra bullen tia jagai.
[15] Cinjunlan kashagar timia culuwi, ngainin tilan jama duniaye sammaa cacalji. Tayia ka suyen kǝnduwoaro cunodi, koro inab guwatturam diben gǝrgadu jau fit Ala Martawamayedǝn guguwacci.
[16] Kǝla kajǝmunju-a dunonju-ayen cu adǝ ruwuwada: «MAI MAIYAYE, KORO KƎMA KƎMAWAYE.»
[17] Daji malaiya laa kǝla kǝngallen daada kirukko. Kowo dunoaro sapce ngudowa samen mareajai sammaro: «Arowo, masǝna kura Alayedǝro captǝnowo!
[18] Da maiyaye-a da kajallawa kǝriwuye-a da kǝriwuwu kura kuraye-a da fǝrraye-a fǝrwunjaye-a da kambeye yen kal, kaɍeaye yen kal, kuran ganan am sammaye-aa ngǝrowo!» yeno.
[19] Daji bundidǝ-a maiya duniaye-a kǝwuwanja kǝriwuye-a cijane ti kǝla fǝrren napkadama-a kǝriwuwunju-aro kǝriwu njǝkkadoro captana kirukko.
[20] Bundidǝa keda, nawi kattuwuyedǝa ti-a rokko, ti duwon fuwu bundidǝyen alama ajabba ajabba cǝdǝna ye, am tayiro tawa bundidǝye gǝnajagane gumkinjuro ambǝccaanadǝa jambajǝna yedǝ wo. Tayi yindiso ronjaa bǝrǝm kannuye kau kannuye kimejǝgǝnaaro gǝpkeyera.
[21] Tayi gapcanadǝa kashagar duwon ci ti kǝla fǝrren napkadadǝyen culuwimadǝn keyeso, koro ngudowa nga danja jagare kulyera.