[1] Daji samelan alama gade kura ye, ajabba yea kirukko: Malaiya tulur masiwa daryeye tulurra, masiwa duwon tayilan gǝrgadu Alaye ceridǝ.
[2] Koro awo laa teku kudǝrambe kannu-a tusaada gai kirukko, koro kǝla tekudǝyen am duwon kǝla bundidǝ-a gumkinju-a lamba cunjuye-ayen kǝnnasar cawandǝnadǝ mukkonjan kumbiya Alayea daada.
[3] Aiya Nawi Musa wolodi Alayedǝ-a aiya Tamadǝyedǝ-aa yejane: «Ala Kǝma Martawama, kǝndonǝm darajaa jauro ajabba ajabba! Ala Mai jama dunia sammaye, jawalnǝm nan'adal-a jire-aa!
[4] Kǝmande, wundu nia rinje niro daraja njiwawodǝ? Awoa ni tilonǝmma tayir wo. Jama duniaye samma isane fuwunǝmlan ambǝnnjagai, kǝndonǝm nanjireye fǝleyaada nangaro,» cani.
[5] Ngawo adǝyen Fado Alaye, wotte leima shedaye samelan dǝganadǝ fǝrǝmgada kirukko,
[6] koro malaiya tulur masiwa tulurradǝ Fado Alayedǝn keluwo. Kajǝmu linne bul fok lujana, nganjinjaro bel dinarre tikkerǝna.
[7] Alau dewu roadǝye falnja malaiya tulurdǝro tasa dinarre tulur gǝrgadu Ala har abada abadinno dǝgamayen fer casambǝɍǝna kaino.
[8] Adǝgaima daraja Alaye-a dunonju-a nangaro Fado Alayedǝ kangen kimbǝɍo, koro wunduma rakce Fado Alayedǝro ngayiwawo, sai masiwa tulur malaiya tulurredǝ wakkajane ceseriya.