[1] Ngài he Sâ-lùn ke mòi-kui-fâ, he sân-lak tú ke pak-ha̍p-fâ.
[2] Ngài ke chhìn-moi chhai ke-têu se-moi-é tông-chûng, chhiu-chhiong net-teu tú ke yit-lùi pak-ha̍p-fâ.
[3] Ngài ke chhìn-lòng chhai nàm-ngìn tông-chûng, chhiu-chhiong su-nà tú ke phìn-kó-su; ngài fôn-hí chhô chhai kì ke su-yáng hâ, kì ke kó-chṳ́ tông-thiàm, ha̍p ngài khiéu-mi.
[4] Kì tai ngài ngi̍p kì yen-fi ke thâng-hâ, chhai ngài táng-kô yû oi-chhìn ke khì-è.
[5] Khiù ngì yung phù-thò-kôn lòi pú ngài ke ngièn-hi, ya yung phìn-kó lòi fî-fu̍k ngài ke chîn-sṳ̀n, yîn-vi ngài chho̍k-tó siông-sṳ̂-phiang ô!
[6] Kì yung chó-sú thok-tén ngài ke thèu-nà, yung yu-sú nám-tén ngài.
[7] Yâ-lu-sat-lâng ke se-moi-é â, chhiáng tap-yin ngài, chhiáng chṳ́-tén lìn-yòng lâu lu̍k-mà fat-sṳ; mo̍k chhàu ngài-têu, m̀-hó met-sa ngài-têu, pûn ngài-têu ke oi-chhìn chhṳ-yù fat-chán.
[8] Thâng â! Ngài chhìn-lòng ke sâng! Khon â! Kì phàn-sân ko-liâng hiong ngài chéu lòi.
[9] Ngài ke chhìn-lòng chhiong lìn-yòng, chhiong se lu̍k-é. Kì khî-tén, chhai ngài vuk-hâ ke piak heu-poi; kì tui chhûng-mùn ngoi-poi khon ngi̍p-lòi, tui chhûng-kak-é hiong tî-poi thêu-khon.
[10] Ngài ke chhìn-lòng lâu ngài kóng-fa: Hong-hí-lòi ô, ngài ke chhìn-moi â! Ngài ke mî-ngìn, lâu ngài khiung-ha lòi-hi ô!
[11] Ngì khon, hòn-tûng yí-kîn ko-thet lé; lo̍k-yí ke sṳ̀-chiet ya ko-thet lé.
[12] Chhai yâ-ngoi pak-fâ yí-kîn chhin khôi; tiâu-é chhong-kô ke sṳ̀-chiet to lé, thièn-yâ thâng tet-tó pân-kiêu ke sâng.
[13] Vù-fâ-kó khôi-sṳ́ siuk lé; phù-thò-su ya khôi-fâ fat-chhut hiông-mi lé. Hong-hí-lòi ô, ngài ke chhìn-moi â! Ngài ke mî-ngìn, lâu ngài khiung-ha lòi-hi ô!
[14] Ngài ke ngie̍t-kap-è â, ngì lì ngài án yén, chhiong chhai ngàm-sa̍k ke lùng-tú yit-yong; pûn ngài khon ngì ke mien, pûn ngài thâng ngì ke sâng; yîn-vi ngì ke mien chhin-chiâng, ngì ke sâng me tông hó-thâng.
[15] Oi chok fù-lì, chhiu-he ke-têu fí-fái phù-thò-yèn ke se fù-lì, yîn-vi ngài ke phù-thò-su tú-tú tông khôi-fâ!
[16] Ngài ke chhìn-lòng su̍k ngài, ngài ya su̍k kì. Kì chhai pak-ha̍p-fâ tông-chûng chóng yòng-è,
[17] tén-to chhîn-chó ke liòng-fûng chhôi-lòi, vû-am chhiam-chhiam-é lì-khôi ke sṳ̀. Ngài ke chhìn-lòng â, hó chón-hi lé, chhiu-chhiong Pí-thi̍t-sân táng ke lìn-yòng, ya-he se lu̍k-é chéu-tén chón-hi.